Pagkatadang Buhay sa “Aldaw ni Jehova”

“An aldaw ni Jehova dakula asin makangingirhat na gayo, asin siisay an makatitios kaiyan?”​—JOEL 2:11.

1. Taano an ‘makangingirhat na aldaw ni Jehova’ ta maninigong magin okasyon para sa kagayagayahan?

“MAKANGINGIRHAT”! Iyan an pagkaladawan kan propeta nin Dios na si Joel sa dakulang “aldaw ni Jehova.” Minsan siring, kita na mga namomoot ki Jehova asin nagdusay sa saiya basado sa pantubos na atang ni Jesus dai kaipuhan na mapaulnok sa takot mantang nagdadangadang an aldaw ni Jehova. Tunay nanggad na iyan magigin makangingirhat na aldaw, alagad aldaw man iyan nin dakulang kaligtasan, an aldaw nin pakabutas sa maraot na palakaw nin mga bagay na nagpapasakit sa katawohan sa nag-aging mga milenyo. Sa pagtanaw sa aldaw na iyan, inaapodan ni Joel an banwaan nin Dios na ‘magin magayagaya asin maggayagaya; huli ta si Jehova aktuwal na magibo nin dakulang bagay,’ asin idinagdag nia an garantiya: “Mangyayari na an gabos na mag-apod sa ngaran ni Jehova makaliligtas.” Dangan sa areglo kan Kahadean nin Dios, “magkakaigwa kan mga nakaligtas, arog kan isinabi ni Jehova, asin sa tahaw kan nagkataradang buhay, na inapod ni Jehova.”​—Joel 2:​11, 21, 22, 32.

2. Sa paghaman kan mga katuyohan nin Dios, ano an mangyayari (a) sa “aldaw kan Kagurangnan”? (b) sa “aldaw ni Jehova”?

² An makangingirhat na aldaw ni Jehova dai dapat na ikamalo sa “aldaw kan Kagurangnan” sa Kapahayagan 1:10. Kabale sa nahuhuring aldaw na ini an kaotoban kan 16 na bisyon na ilinadawan sa Kapahayagan kapitulo 1 sagkod 22. Kabale dian an panahon kan kaotoban kan gabos na pangyayari na ihinula ni Jesus bilang simbag sa hapot kan saiyang mga disipulo: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan palakaw nin mga bagay?” An presensia ni Jesus sa langit sinenyalaran sa daga nin makatatakot na ‘mga ralaban, kakulangan nin kakanon, pagkaongis, peste, asin katampalasanan.’ Mantang nag-oorog an mga kamondoan na ini, si Jesus nagtatao nin karangahan sa mga tawong matatakton sa Dios paagi sa pagsugo sa saiyang mga disipulo sa presenteng aldaw na ihulit “an maogmang baretang ini kan kahadean . . . sa bilog na ineerokan na daga para sa pagpatotoo sa gabos na nasyon.” Dangan, bilang kulminasyon kan aldaw kan Kagurangnan, biglang maabot “an katapusan” kan presenteng palakaw nin mga bagay, an makangingirhat na aldaw ni Jehova. (Mateo 24:​3-14; Lucas 21:11) Iyan an magigin aldaw ni Jehova para sa paggibo nin marikas na paghokom sa marigsok na kinaban ni Satanas. “Magkukunogkunog nanggad an langit asin daga; alagad ta si Jehova magigin pailihan kan saiyang banwaan.”​—Joel 3:16.

Si Jehova Guminibo nin Aksion kan mga Aldaw ni Noe

3. Paano an mga kamugtakan ngonyan nakaaagid sa mga kamugtakan kan aldaw ni Noe?

³ An mga kamugtakan sa kinaban ngonyan kapareho kaidtong “mga aldaw ni Noe” labing 4,000 na taon na an nakaagi. (Lucas 17:​26, 27) Sa Genesis 6:​5, satong mababasa: “Naheling ni Jehova na an karatan nin tawo labi-labi na sa daga asin an gabos na tendensia kan mga kaisipan kan saiyang puso danay na sa karatan na sana.” Kapareho nanggad kan kinaban ngonyan! An karatan, kahanaban, asin kadaihan nin pagkamoot lakop sa gabos na lugar. Kun beses tibaad iniisip ta na an kabikoan nin mga tawo nakaantos na sa pinakahababang grado. Alagad an hula ni apostol Pablo mapadapit sa “huring mga aldaw” padagos na naootob: “An mga maraot asin madaya orog na magraraot, na nanlalagalag asin ikinalalagalag.”​—2 Timoteo 3:​1, 13.

