Sarong Mas Marahay na Paagi
AN Mga Saksi ni Jehova nahahadit manongod sa pagruro nin espirituwalidad sa kinaban asin sa inmoralidad patin pagkadaing kasegurohan sa relihion na lakop sa sosyedad. Bilang resulta, kun beses inaapod sindang pundamentalista. Alagad pundamentalista daw sinda? Bako. Minsan ngani makosog an saindang relihiosong mga kombiksion, bako sindang pundamentalista sa sentido kan pagkagamit sa termino. Dai ninda iniimpluwensiahan an mga namomoon sa politika na suportaran an sarong punto de vista, asin dai sinda naggagamit nin mga demonstrasyon asin kadahasan tumang sa mga dai ninda inooyonan. Nakanompong sinda nin mas marahay na paagi. Inaarog ninda an Namomoon sa sainda, si Jesu-Cristo.
Kombensido an Mga Saksi ni Jehova na igwa nin relihiosong katotoohan, na iyan manonompongan sa Biblia. (Juan 8:32; 17:17) Alagad an Biblia nagtotokdo sa mga Kristiano na magin maboot, marahay, mahoyo, asin makatanosan—mga kualidad na dai nagtataong lugar sa panatisismo. (Galacia 5:22, 23; Filipos 4:5) Sa libro kan Biblia na Santiago, an mga Kristiano ineenkaminar na kultibaron “an kadonongan hale sa itaas,” na ilinaladawan na “enot sa gabos malinig, dangan matoninong, makatanosan, andam na magkuyog, pano nin pagkaherak asin marahay na mga bunga.” Idinugang pa ni Santiago: “An bunga nin katanosan isinasabwag an banhi kaiyan sa irarom nin matoninong na mga kamugtakan para sa mga nakikipagkatoninongan.”—Santiago 3:17, 18.
Ginigirumdom kan Mga Saksi ni Jehova na dakula an interes ni Jesus sa katotoohan. Sinabihan nia si Poncio Pilato: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Minsan ngani saro siang mapusong paradepensa kan katotoohan, dai nia hiningoang ipirit sa iba an saiyang mga kombiksion. Imbes, pinukaw nia an saindang isip asin puso. Aram nia na an saiyang langitnon na Ama, sarong “marahay asin matanos” na Dios, an madesisyon kun paano asin noarin hahaleon an kaputikan asin inhustisya sa ibabaw kan daga. (Salmo 25:8) Huli kaini, dai nia hiningoang pogolon an mga dai nag-oyon sa saiya. Al kontraryo, an ortodoksong mga namomoon sa relihion kan saiyang kaaldawan an naghingoang pogolon si Jesus.—Juan 19:5, 6.
Makosog an mga kombiksion kan Mga Saksi ni Jehova manongod sa relihiosong mga doktrina, asin nagpapaheling sinda nin marigon na mga prinsipyo sa buhay mapadapit sa moral. Arog ni apostol Pablo, kombensido sinda na igwa sana nin “sarong Kagurangnan, sarong pagtubod, sarong bautismo.” (Efeso 4:5) Aram man ninda an mga tataramon ni Jesus: “Hayakpit an tata asin piot an dalan na pasiring sa buhay, asin diit an mga nakakukua kaiyan.” (Mateo 7:13, 14) Pero, dai ninda hinihingoang piriton an iba na sunodon an saindang mga paniniwala. Imbes, inaarog ninda si Pablo asin “nakikimaherak” sinda sa gabos na nagmamawot na gayong ‘makipag-uli sa Dios.’ (2 Corinto 5:20) Ini an mas marahay na paagi. Iyan an paagi nin Dios.
