An Satong Kaharohalangkaweng Kaglalang May Pagmakolog sa Sato!
1 Sa paghihingoa niang makipangatanosan sa suwayan na Israel, si Jehova naghapot: “Ano dai mo naaraman o dai mo nadangog? Si Jehova, an Kaglalang kan mga kaporoporohi kan daga, Dios sagkod sa daing talaan na panahon.” (Isa. 40:28) Midbid niato an satong Kaharohalangkaweng Kaglalang, asin naheheling niato an saiyang mamomoton na pagmakolog sa sato. Minsan siring, minilyon an nagdududa sa pag-eksister nia o may ideya manongod sa saiya na bakong kapareho kan yaon sa Biblia. Paano niato sinda matatabangan?
2 An bagong librong Is There a Creator Who Cares About You? dinisenyo na tumabang sa siring na mga tawo. Inaagda kaiyan an mga intelihente na mangatanosan sa mga katunayan. An kawiliwiling materyal asin nakabebensir na mga argumento sa librong ini siertong makaaakit sa mga nagbabasa kaiyan.
3 Magin Pamilyar sa Librong Creator: Isaisip an pundamental na sumaryo kan mga laog kaiyan. Ipinaliliwanag kan kapitulo 2 sagkod 5 kun paano nag-eksister an uniberso, buhay, asin tawo asin kun ano an nasa likod kan gabos na iyan. Sinisiyasat kan kapitulo 6 sagkod 9 an Biblia saka an Autor kaiyan asin, sa partikular, kun baga mapagtitiwalaan an rekord kan Genesis sa paglalang. Itinatao kan kapitulo 10 an nakakokontentong simbag sa saro sa pinakanakariribong na hapot nin tawo: “Kun an Kaglalang may pagmakolog, taano ta grabe an pagdusa?”
4 Pagmaigotan na Makipangatanosan sa mga Nagdududa: Iinaatubang kan pahina 78-9 sa librong Creator an pangangatanosan na puede nindong gamiton sa pagtabang sa iba na makaabot sa tamang konklusyon dapit sa Dios. Hapoton sinda: “May kapinonan daw an uniberso?” An kadaklan maoyon na igwa. Kun iyo, ihapot: “An kapinonan daw na iyan mayo nin ano man na nagpangyari o iyan daw pinangyari?” Rinerekonoser nin kadaklan na iyan pinangyari. Ini minagiya pasiring sa ultimong hapot: “An kapinonan daw kan uniberso pinangyari nin sarong bagay na daing sagkod o nin sarong Persona na daing sagkod?” An pamamaaging ini puedeng makamotibar sa dakol na masabotan na seguradong igwa nin Kaglalang.
5 An librong Creator an talagang kaipuhan nin dakol. Ipaabot iyan sa saindong mga paryente, katrabaho, kaeskuela, asin iba pang kamidbid. Darahon nindo iyan sa ministeryo tanganing ikapasakamot nindo iyan sa mga nanunuparan nindo na nagdududa manongod sa pag-eksister nin Dios. Mientras na orog kitang nagigin pamilyar sa librong ini, mas magigin makosog man an satong pagkamoot sa satong Kaglalang, na pinahihiro kita na padagos na lumakaw oyon sa saiyang halangkawon na mga pamantayan.—Efe. 5:1; Kap. 4:11.