An Ngaran na Minagiya sa Tunay na Pagtubod

“DAI kamo nagtutubod ki Jesus asin sa saiyang nakababalukat na dugo,” an sabi nin sarong babae sa saro sa Mga Saksi ni Jehova. An sarong lalaki nag-insistir: “Inaapod nindo an saindong sadiri na Saksi ni Jehova, alagad ako saksi ni Jesus.”

Medyo lakop an opinyon na an Mga Saksi ni Jehova dai nagtutubod ki Jesus o na dai ninda sia tinatawan nin igong pagkaprominente. Pero ano an mga katunayan?

Totoo na makosog an paniniwala kan Mga Saksi ni Jehova sa ngaran nin Dios, na Jehova.a Nagigirumdoman ni Itamar, sarong Saksi sa Brazil: “An panahon nin dakulang pagbago sa sakong buhay nangyari kan manodan ko an ngaran nin Dios. Kan kaenot-enote kong mabasa iyan, garo baga ako nagimata sa nanok na pagtorog. Pinukaw asin pinahiro ako kan ngaran na Jehova; tinudok kaiyan an kairairaromi kan sakong kalag.” Minsan siring, idinagdag nia: “An sakong puso nagsosopay man sa pagkamoot ki Jesus.”

Iyo, rinerekonoser kan Mga Saksi ni Jehova na tanganing makamtan an buhay na daing katapusan, sinda dapat na tumubod “sa ngaran kan Aki nin Dios,” si Jesus. (1 Juan 5:13) Alagad ano an kahulogan kan mga tataramon na ‘sa ngaran ni Jesus’?

An Irinerepresentar kan Ngaran ni Jesus

An “sa ngaran ni Jesus” asin kaagid na mga tataramon manonompongan sa bilog na Kristianong Griegong Kasuratan, o “Bagong Tipan.” Sa katunayan, an terminong “ngaran” na ginamit manongod sa kabtang ni Jesus minalataw nin labi sa 80 beses, na mga 30 beses sa libro sana nin Gibo. An mga Kristiano kan enot na siglo nagbautismo sa ngaran ni Jesus, nagpaomay sa ngaran nia, nagtokdo sa ngaran nia, nag-apod sa ngaran nia, nagdusa huli sa ngaran nia, asin pinamuraway an ngaran nia.​—Gibo 2:​38; 3:​16; 5:​28; 9:​14, 16; 19:17.

Segun sa sarong diksionaryo sa Biblia, an termino sa Griego para sa “ngaran” parateng ginagamit sa Biblia “para sa gabos na ipinapakahulogan nin ngaran, sa autoridad, karakter, ranggo, kamahalan, kapangyarihan, kamurawayan, asin iba pa, sa gabos na bagay na kalabot sa ngaran.” Kun siring, an ngaran ni Jesus nagrerepresentar sa mamuraway asin mahiwason na autoridad nin kapamahalaan na ipinagkatiwala sa saiya ni Jehova Dios. Si Jesus mismo nagsabi: “An gabos na autoridad sa langit asin sa daga itinao na sa sako.” (Mateo 28:18) Pakatapos na paomayan ni Pedro asin Juan an sarong lalaking pilay, an Judiong mga namomoon sa relihion naghapot: “Paagi sa anong kapangyarihan o sa ngaran niisay na ini ginibo nindo?” Dangan mapusong ipinahayag ni Pedro an saiyang pagtubod sa autoridad asin kapangyarihan na irinerepresentar kan ngaran ni Jesus kan saiyang ipaaram na “sa ngaran ni Jesu-Cristo na taga Nazaret, . . . paagi sa sarong ini na an tawong ini nagtitindog digdi na marahay na sa atubangan nindo.”​—Gibo 3:​1-​10; 4:​5-10.

Pagtubod ki Jesus o ki Cesar?

Minsan siring, an paghingako kan siring na pagtubod sa ngaran ni Jesus bakong pasil. Siring kan ihinula ni Jesus, an saiyang mga disipulo ‘ikaoongis kan gabos na nasyon huli sa saiyang ngaran.’ (Mateo 24:9) Taano? Huli ta an ngaran ni Jesus nagrerepresentar sa saiyang posisyon bilang ninombrahan nin Dios na Namamahala, an Hade nin mga hade, na maninigong pasakopan kan gabos na nasyon, sarong bagay na bako sindang andam o habo nindang gibohon.​—Salmo 2:​1-7.

