Dakol an Naghihingakong May Pagtubod
“SI Jesus makangangalas! Pambihira nanggad sia!” an kagsing nin sarong relihiosong babae sa Brazil. Tunay nanggad, dai manenegaran an kapangyarihan kan ngaran ni Jesus. Sa bilog na kasaysayan, may mga tawong andam na nagdusa asin nagadan para sa saiya.
An mga apostol na si Pedro asin Juan naghulit ‘basado sa ngaran ni Jesus’ sa Jerusalem. Huli sa paggibo kaiyan, sinda inarestar asin hinampak. Pero sinda “naghale sa Sanhedrin, na naggagayagaya huli ta pinapagkanigo sinda na magtios nin kasopganan huli sa saiyang ngaran.”—Gibo 5:28, 41.
Si Antipas saro pang Kristiano kan enot na siglo na halangkaw an pagheling sa ngaran ni Jesus. Sa ultimong libro kan Biblia, an Kapahayagan, inapod sia ni Jesus na “an sakuyang saksi, an sarong fiel, na ginadan sa kataed nindo, sa pinag-eerokan ni Satanas.” (Kapahayagan 2:13) Kaiba kan iba pang Kristiano sa Pergamo, si Antipas nagsayumang deharan an saiyang pagtubod ki Cristo. Pinangaptan nin higot ni Antipas an ngaran ni Jesus dawa mawara an saiya mismong buhay!
Pakalihis nin mga kabangang siglo, kan 155 C.E., an sarong naghihingakong Kristiano na an ngaran Policarpo napaatubang sa kaagid na pagbalo kan sia pagbotan na mudahon si Cristo. An saiyang simbag: “Otsenta y sais na taon akong naglingkod sa Saiya, asin mayo Siang ginibong maraot sa sako. Paano ko malalanghadan an sakong Hade na nagligtas sa sako?” Huli sa saiyang pagsayumang deharan si Cristo, si Policarpo sinolo sa harigi.
An mga apostol, si Antipas, asin iba pa andam na patunayan an saindang patotoo manongod ki Cristo paagi sa kagadanan! Kumusta man an mga tawo ngonyan?
An Ngaran ni Jesus Ngonyan
An ngaran ni Jesus padagos na nagpupukaw nin makosog na mga emosyon. Sa Latin Amerika, an pag-oswag kan mga iglesia na naghihingakong nagtutubod ki Jesus marikason sa nakaagi pa sanang mga dekada. Maski sa kasaditsaditing mga baryo igwa nin simbahan nin Pentecostal. Kadungan kaiyan, nag-ooswag man an politikal na impluwensia kan siring na mga iglesia. Halimbawa, sa Kongreso asin Senado kan Brazil, 31 puesto an okupado kan mga miembro kan mga iglesiang ini.
Si Jesus man an pinakasentro nin sarong bagong mobimiento nin relihion sa Estados Unidos. An apod kan mga parasunod kaiyan sa saindang sadiri Mga Paraotob nin Panuga. An magasin na Time nagbareta kan 1997 na an bilang kan mga nag-aatender sa saindang mga pagtiripon nag-oswag poon sa 4,200 kan 1991 sagkod sa 1.1 milyon kan 1996. An saro sa mga himno kaiyan nagsasabi: “Ay kapangganahan ki Jesus, sakong Paraligtas sagkod lamang.”
Minsan siring, bakong gabos na sentimiento na napukaw kan ngaran ni Jesus nagin noble. An bandera nin guerra parateng binibiklad sa saiyang ngaran. An mga Judio ginadan nin lagdoan, an mga pagano ginaradan, an mga nagkokontra pinadusahan, pinutolan nin mga parte nin hawak, asin sinolo sa harigi—gabos sa ngaran ni Jesus. Asin mas bago pa sana, nabantog na ginigibong negosyo an pag-ebanghelyo. An gabos na ini maraot asin makababaldeng salang paggamit kan ngaran ni Jesus asin sa talagang irinerepresentar kaiyan!
Apuera kaini, minapalataw iyan nin nagkapirang pertinenteng hapot: Ano an kalabot sa pagtubod sa ngaran ni Jesus? Asin ano an punto de vista kan Mga Saksi ni Jehova sa bagay na ini? Sisimbagon kan sunod na artikulo an mga hapot na ini.