4. Ano an nagin epekto kan falsong pagsamba kaidtong suanoy na mga panahon?

⁴ Nakadara daw kutana nin kaginhawahan sa katawohan an relihion kaidtong panahon ni Noe? Sa kabaliktaran, an apostatang relihion na arog kan yaon kaidto nakakontribwir na marhay sa kapahapahamak na mga kamugtakan. An enot na mga magurang niato napadara sa falsong katokdoan kan “enot na halas, an inaapod Diablo asin Satanas.” Sa ikaduwang kapag-arakian poon ki Adan, “nagpoon an pag-apod sa ngaran ni Jehova,” na minalataw na sa paaging lapastangan sa Dios. (Kapahayagan 12:9; Genesis 3:​3-6; 4:26) Kan huri, an rebeldeng mga anghel, na binayaan an esklusibong debosyon sa Dios, nagmateryalisar nin mga hawak nin tawo tanganing gumibo nin bawal na seksuwal na pakikidorog sa magagayon na aking babae kan mga tawo. An mga babaeng ini nangaki nin mestisong mga higante, na inaapod Nefilim, na nan-api asin nandaogdaog sa mga tawo. Sa impluwensiang ini nin mga demonyo, “linaglag nin gabos na laman an dalan kaiyan sa ibabaw nin daga.”​—Genesis 6:​1-12.

5. Mapadapit sa mga pangyayari kan aldaw ni Noe, anong nagpapatanid na sadol an itinatao sa sato ni Jesus?

⁵ Pero may sarong pamilya na pinapagdanay an integridad ki Jehova. Huli kaini, an Dios “ilinigtas si Noe, sarong parahulit nin katanosan, kaibanan nin pito pa kan pabahaan nia an kinaban nin maraot na mga tawo.” (2 Pedro 2:5) Ipinanganino kan Delubyong idto an makangingirhat na aldaw ni Jehova, na nagsesenyalar kan katapusan kan palakaw na ini nin mga bagay asin na manongod kaiyan si Jesus naghula: “Mapadapit sa aldaw asin oras na iyan mayo nin siisay man na nakaaaram, ni an mga anghel kan kalangitan ni an Aki, kundi an Ama sana. Huli ta kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos, magigin siring man kaiyan an presensia kan Aki nin tawo.” (Mateo 24:​36-39) Yaon kita sa kaagid na situwasyon ngonyan, kaya pinakasasadol kita ni Jesus na ‘atenderan an satong sadiri, asin magpuka, na sa gabos na panahon nagngangayongayo na magin kitang mapanggana sa pagdulag sa gabos na ining bagay na nakatalagang mangyari.’​—Lucas 21:​34-36.

An Hudisyal na Pagkastigo ni Jehova sa Sodoma Asin Gomorra

6, 7. (a) Ano an ipinanganino kan mga pangyayari kan panahon ni Lot? (b) Anong malinaw na patanid an itinatao kaini sa sato?