An mga namomoon sa relihion kaidtong kaaldawan ni Jesus habo man na pumasakop ki Jesus. Sinda nagsarabi: “Mayo kaming hade kundi si Cesar,” na paagi kaiyan isinisikwal ninda an Aki nin Dios. (Juan 19:​13-15) Imbes, sinda nagtubod sa ngaran​—sa kapangyarihan asin autoridad—​ni Cesar asin sa saiyang imperyal na gobyerno. Nagdesisyon pa ngani sinda na si Jesus maninigong magadan tanganing maingatan ninda an saindang posisyon asin ranggo.​—Juan 11:​47-​53.

Mga siglo pagkagadan ni Jesus, an dakol sa mga naghingakong Kristiano inarog an aktitud na kapareho kan sa mga namomoon na Judio. An mga Kristiano daang ini nagtutubod sa kapangyarihan asin autoridad kan Estado asin nagpartisipar sa mga pakikilaban kaiyan. Halimbawa, kaidtong ika-11 siglo, kan an dai ginagamit na mga guerrero organisaron kan iglesia na magin militia Christi, o mga kabalyerong Kristiano, “an paninimbagan sa makatanosan na pakikiguerra hinale sa sekular na mga kapangyarihan nin Kakristianohan asin inasumir, imbes, kan iglesia paagi sa paggamit kan mga kabalyerong Kristiano kaiyan.” (The Oxford History of Christianity) Idinagdag pa kan pagkasaysay na an nagkapirang deklarasyon kan papa naggiya sa mayoriya kan mga krusado na maniwala na paagi sa pakikikabtang sa mga krusada, “nakagibo sinda nin kontrata sa Dios asin inasegurar sinda nin sarong lugar sa Paraiso.”

Tibaad iargumento nin nagkapira na posibleng magin maimbod ki Jesus asin kadungan kaiyan magpartisipar sa politikal na mga aktibidad, siring man sa guerra nin mga nasyon. Tibaad naniniwala sinda na obligasyon nin Kristiano na labanan an karatan saen man iyan manompongan asin na kabale digdi an pakikiguerra kun kinakaipuhan. Alagad arog man daw kaini an punto de vista kan enot na mga Kristiano?

“An kaenot-enoteng mga Kristiano dai nagserbisyo sa mga puersa armada,” an sabi nin sarong artikulo sa magasin na The Christian Century. Ipinaliliwanag kaiyan na sagkod kan dekada nin 170-​180 C.E., mayo nin ano man na ebidensia na an mga Kristiano nagserbisyo sa hukbo. Dangan idinagdag kan artikulo: “Luway-luway na sanang binayaan kan mga Kristiano an saindang pagkontra sa serbisyo militar.”

Ano an nagin resulta? “Seguro mayo nang orog na nagparaot sa Kristianismo kisa sa paninindogan kaiyan na haros dai nang ikinalaen sa ginigibo kan mga bakong Kristiano sa pakikiguerra,” an sabi kan artikulong The Christian Century. “An bagay na sa sarong lado inaako kan mga Kristiano an pagtubod sa maboot na Paraligtas mantang sa ibong na lado saindang mainit na sinusuportaran an relihioso o nasyonalistikong mga guerra nakaraot na marhay sa pagtubod.”

Pag-arog sa Enot na mga Kristiano Ngonyan

Posible daw para sa mga Kristiano ngonyan na arogon an marahayon na halimbawa kan enot na mga Kristiano? Ipinaheling kan Mga Saksi ni Jehova sa siglong ini na iyan posible. Sa pagtaram manongod sa sainda, an editor kan Holocaust Educational Digest nagsabi: “Daing Saksi ni Jehova na makikiguerra noarin man. . . . Kun an gabos sa kinaban na nasa kapangyarihan arog kaini an pagtubod, [an Guerra Mundial II] nungka kutanang nangyari.”

