‘Mga Laad nin Interes sa Puso Asin Isip’

“Dai ikapapahayag nin mga tataramon an kagayagayahan asin kaogmahan na padagos na nagtatalubo mantang ginaganahan akong basahon an Is There a Creator Who Cares About You? Talagang pinupukaw kaiyan sa saro an kamawotan—bako, an pangangaipo—na makanood nin orog pa. Salamat sa pagpalaad nin interes sa sakong puso asin isip.”

IYAN an saboot nin saro sa Mga Saksi ni Jehova na taga Carolina del Norte, E.U.A., manongod sa libro na ilinuwas kan Watch Tower Society sa “Sa Dios na Dalan nin Buhay” na Pandistritong mga Kombension kan 1998/99. Dawa kun mayo kamo nin kopya kan libro, helinga nindo an iba pang reaksion.

Pirang aldaw an nakaagi pakatapos na akoon an saiyang kopya sa kombension sa San Diego, California, E.U.A., an sarong lalaki nagsurat: “Para sa sako nakapakokosog na marhay sa pagtubod an librong ini. Pinapano kaiyan an sakong puso nin hararom na apresasyon sa mga paglalang ni Jehova. Yaon na ako sa pahina 98, asin habo kong antisiparon an aldaw na makakaabot ako sa poro! Nakakokontento nanggad na kagayagayahan iyan.”

An sarong babaeng taga Oriente nagsurat: “An espiker sa kombension ginamit an pananaram na ‘sarong daing kaagid na libro,’ asin an pananaram na iyan talagang tamang-tama sa laog kaiyan. An sarong pambihirang karakteristiko iyo na dai ipinipirit kan libro sa nagbabasa an pag-eksister nin Dios, pero iinaatubang kaiyan an mga katunayan.”

Kabale sa mga katunayan an interesanteng gayo na sientipikong mga diskobremiento manongod sa satong uniberso, sa buhay, asin sa sato. Dakol an naghanga digdi. “Talagang mayo akong masabi tanganing ipahayag kun gurano kararom kan epekto sa sako kan sadit na librong ini,” an isinurat nin sarong babaeng taga California. “Dai ko mabutasan an libro ta an kada pahina nagladawan nin orog pang naghahayag na mga diskobremiento manongod sa satong uniberso asin sa buhay mismo. Talagang kadakol akong nanodan! Pahahalagahan kong marhay an sadit na librong ini asin ihihiras iyan sa pinakadakol na mapupuede.”

An sarong karakteristiko na ikinaogmang marhay nin dakol iyo an pagkasumaryo kan librong ini sa Biblia, na itinatampok an personalidad kan Kaglalang. “An punto de vista sa kabilogan kan Biblia, na iinatubang sa likod kan libro, saro sa pinakamarahay na nabasa ko,” an sarong tipikong komento. Pakatapos tolos kan sarong naenot na kombension sa Nueva York, E.U.A., may saro pang nagsurat: “An bagong luwas siertong iyo an pinakakawiliwiling publikasyon na inimprenta nindo. Naatraer ako sa sientipikong mga prueba na igwa nin Kaglalang. An halipot pero malaman na sumaryo kan Biblia mismo igo na tanganing ipaliwanag an mga punto asin magin pan-abre-gana na magbasa nin orog pa.”

Nasasabotan na Siensia

An sientipikong impormasyon sa enot na mga kapitulo tibaad garo baga masakit na marhay na saboton, alagad uya an tipikong mga reaksion.

An sarong lalaking taga Canada nagsurat: “Kabaliktaran na marhay sa teknikal na mga libro na an mga autor naghihingoang pahangaon kita paagi kan saindang kahangahangang mga tataramon. Marahayon an saindong odok na pag-adal tanganing gibohon na madaling marhay na masabotan niamo an mga tema sa pisika, kimika, DNA, cromosoma, asin iba pa. Kutana kamo an nagsurat kan mga libro sa unibersidad na pinag-adalan ko kaidtong dakol nang taon an nakaagi!”

An sarong propesor sa pisika sa sarong unibersidad nagsurat: “Malinaw na iinaatubang [kaiyan] an mga isyung kalabot na dai naghahaloy sa teknikal na detalye. An libro nangangatanosan sa nagbabasa asin kinokotar an dakol na pangenot na sientista. Ini ‘mahalagang basahon’ nin siisay man na interesado sa ginikanan kan uniberso asin buhay, magsalang bilang sarong sientista o bilang lego.”