⁶ Mga ginatos na taon pakalihis kan Baha, kan an mga gikan ni Noe duminakol na sa daga, naheling mismo kan fiel na si Abraham asin kan saiyang sobrinong si Lot an saro pang makangingirhat na aldaw ni Jehova. Si Lot asin an saiyang pamilya nag-iistar sa siudad nin Sodoma. Kaiba kan kataed na Gomorra, an siudad na ini napano nin makababaldeng seksuwal na inmoralidad. An materyalismo tinatawan man nin pangenot na atension, na sa katapustapusi nakaapektar pa ngani sa agom ni Lot. Sinabihan ni Jehova si Abraham: “An kurahaw nin reklamo dapit sa Sodoma asin Gomorra, iyo, iyan makosog, asin an saindang kasalan, iyo, iyan magabaton.” (Genesis 18:20) Nakimaherak si Abraham ki Jehova na dai laglagon an mga siudad na iyan huli sa mga matanos na yaon dian, alagad sinabi ni Jehova na mayo siang manompongan dawa sampulong matanos na tawo duman. An mga anghel hale sa Dios tinabangan si Lot asin an saiyang duwang aking babae na dumulag pasiring sa kaharaning siudad nin Zoar.

⁷ Ano an suminunod na nangyari? Ikinokomparar an “mga huring aldaw” niato sa mga aldaw ni Lot, an Lucas 17:​28-​30 nagbabareta: “Iyo man, siring sa nangyari kan mga aldaw ni Lot: sinda nagkakarakan, sinda nag-iirinom, sinda nagbabarakal, sinda nagpapabakal, sinda nagtatanom, sinda nagtotorogdok. Alagad kan aldaw na si Lot luminuwas sa Sodoma uminoran nin kalayo asin asupre hale sa langit asin linaglag sinda gabos. Siring man an mangyayari sa aldaw na iyan na ihahayag an Aki nin tawo.” An naabtan kan Sodoma asin Gomorra sa makangingirhat na aldaw na idto ni Jehova nagtatao nin malinaw na patanid sa sato sa panahon na ini kan presensia ni Jesus. An presenteng kapag-arakian nin katawohan “naggibo [man] nin labi-labing pakikisaro asin nagsunod sa laman para sa kagamitan na bakong natural.” (Judas 7) Dugang pa, an inmoral na kaugalean sa sekso kan satong panahon nagin dahelan kan kadaklan sa “mga peste” na ihinula ni Jesus para sa aldaw na ini.​—Lucas 21:11.

Inani kan Israel an “Alihoshos”

8. Sagkod saen inotob kan Israel an pakipagtipan ki Jehova?

⁸ Sa igong panahon, pinili ni Jehova an Israel na magin saiyang “espesyal na sadiri hale sa gabos na ibang banwaan, . . . kahadean nin mga saserdote asin banal na nasyon.” Alagad ini nakadepende sa saindang ‘maingat na pagkuyog sa saiyang tingog asin pag-otob sa saiyang tipan.’ (Exodo 19:​5, 6) Tinawan daw ninda nin onra an dakulang pribilehio na ini? Dai nanggad! Totoo, an fiel na mga indibiduwal sa nasyon na iyan maimbod na naglingkod sa saiya​—si Moises, Samuel, David, Josafat, Ezequias, Josias, pati an debotong mga propeta asin propetisa. Pero an nasyon sa kabilogan bakong fiel. Pag-abot nin panahon, nabanga an kahadean​—an Israel asin Juda. Sa pankagabsan, an duwang nasyon napalabot sa paganong pagsamba asin iba pang dai nagtataong onra sa Dios na mga kostumbre kan kataraed na nasyon.​—Ezequiel 23:49.

9. Paano hinokoman ni Jehova an rebeldeng sampulong tribong kahadean?

⁹ Paano hinokoman ni Jehova an mga bagay-bagay? Siring kan dati, nagtao sia nin patanid, kaoyon kan prinsipyo na sinabi ni Amos: “An Soberanong Kagurangnan na Jehova dai magibo nin ano man sagkod na dai pa nia ikinapahahayag an saiyang hilom sa saiyang mga lingkod na propeta.” Si Amos mismo nagpahayag nin kasakitan para sa kahadean nin Israel sa amihanan: “Ano, kun siring, an magigin kahulogan sa saindo kan aldaw ni Jehova? Iyan magigin kadikloman, asin mayo nin liwanag.” (Amos 3:​7; 5:18) Dugang pa, an kapwa propeta ni Amos na si Oseas nagpahayag: “Nagsasarabwag sinda nin doros, asin alihoshos an saindang aanihon.” (Oseas 8:7) Kan 740 B.C.E., ginamit ni Jehova an hukbo nin Asiria tanganing biyong laglagon sagkod pa man an kahadean nin Israel sa amihanan.

