Paghanap nin Mapagtitiwalaan na mga Prediksion
PAKATAPOS tolos na an hade nin Macedonia na namidbid bilang si Alejandrong Dakula tumukaw sa trono kan 336 B.C.E., sinongko nia an templo sa Delphi, sa Grecia sentral. An saiyang ambisyosong mga plano para sa ngapit kongkistaron nanggad an dakol na parte kan kinaban kan panahon na idto. Alagad gusto niang masierto sa Dios na an saiyang dakulaon na gigibohon magigin mapanggana. Segun sa leyenda, kan aldaw na magsongko sia sa Delphi, dai itinotogot kaidto an pakihumapot sa orakulo. Habong maghale na mayong simbag, nag-insistir si Alejandro, kaya napiritan an saserdotesa na magtao nin prediksion. Nagkurahaw an saserdotesa sa pagkadesganar: “Ay, aki, ika daing kadaogan!” Inisip kan hoben na hade na iyan sarong paborableng tanda—tanda na malalaoman an mapangganang kampanya militar.
Minsan siring, nagkaigwa kutana nin orog na kabatidan si Alejandro manongod sa resulta kan saiyang kampanya kun saiyang siniyasat an mga hula na yaon sa libro kan Biblia na Daniel. May pambihirang pagkaeksakto, ihinula kaiyan an saiyang marikas na mga pagkongkistar. Sinasabi sa tradisyon na pag-abot nin panahon nagkaoportunidad si Alejandro na maheling an isinurat ni Daniel manongod sa saiya. Segun sa Judiong historyador na si Josefo, kan an hade nin Macedonia maglaog sa Jerusalem, ipinaheling sa saiya an hula ni Daniel—posibleng marhay na an kapitulo 8 kan librong iyan. (Daniel 8:5-8, 20, 21) Huli daa kaini, an siudad dai linaglag kan mga hukbo ni Alejandro.
Sarong Natural na Pangangaipo nin Tawo
Hade o ordinaryong tawo, suanoy o sa presente—namatean nin tawo an pangangaipo para sa mapagtitiwalaan na mga prediksion mapadapit sa ngapit. Bilang intelihenteng mga linalang, kitang mga tawo pinag-aadalan ta an nakaagi, aram ta an presente, asin nangorognang interesado kita sa ngapit. An sarong talinhagang Intsik angay na nagsasabi: “Sia na kayang patienot na maheling an mga mangyayari tolong aldaw bago pa magigin mayaman sa rinibong taon.”
Sa bilog na mga panahon, minilyon an nagprobar na aramon an ngapit paagi sa pakihumapot sa pinaghohona ninda na may pagkasa-dios. Halimbawa an suanoy na mga Griego. Kadakol nindang sagradong templo, arog kan mga yaon sa Delphi, Delos, asin Dodona, na dinudumanan ninda tanganing ihapot sa saindang mga dios an dapit sa politikal o militar na mga pangyayari siring man an personal na mga bagay na arog kan pagbiahe, pag-agom, asin mga aki. Bako sanang mga hade asin lider sa militar kundi bilog na mga tribo asin estadong siudad an naghagad nin giya sa rona nin mga espiritu paagi sa mga orakulong ini.
Segun sa sarong propesor, sa ngonyan “biglang nagdakol an mga organisasyon na dusay sa pagsiyasat kan ngapit.” Pero, dakol an mas gustong ignorohon an solamenteng eksaktong gikanan nin hula—an Biblia. Dai nanggad ninda inaako an ano man na posibilidad na yaon sa mga hula kan Biblia an mismong impormasyon na hinahanap ninda. May mga intelektuwal na ipinapareho pa ngani an hula kan Biblia sa mga prediksion na itinao nin suanoy na mga orakulo. Asin an mga mapagduda sa presenteng aldaw parateng kontra sa hula kan Biblia.
Inaagda mi kamo na siyasaton nindo mismo an rekord. Ano an ihinahayag kan maingat na pagkomparar kan mga hula sa Biblia asin kan mga orakulo nin tawo? Puede daw nindong pagtiwalaan an hula kan Biblia nin orog kisa suanoy na mga orakulo? Asin may kasarigan daw nindong magigibo na pangenot sa saindong buhay an mga hula kan Biblia?
[Retrato sa pahina 3]
Ihinula kan Biblia an marikas na mga pagkongkistar ni Alejandro
[Pasasalamat para sa pinagkuanan]
Cortesía del Museo del Prado, Madrid, España
[Retrato sa pahina 4]
Si Alejandrong Dakula
[Pasasalamat para sa pinagkuanan]
Musei Capitolini, Roma
[Pasasalamat para sa pinagkuanan kan retrato sa pahina 2]
COVER: General Titus and Alexander the Great: Musei Capitolini, Roma