An relihiosong pundamentalismo, siring sa paggamit ngonyan sa termino, laen na marhay. Dakol na estratehiya an ginagamit nin mga pundamentalista—kabale an kadahasan—tanganing ipirit sa sosyedad an saindang mga prinsipyo sa buhay. Sa paggibo kaiyan, sinda nagigin mahalagang kabtang kan sistema politikal. Minsan siring, si Jesus nagsabi na an saiyang mga parasunod maninigo na “bakong kabtang kan kinaban.” (Juan 15:19; 17:16; Santiago 4:4) Kaoyon kan mga tataramon na iyan, an Mga Saksi ni Jehova nagdadanay na estriktong neutral sa politikal na mga kontrobersiya. Asin, siring sa pag-ako kan diaryo sa Italia na Fuoripagina, ‘mayo sindang ano man na ipinipirit sa siisay man; libre an gabos na akoon o haboan an sinasabi ninda.’ An resulta? An matoninong na mensahe sa Biblia kan mga Saksi nakaaakit sa gabos na klase nin tawo, minsan duman sa dating mga pundamentalista.—Isaias 2:2, 3.
Sarong Kinaban na Marigon an mga Prinsipyo sa Buhay
Minimidbid kan mga Saksi na dai kayang resolberan nin mga tawo an mga problemang ikinahahadit nin mga pundamentalista. Dai nindo puedeng piriton an sarong tawo na maniwala sa Dios o akoon an saindong personal na mga paniniwala. An pag-isip na posible an siring na bagay nagbunga kan nagkapira sa pinakamakuring takot sa kasaysayan, arog baga kan mga Krusada, Inkisisyon kaidtong edad media, asin “pagkombertir” sa mga Indian sa Amerika. Minsan siring, kun may tiwala kamo sa Dios, gikan sa boot nindong babayaan na sia an bahalang humiro.
Sono sa Biblia, may termino na an Dios sa panahon nin pagtogot nia sa mga tawo na balgahon an saiyang mga ley asin sa siring nagigin dahelan nin pagsakit asin kolog. Haros tapos na an panahon na iyan. Si Jesus namamahala na bilang Hade sa langitnon na Kahadean nin Dios, asin sa dai na mahahaloy mahiro an Kahadean na iyan tanganing haleon an mga gobyerno nin tawo asin pamahalaan aroaldaw an katawohan. (Mateo 24:3-14; Kapahayagan 11:15, 18) An magigin resulta sarong pambilog na kinaban na paraiso na dian magsosopay an katoninongan asin katanosan. Sa panahon na iyan mayo na nin pagkadaing kasegurohan dapit sa kun paano maninigong sambahon an tunay na Dios. “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) An daing sagkod na mga prinsipyo sa buhay na arog baga nin mamomoton na kabootan, katotoohan, hustisya, asin karahayan magigin mapanggana para sa ikararahay nin gabos na makinuyog na katawohan.
Nagtatanaw sa panahon na iyan, an salmista nagsasabi sa poetikong paagi: “Kun manongod sa mamomoton na kabootan asin katotoohan, sinda nagkanagbo; an katanosan asin katoninongan—sinda naghadokan. An katotoohan mismo matubo sa daga, asin an katanosan mismo madungaw hale sa kalangitan. Siring man, si Jehova, sa saiyang kabtang, matao kan marahay, asin an satong daga matao kan bunga kaiyan. Sa enotan nia an katanosan mismo malakaw, asin iyan magibo nin dalan paagi sa saiyang mga lakad.”—Salmo 85:10-13.
Minsan ngani dai ta kayang bagohon an kinaban, kaya niato bilang mga indibiduwal na kultibaron an diosnon na mga prinsipyo sa buhay dawa ngonyan. Sa siring, puede niatong hingoahon na magin an klase nin mga tawo na mamawoton nin Dios bilang saiyang mga parasamba sa bagong kinaban na iyan. Sa panahon na iyan makabibilang kita sa mga mahoyo na sinambit kan salmista: “An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” (Salmo 37:11) Sinusuportaran asin binebendisyonan nin Dios an mga naggigibo kan saiyang kabotan, asin may panuga siang makangangalas na mga bagay para sa saindang ngapit. Si apostol Juan nagsabi: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.
[Retrato sa pahina 7]
An Mga Saksi ni Jehova nag-iimbitar sa gabos na magin pamilyar sa maogmang bareta kan Kahadean nin Dios
[Pasasalamat para sa pinagkuanan kan retrato sa pahina 6]
Lampara sa pahina 3, 4, 5, asin 6: Printer’s Ornaments/ni Carol Belanger Grafton/Dover Publications, Inc.