An Pakipagkuenta ni Jehova sa Apostatang Juda

10, 11. (a) Taano si Jehova ta dai nagtogot na patawadon an Juda? (b) Anong mga bagay na makauuyam nin makuri an nakaraot sa nasyon?

¹⁰ Sinugo man ni Jehova an saiyang mga propeta sa kahadean nin Juda sa timog. Pero, an mga hade sa Juda na siring baga ki Manases asin sa kasalihid nia, si Amon, padagos na naggibo kan maraot sa Saiyang pagheling, na nagpapabolos nin ‘dugong daing kasalan na dakolon na marhay asin naglilingkod sa marigsok na mga idolo asin naghuhuruhod sa sainda.’ Minsan ngani an aki ni Amon na si Josias naggibo kan tama sa pagheling ni Jehova, an suminunod na mga hade, pati an banwaan, nagin sagom giraray sa karatan, kaya “si Jehova dai nagtogot na magtao nin kapatawadan.”​—2 Hade 21:​16-​21; 24:​3, 4.

¹¹ Si Jehova nagpahayag paagi sa saiyang propetang si Jeremias: “An sarong nakasosorpresang kamugtakan, makatatakot na bagay pa ngani, dinara na mamugtak sa daga: An mga propeta mismo naghurula nin kaputikan; asin kun dapit sa mga saserdote, sinda nanakop sono sa saindang mga kapangyarihan. Asin iyan an namotan kan sakong banwaan; asin ano an gigibohon nindo sa katapusan kaiyan?” An nasyon nin Juda labi-labi an pagkakasala sa dugo, asin an mga namamanwaan dian naparaot paagi sa paghabon, paggadan, pagsambay, pagsumpa nin putik, pagsunod sa ibang mga dios, asin iba pang bagay na makauuyam nin makuri. An templo nin Dios nagin “lungib nin mga parahabon.”​—Jeremias 2:​34; 5:​30, 31; 7:​8-​12.

12. Paano kinastigo ni Jehova an tumangerong Jerusalem?

¹² Si Jehova nagpahayag: “May kalamidad na padadatongon ko hale sa amihanan [Caldea], dakulang pagbagsak pa ngani.” (Jeremias 4:6) Sa siring, pinadatong nia an Kapangyarihan Pankinaban nin Babilonya, na kan panahon na idto iyo an “martilyo sa pandayan kan bilog na daga,” tanganing gabaon an tumangerong Jerusalem asin an templo kaiyan. (Jeremias 50:23) Kan 607 B.C.E., kasunod nin makuring marhay na pagsalikop, an siudad buminagsak sa makosog na hukbo ni Nabucodonosor. “Asin ginadan kan hade nin Babilonya an mga aking lalaki ni [Hadeng] Zedequias sa Ribla sa atubangan kan mga mata kaini, asin an gabos na noble nin Juda ginadan kan hade nin Babilonya. Asin an mga mata ni Zedequias saiyang binuta, na pagkatapos kaiyan ginapos nia sia nin ramal na tanso, tanganing darahon sia sa Babilonya. Asin an harong kan hade asin an mga harong kan banwaan sinolo kan mga Caldeo, asin rinumpag ninda an mga lanob nin Jerusalem. Asin an natada kan banwaan na nawalat sa siudad, asin an mga nagbaya na kuminampi sa saiya, patin an natada kan banwaan na nawalat dinarang bihag sa Babilonya ni Nabuzaradan na kapitan kan mga bantay.”​—Jeremias 39:​6-9.

