An Napapalaen na mga Problema nin mga Pamilya na May Bakong Kadugo
POSIBLE AN MAOGMANG MGA PAMILYA NA MAY BAKONG KADUGO! PAANO?
An pamilya na may bakong kadugo nagin kumon na klase nin kasararo sa harong sa dakol na parte kan kinaban. Pero, an mga pamilya na may bakong kadugo igwa nin napapalaen na mga problema. An pinakamasakit daing duwa-duwa na iyo an pagpadakula sa aki. Minsan siring, arog kan pagmamaigotan na ipaheling kan minasunod na duwang artikulo, posible na mapadakula nin mapanggana an mga aki sa sarong pamilya na may bakong kadugo.
NAKAUGALEAN NANG BAKONG MARAHAY AN MGA SINASABI MANONGOD SA MGA PADRASTO ASIN madrasta. Kan kita aki pa, an dakol sa sato nakadangog nin bersion kan eroestorya dapit ki Cinderella, na makuri an inagihan sa kamot kan saiyang maringis na madrasta. Nanodan man kan mga aki sa Europa an eroestoryang Snow White and the Seven Dwarfs. An madrasta ni Snow White saro palan na maraot na aswang!
An siring daw na mga eroestorya nagtatao nin tamang punto de vista dapit sa mga pamilya na may bakong kadugo? An gabos daw na padrasto o madrasta talagang maraot na marhay? Dai. Mawot sana kan kadaklan sa sainda an pinakamarahay para sa mga aki na minana ninda sa pag-agom. Alagad talagang kaipuhan na atubangon ninda an nagkapirang masakit na problema na katambay na nin buhay sa pamilyang may bakong kadugo.
An mga Problema nin Pagpadakula sa Aki
Kun masudya an enot na pag-agom, an dahelan parateng an pagkabakong maygurang kan mag-agom. Sa ikaduwang pag-agom, an pagtratar sa mga aki puedeng makaraot sa relasyon. May mga rekord na nagpapaheling na labing 4 sa 10 pamilya na may padrasto o madrasta an natatapos sa diborsio sa laog kan enot na limang taon.
Tibaad dai narerealisar kan mga bagong kasal an emosyonal na karibarawan, pagkakatumang nin kaimbodan, asin an pakamate nin pag-imon asin hinanakit kan mga aki kan agom sa enot huli sa pag-abot kan padrasto o madrasta. Tibaad honaon kan mga ini na an padrasto o madrasta na an mas padangat kan saindang tunay na magurang. Apuera kaiyan, an sarong tunay na magurang na binayaan nin agom tibaad masakitan na saboton an dai nahahaleng pagkadayupot kan mga aki duman sa dating agom. Prinobaran nin sarong aking lalaki na ipaliwanag an saiyang marahay na relasyon sa saiyang tunay na ama, na nagsabi, “Nanay, aram ko na maraot an nagin pagtrato sa saindo ni Tatay, alagad nagin marahay sia sa sako!” An siring na kapahayagan, minsan ngani onesto, puedeng magin dahelan na an ina maanggot nin makuri sa ama kan aki.
An sarong padrasto nagtuga: “Talagang dai ako andam na atubangon an gabos na problema na konektado sa pagpadakula sa mga aki kan sakong agom sa enot. Linaog ko an situwasyon na iyan na iniisip ko na ngonyan na pinakasalan ko na an saindang ina, ako na an saindang ama. Siring iyan kaiyan kasimple! Dai ko sinabot an pagkadayupot kan mga aki sa saindang tunay na ama, asin kadakol akong sala.”
Puedeng lumataw an mga tension nangorogna kun manongod sa disiplina. Kaipuhan kan mga aki an mamomoton na disiplina, alagad parate na tinutumang ninda iyan dawa kun iyan hale sa tunay na magurang. Orog pa nanggad na masakit na akoon iyan hale sa sarong padrasto o madrasta! Sa parate, kun napapaatubang sa siring na disiplina, an sarong aki kan agom sa enot masabi nin arog kaini, “Bako ka man talaga an ama ko!” Biyong nakapanluluya nanggad an siring na mga tataramon para sa sarong padrasto na may marahay na intension!
Mapapadakula daw nin mapanggana an mga aki sa sarong pamilya na may padrasto o madrasta? Puede daw na magkaigwa nin positibong papel an mga padrasto o madrasta sa pagtogdok nin sarong mapangganang pamilya na may bakong kadugo? An simbag sa duwang hapot na iyan iyo kun an gabos na kalabot nagsusunod sa hatol na yaon sa ipinasabong na Tataramon nin Dios, an Biblia.
[Retrato sa pahina 3]
“Bako ka man talaga an ama ko!”