Taano ta Kakadikit kan Panahon?

PANAHON. Tibaad depisil para sa sato na ipaliwanag nin eksakto an kahulogan kan tataramon na iyan, alagad tunay nanggad na aram niato na garo baga dai kita noarin man nagkakaigwa nin igong panahon. Aram man niato na iyan marikas na minalihis. Sa katunayan, sa parate kita nag-aagagha, “Dai mo naririparo na marikason na minaagi an panahon.”

Minsan siring, risang-risa na mas tama an Ingles na poeta na si Austin Dobson kan sabihon nia kaidtong 1877: “An panahon minalihis, an sabi nindo? A bako! Ay, an Panahon nagdadanay, kita dai.” Poon kan sia magadan kan 1921, si Dobson haros 80 taon nang mayo; an panahon nagpapadagos.

Abundang Panahon

Mapadapit sa Kaglalang sa katawohan, an Biblia nagsasabi sa sato: “Bago pa man namundag an mga bukid, o paluwason mo na garo may kolog sa pangangaki an daga asin an mabungang kinaban, minsan poon sa panahon na daing katapusan sagkod sa panahon na daing katapusan ika iyo an Dios.” (Salmo 90:2) O siring kan traduksion kan The New Jerusalem Bible, “poon sa panahon na daing sagkod sagkod sa panahon na daing sagkod ika iyo an Dios.” Kaya an panahon magpapadagos sagkod na yaon an Dios—sagkod lamang!

Laen na gayo sa Dios, na igwa nin panahon na daing sagkod, mababasa niato mapadapit sa mga tawo: “Huli ta an gabos ming aldaw natapos huli kan saimong kabangisan; tinapos niamo an samong mga taon na garo hinghing. An mga aldaw nin samong mga taon pitong polong taon; asin kun huli sa espesyal na kakosogan iyan walong polong taon, alagad an saindang pagdadanay nasa kasakitan asin makolog na mga bagay; huli ta iyan kaipuhan na marikas na umagi, asin kami minalupad.” —Salmo 90:9, 10.

Taano an buhay ngonyan ta halipoton, mantang malinaw na itinotokdo kan Biblia na katuyohan nin Dios na an tawo mabuhay sagkod lamang? (Genesis 1:27, 28; Salmo 37:29) Imbes na daing limite na lawig nin buhay siring kan katuyohan nin Dios, taano an mga tawo sa promedyo ta, sa pinakamarahay na kamugtakan, igwa sana nin dai pang 30,000 na aldaw? Taano an tawo ta kakadikit kan panahon? Siisay o ano an responsable sa makamomondong situwasyon na ini? An Biblia nagtatao nin klaro asin nakakokontentong mga simbag.a

Pakadikit Nang Pakadikit na Panahon

An mga gurang na mapatunay na sa kasuarin pa sanang mga dekada orog na nagrikas an dalagan nin pamumuhay. An sarong peryodista, si Dr. Sybille Fritsch, nagsabi na durante kan nakaaging 200 na taon, an lawig nin trabaho sa sarong semana buminaba poon 80 sagkod sa 38 oras, “pero dai kaini nahale an satong pagreklamo.” Saiyang lininaw: “Kulang an panahon; an panahon kuarta; an grabeng pangangaipo nin panahon kapareho nin pangangaipong humangos; sarong pamumuhay na dai maaraman kun ano an hihidaleon.”

An bagong mga imbension binuksan an mga oportunidad asin posibilidad na dai noarin man naisipan kan naenot na mga henerasyon. Alagad mantang nagdadakula an posibilidad sa paggibo nin kadakoldakol na aktibidad, nadudugangan man an pagkasudya kan mawot huli sa kakadikit na panahon na gibohon iyan. Ngonyan na mga aldaw, sa dakol na parte kan kinaban, an mga tawo namumuhay na estrikto sa iskedyul, na hinihidale an kadakol na talaan. Si Tatay kaipuhan na maghale nin alas 7:00 n.a. pasiring sa trabaho, si Nanay kaipuhan na ihatod sa eskuelahan an mga aki pag-alas 8:30 n.a., si Lolo nakaiskedyul na padoktor sa alas 9:40 n.a., asin kami gabos kaipuhan na andam na para sa mahalagang pagtiripon sa alas 7:30 n.b. Huli sa paghihidale tanganing aboton an kadakol na talaan, haros mayo na nin panahon na natatada para sa ano man na pagpahorohayahay. Asin kita nagrereklamo manongod sa nakasusumong rutina aroaldaw, manongod sa nakapapagal na trabaho.