13. Sairisay an nakaligtas sa aldaw ni Jehova kan 607 B.C.E., asin taano?

¹³ Tunay nanggad na makangingirhat na aldaw! Pero, an nagkapirang kalag na nagkuyog ki Jehova kabilang sa mga ilinigtas sa malaad na paghokom na idto. Kabale digdi an mga Recabita na bakong Israelita, na bakong arog kan mga taga-Judea nagpaheling nin mapakumbaba asin makinuyog na espiritu. Nakaligtas man an fiel na kapon na si Ebed-melec, na nagligtas ki Jeremias sa kagadanan sa sarong malaboy na bobon, asin an maimbod na sekretaryo ni Jeremias, si Baruc. (Jeremias 35:​18, 19; 38:​7-​13; 39:​15-​18; 45:​1-5) Sa mga siring na nagpahayag si Jehova: “Aram kong gayo an mga kaisipan na nasasaboot ko dapit sa saindo, . . . mga kaisipan nin katoninongan, asin bakong nin kapahamakan, tanganing tawan kamo nin ngapit asin paglaom.” An panugang iyan nagkaigwa nin sadit na kaotoban kan 539 B.C.E. kan an may takot sa Dios na mga Judio paluwason kan konkistador kan Babilonya, si Hadeng Ciro, asin bumalik tanganing itogdok liwat an siudad asin templo sa Jerusalem. An mga nagluwas ngonyan sa Babilonikong relihion asin nakabalik sa dalisay na pagsamba ki Jehova makalalaom man sa sarong mamuraway na ngapit na may daing sagkod na katoninongan sa ibinalik na Paraiso ni Jehova.​—Jeremias 29:11; Salmo 37:34; Kapahayagan 18:​2, 4.

“Dakulang Kahorasaan” kan Enot na Siglo

14. Taano ta permanenteng isinikwal ni Jehova an Israel?

¹⁴ Pumasiring kita sa enot na siglo C.E. Kan panahon na idto an nakabalik na mga Judio naholog liwat sa apostasiya. Sinugo ni Jehova digdi sa daga an saiyang Aking bugtong tanganing magin saiyang Linahidan, o Mesiyas. Durante kan mga taon nin 29 sagkod 33 C.E., si Jesus naghulit sa bilog na daga nin Israel, na nagsasabi: “Magsorolsol kamo, banwaan, huli ta an kahadean kan kalangitan harani na.” (Mateo 4:17) Dugang pa, sia nagtipon asin nagsanay nin mga disipulo tanganing makaiba nia sa pagbalangibog kan maogmang bareta kan Kahadean. Ano an nagin reaksion kan mga namamahala sa mga Judio? Binalobagi ninda si Jesus asin sa katapustapusi ginibo ninda an makababaldeng krimen na pagpagadan sa saiya sa makologon na paagi sa sarong hariging pasakitan. Isinikwal ni Jehova an mga Judio bilang saiyang banwaan. Permanente na ngonyan na isinikwal an nasyon na iyan.

15. Ano an nagin pribilehiong gibohon kan nagsosolsol na mga Judio?

¹⁵ Kan aldaw nin Pentecostes 33 C.E., ibinubo kan binuhay liwat na si Jesus an banal na espiritu, asin pinangyari kaini an saiyang mga disipulo na magtaram nin laen-laen na tataramon sa mga Judio asin proselito na tolos-tolos na nagtiripon. Sa pagkaolay sa kadaklan, si apostol Pedro nagpahayag: “An Jesus na ini binuhay liwat nin Dios, na manongod kaiyan kami gabos mga saksi. . . . Kun siring maaraman logod kan bilog na harong ni Israel na may kasiertohan na ginibo sia nin Dios na magin Kagurangnan asin Cristo, an Jesus na ini na saindong ipinako.” Ano an reaksion kan sadiosan na mga Judio? “Sinda nagkarulugad sa puso,” nagsolsol sa saindang mga kasalan, asin nabautismohan. (Gibo 2:​32-41) Ruminikas an pag-oswag kan paghuhulit kan Kahadean, asin sa laog nin 30 taon iyan ikinapaabot sa “gabos na linalang sa sirong nin langit.”​—Colosas 1:23.