An sarong hoben na babae na nag-aadal nin kursong pagigin nars nagkomento: “Dai ako makapaniwala sa sakong mga mata na mabuksan sa kapitulo 4 asin mabasa an sarong kotasyon hale sa libro na ginagamit mi sa klase! Itinao ko an libro sa samong propesor asin sinabi ko sa saiya na aram kong maoogma sia sa impormasyon. Ipinaheling ko sa saiya an pahina 54 manongod sa hotok. Binasa nia iyan nin silensio asin nagsabi, ‘Interesante ini! Eestudyaran ko ini.’”

An sarong miembro nin parlamento sa Belhika nagsurat: “An nakagulat sa sako asin nakaatraer sa sako iyo an sientipikong pahayag na nagdodoon na an siensia sa presenteng panahon bakong sarongat sa ipinaririsa kan Biblia na pagtubod na saro sana an Dios kundi, imbes, iyan minaoyon dian. Ini sarong risang marhay na punto de vista.”

Pakamidbid nin Orog Pa sa Kaglalang

Tinabangan kan libro an mga tawo sa dakol na kadagaan na mamidbid nin orog pa an Dios asin makamateng mas dayupot sa saiya. An sarong parabasa sa Siudad nin Fukuoka, Hapon, nagsabi: “Garo baga an mga lente eksaktong nakapokus ki Jehova sa kaenot-enote. An libro nakakokombensir sa makangangalas na paagi. Namidbid ko si Jehova gikan sa punto de vista na dai ko noarin man pinaghona sagkod ngonyan.” An sarong taga El Salvador nagsurat: “Ipinaliliwanag nindo nin malinaw na marhay kun gurano kamaheherakon, kamaugayon, kaluway sa pagkaanggot, asin kaabunda sa mamomoton na kabootan an Dios. Tunay na ini nanggad an kaipuhan mi tanganing magin mas dayupot sa saiya asin sa saiyang Aki. Ini an enot na libro na nagpapaliwanag kan mga saboot ni Jehova asin kan sa tawong mga pagmate kan saiyang Aki, si Jesus.” Asin an sarong parabasa sa Zambia nagkomento: “Si Jehova nagkaigwa nin biyong bagong kahulogan para sa sako.”

Siempre, an Mga Saksi ni Jehova naoogmang ihiras sa iba an Is There a Creator Who Cares About You? An saro nagsabi: “Mantang tinatapos kong basahon an kapitulo 10 [“If the Creator Cares, Why So Much Suffering?”], mayo nanggad akong magibo kundi kumagsing, ‘Ini nanggad an libro na kaipuhan mi sa Hapon!’ Gusto kong isapuso an materyal na nasa kapitulong ini asin gamiton iyan nin orog pa sa paglilingkod sa langtad.” An saro pang babae tinotokdoan sa Biblia an sarong aking babae na pinadakula sa templo kun saen an saiyang ama an padi duman. “Nasakitan siang akoon an ideya dapit sa Kaglalang. Mayong dogmatiko sa paliwanag kan librong ini, alagad yaon an mga katunayan, kaya sa paghona ko maski mga Budista dai mag-aalangan na basahon iyan. Orog pang ipinamamate man kaiyan sa sato an pagkamoot ni Jehova.”

Hale sa Inglaterra an komentong ini: “Katatapos ko pa sana kan librong Creator asin mapoon na akong basahon liwat iyan. Abaa kamakangangalas na libro! An saro kamomotan sana si Jehova kun binabasa iyan. Tinawan ko na nin saro an sakong kataed, na pakabasa nin duwa sanang kapitulo nagsabi, ‘Dai ko mabutasan iyan, nakaoogmang marhay iyan.’ Segurado ako na tatabangan kaini an mga tawo na mamidbid asin kamotan an satong Kaharohalangkaweng Kaglalang.”

An sarong lalaki sa Maryland, E.U.A., nagsabi: “Iyan talagang tuminaros sa sakong espirituwal na mga tolang asin hotok! Plano kong tawan nin kopya an gabos na tawong nakakatransaksion ko sa negosyo. Kun minsan nasasakitan akong ponan na magpatotoo sa siring na sibot, edukadong mga tawo. Paagi kan librong ini maaaraman ko na ngonyan an nakaaakit, epektibong pagdolok.”

Malinaw nanggad, an librong Is There a Creator Who Cares About You? magkakaigwa nin positibong epekto sa mga tawo sa bilog na daga.

[Pasasalamat para sa pinagkuanan kan retrato sa pahina 25]

Nasa itaas na retrato sa tutob, Eagle Nebula: J. Hester asin P. Scowen (AZ State Univ.), NASA