Iyan man an masasabi dapit sa mas dai pa sana nahahaloy na rehional na mga ralaban, arog baga kan nangyari sa Irlandia del Norte. Kaidtong pirang taon na an nakaagi, an saro sa Mga Saksi ni Jehova naghuhulit sa harong-harong sa sarong lugar na Protestante sa siudad nin Belfast. An sarong kagharong, kan maaraman na an Saksi dati Katoliko, naghapot: “Kan ika Katoliko pa, nagsuportar ka sa IRA [Irish Republican Army]?” Aram kan Saksi na an lalaki puedeng magin madahas huli ta ini nadetener kan madakop na armado nin badil kan gagadanon nia an sarong Katoliko asin pinaluwas pa sana ini. Kaya an Saksi nagsimbag: “Bako na akong Katoliko ngonyan. Saro na ako sa Mga Saksi ni Jehova. Bilang sarong tunay na Kristiano, nungka akong magadan para sa ano man na gobyerno o siisay man na tawo.” Huli kaiyan inabrasa sia kan kagharong asin nagsabi: “An gabos na paggadan sala. Marahay an ginigibo nindo. Ipadagos nindo iyan.”

An Kahulogan kan Pagtubod sa Ngaran ni Jesus

Minsan siring, an kahulogan kan pagtubod sa ngaran ni Jesus bako sanang dai pakikiguerra. Nangangahulogan iyan nin pagkuyog sa gabos na togon ni Cristo. Total, si Jesus nagsabi: “Kamo an mga katood ko kun gibohon nindo an mga pagboot ko sa saindo,” asin saro sa mga togon nia na kita “magkaminorootmootan.” (Juan 15:​14, 17) An pagkamoot naghihingoang gumibo nin marahay sa iba. Hinahale kaiyan an gabos na rasyal, relihioso, asin sosyal na prehuwisyo. Ipinaheling ni Jesus kun paano.

An mga Judio kaidtong kaaldawan ni Jesus kontrang marhay sa mga Samaritano. Sa kabaliktaran, nakipag-olay si Jesus sa sarong Samaritana, asin bilang resulta, sia asin an dakol na iba pa nagtubod sa ngaran nia. (Juan 4:​39) Sinabi man ni Jesus na an saiyang mga disipulo magigin mga saksi nia “sa Jerusalem asin sa bilog na Judea asin Samaria patin sagkod sa kaporoporohi kan daga.” (Gibo 1:8) An nagtataong buhay na mensahe nia dai lilimitaran sa mga Judio sana. Huli kaiyan, si Pedro pinagbotan na songkoon an Romanong senturyon na si Cornelio. Minsan ngani bakong sono sa ley na an sarong Judio magsongko sa saro na iba an rasa, ipinaheling nin Dios ki Pedro na “dai [nia] maninigong apodon na maramog o maati an siisay man.”​—Gibo 10:28.

Bilang pag-arog ki Jesus, an Mga Saksi ni Jehova gikan sa boot na nagtatabang sa gabos na tawo​—ano man an saindang rasa, relihion, o kamugtakan sa pagbuhay—​na manodan an dapit sa kaligtasan na nakakamtan paagi sa ngaran ni Jesus. An pagtubod sa ngaran ni Jesus nagpapahiro sa sainda na ‘magpahayag sa publiko na si Jesus Kagurangnan.’ (Roma 10:​8, 9) Sinasadol mi kamo na akoon an saindang tabang tanganing makanood man kamo na magtubod sa ngaran ni Jesus.

An ngaran ni Jesus maninigo nanggad na magpamate nin onra, paggalang, asin pagkuyog. Si apostol Pablo nagsabi: “Sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga, asin an lambang dila hayag na magmidbid na si Jesu-Cristo iyo an Kagurangnan para sa kamurawayan nin Dios na Ama.” (Filipos 2:​10, 11) Minsan ngani tibaad habo kan mayoriya kan mga nag-eerok sa daga na magpasakop sa pamamahala ni Jesus, ipinaheheling kan Biblia na harani na an panahon na an gabos na tawo kaipuhan na gibohon iyan o malaglag. (2 Tesalonica 1:​6-9) Kun siring, ngonyan na an panahon na magtubod sa ngaran ni Jesus paagi sa pag-otob sa gabos niang togon.

[Nota sa Ibaba]

[Retrato sa pahina 6]

Sa ngaran ni Jesus, minilyon an guminadan asin ginadan

[Retrato sa pahina 7]

Si Jesus dai nagtanom sa boot nin rasyal na prehuwisyo. Iyo man daw kamo?