16. Paano minaniobra ni Jehova an mga pangyayari na suminagkod sa paggibo nia nin paghokom sa Israel sa laman?

¹⁶ Uminabot na ngonyan an panahon tanganing gibohon ni Jehova an paghokom sa saiyang isinikwal na banwaan, an Israel sa laman. Rinibo, hale sa mga nasyon sa bilog na kinaban na midbid kaidto, an burunyog na nagralaog sa Kristianong kongregasyon asin linahidan bilang espirituwal na “Israel nin Dios.” (Galacia 6:16) Pero an Kajudiohan kan panahon na idto ruminuro pasiring sa pagkaongis asin kadahasan nin mga sekta. Sarongat sa isinurat ni Pablo manongod sa ‘pagpasakop sa superyor na mga autoridad,’ sinda hayag na nagrebelde tumang sa kapangyarihan nin Roma na namahala sa sainda. (Roma 13:1) Minalataw na minaniobra ni Jehova an suminunod na mga pangyayari. Kan taon 66 C.E., an mga hukbong Romano sa pangengenot ni Heneral Gallo suminakyada tanganing salikopan an Jerusalem. An nananalakay na mga Romano nalaog an siudad sagkod na linabot ninda an irarom kan lanob kan templo. Sono sa kasaysayan ni Josefo, tunay na nagkaigwa nin kahorasaan sa siudad asin sa mga tawo.a Alagad bigla na sanang duminulag an nananalakay na mga soldados. Nagpangyari ini sa mga disipulo ni Jesus na “dumulag pasiring sa kabukidan,” siring sa isinadol sa saiyang hula na nasusurat sa Mateo 24:​15, 16.

17, 18. (a) Paagi sa anong kahorasaan itinao ni Jehova an maninigong hustisya sa Kajudiohan? (b) Anong laman an ‘nakaligtas,’ asin anino ini kan ano?

¹⁷ Minsan siring, an lubos na paggibo kan paghokom ni Jehova sa kulminasyon kan kahorasaan madatong pa. Kan 70 C.E., an mga hukbong Romano, na ngonyan pinangengenotan ni Heneral Tito, suminalakay liwat. Totoo na talaga an ralaban ngonyan! An mga Judio, na sinda ngani mismo nagraralabanlaban, daing kalabanlaban sa mga Romano. An siudad asin an templo kaiyan ginaba. Labing sarong milyon na maniniwang na Judio an nagdusa asin nagadan, na mga 600,000 na bangkay an iinapon sa luwas kan mga tata kan siudad. Pagkabagsak kan siudad, 97,000 na Judio an dinarang bihag, na an dakol tangani sanang magadan kan huri sa mga pasale nin gladiador. Totoo nanggad na an solamenteng laman na nakaligtas durante kan mga taon kan kahorasaan na idto iyo an makinuyog na mga Kristiano na duminurulag pasiring sa kabukidan sa ibong kan Jordan.​—Mateo 24:​21, 22; Lucas 21:​20-​22.

¹⁸ Sa siring, an midbid na hula ni Jesus mapadapit sa “pagtatapos kan palakaw nin mga bagay” nagkaigwa kan enot na kaotoban kaiyan, na natapos sa aldaw ni Jehova para sa pagtao nin maninigong hustisya sa rebeldeng Judiong nasyon kan 66-​70 C.E. (Mateo 24:​3-​22) Pero, idto anino sana kan “pagdatong kan dakula asin makangingirhat na aldaw ni Jehova,” an pangultimong kahorasaan na madali nang sumanop sa bilog na kinaban. (Joel 2:31) Paano daw kamo “makaliligtas”? An kasunod na artikulo an masabi.

[Nota sa Ibaba]

Mga Hapot sa Repaso

◻ Paano an “aldaw kan Kagurangnan” konektado sa “aldaw ni Jehova”?

◻ Sa pagrepaso sa aldaw ni Noe, anong patanid an maninigo niatong himateon?

◻ Paano nagtatao nin mapuersang leksion an Sodoma asin Gomorra?

◻ Sairisay an nakaligtas sa “dakulang kahorasaan” kan enot na siglo?

[Mga retrato sa pahina 15]

Si Jehova nagtao nin dudulagan para sa pamilya ni Noe asin Lot, siring man kan 607 B.C.E. asin 70 C.E.