Dai Kita Nagsosolo sa Pagigin Kakadikit kan Panahon

An Kaiwal nin Dios, si Satanas na Diablo, na an pakana kaini nagbunga na mainaan an lawig nin buhay kan katawohan, nagin biktima ngonyan kan sadiri niang karatan. (Ikomparar an Galacia 6:7, 8.) Nagtataram manongod sa pagkamundag kan Mesiyanikong Kahadean sa langit, an Kapahayagan 12:12 nagtatao sa sato nin dahelan para sa paglaom kan iyan magsabi: “Huli kaini mag-ogma, kamo kalangitan asin kamo na nag-eerok dian! Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.”

Segun sa masasarigan na kronolohiya sa Biblia asin sa kaotoban kan hula sa Biblia, kita nabubuhay na ngonyan sa paghinanapos kan ‘halipot na panahon’ na iyan. Kanigoan na kagayagayahan na maaraman na matatapos na kompletamente an panahon na si Satanas nabubuhian! Oras na sia dakopon na, an makinuyog na mga tawo ibabalik sa pagkasangkap, asin puede nindang kamtan an buhay na daing katapusan na katuyohan para sa sainda ni Jehova kan kapinonan. (Kapahayagan 21:1-4) An kakulangan nin panahon dai na magigin problema.

Naiimahinar daw nindo kun ano an magigin kahulogan nin pagkaigwa nin buhay na daing katapusan—mabuhay sagkod lamang? Dai na kamo noarin man pasasakitan kan mga bagay na kaipuhan nindong bayaan na dai tapos. Kun kaipuhan nindo an dugang pang panahon, igwa nin nuodma, o sunod na semana, o sunod na taon—sa katunayan, halawigon na panahon na daing sagkod an nasa enotan nindo!

Madonong na Paggamit kan Panahon na Nasa Sato Ngonyan

Biyong naaaraman na limitado an saiyang panahon na impluwensiahan an mga tawo, hinihingoa ni Satanas na pagdanayon na sibot an mga tawo kaya mayo na sindang panahon na maghinanyog sa maogmang bareta kan Kahadean nin Dios na naestablisar na. Kun siring, marahay kun hihimateon niato an hatol nin Dios: “Magmaan kamong marhay na an saindong paglakaw bakong siring sa mangmang kundi siring sa mga madonong, na tinutubos an angay na panahon para sa saindo man sana, huli ta an mga aldaw maraot. Kaya dai na kamo magin bakong makatanosan, kundi padagos na saboton kun ano an kabotan ni Jehova.”—Efeso 5:15-17.

Mahalaga nanggad na gamiton niato nin madonong an satong panahon para sa mga bagay na pinakamahalaga imbes na sayangon iyan sa daing serbing mga okupasyon na dai nagtatao nin nagdadanay na pakinabang! Maninigo niatong kultibaron an iyo man sanang aktitud ni Moises kan maghagad sia ki Jehova paagi sa odok sa pusong mga tataramon na ini: “Tokdoi kami kun paano bibilangon an samuyang mga aldaw sa paagi na magkamit kami nin puso na may kadonongan.”—Salmo 90:12.

Totoo, sa kinaban ngonyan an gabos sibot. Minsan siring, marigon kamong sinasadol kan Mga Saksi ni Jehova na gamiton an nagkapira sa saindong mahalagang marhay na panahon na manodan an manongod sa mga kahagadan nin Dios tanganing kamtan an buhay na daing katapusan na sakop kan pamamahala kan saiyang Kahadean. An sarong oras kada semana na ginagamit sa sistematikong pag-adal sa Biblia, na ‘sinasabot kun ano an kabotan ni Jehova,’ tibaad magpangyari na personal nindong maeksperyensiahan an kaotoban kan mga tataramon na ini: “Humarayo ka sa maraot asin gibohon mo an marahay, asin ta mabuhay ka sagkod sa panahon na daing katapusan. An mga matanos mismo magmamana kan daga, asin sinda mag-eerok dian sagkod lamang.”—Salmo 37:27, 29.

[Nota sa Ibaba]