Sinisimbag kan Biblia an Mahalagang Marhay na mga Hapot sa Satong Kaaldawan

PERTINENTE daw sa ngonyan an Biblia? Tanganing iyo an magin simbag, segurado na an haloyon nang libro na ini kaipuhan na makatao sa mga nagbabasa kaiyan nin giya dapit sa mga topiko na pinagkakainteresan asin pertinente sa ngonyan. An Biblia daw nagtatao nin kapakipakinabang na hatol dapit sa mga tema na totoong may importansia sa presenteng kinaban?

Siyasaton ta an duwang isyu sa presente. Sa paggibo kaiyan, sisiyasaton ta an sinasabi kan Biblia manongod sa mga bagay na ini.

Taano ta Tinotogotan nin Dios an Pagdusa?

Huli sa mga kamugtakan sa kinaban ngonyan, ini an saro sa pinakaparateng ihinahapot: Taano ta tinotogotan nin Dios na magdusa an mga tawong daing sala? May katanosan an hapot na ini, huling padakol nang padakol na tawo an nagigin apektado nin madahas na krimen, karatan, paglaglag sa sarong rasa, personal na trahedya, asin iba pa.

Halimbawa, kan Hunyo 1998 an sarong marikas na tren buminangga sa sarong tulay sa amihanan na Alemania, na ikinagadan nin labing sanggatos na pasahero. Maski an eksperyensiadong mga mediko asin bombero na nag-asikaso sa mga erido asin gadan napungot dahelan sa mga nagadan. An sarong obispo kan Iglesia Ebangheliko naghapot: “Mahal na Dios, Taano ta kaipuhan na mangyari ini?” An obispo mismo daing ikasimbag.

Ipinaheheling nin eksperyensia na kun an mga tawong daing sala nag-aagi nin karatan na daing nakukuang paliwanag manongod sa causa kaiyan, kun beses nagpapait an saindang boot. Digdi makatatabang an Biblia, ta ipinaliliwanag kaiyan kun taano an mga tawong daing sala ta nag-aagi nin karatan asin pagdusa.

Kan lalangon ni Jehova Dios an daga asin an gabos na yaon dian, bako niang intension na an katawohan mapurisaw sa karatan asin pagdusa. Paano niato naseseguro? Huli ta kan matapos an saiyang paglalang, “naheling nin Dios an gabos niang ginibo asin, uya! idto marahayon.” (Genesis 1:31) Hapota an saindong sadiri, ‘Kun may maheling akong sarong bagay na maraot, sasabihon ko daw na iyan “marahayon”?’ Siempre dai! Sa kaagid na paagi, kan sabihon nin Dios na an gabos “marahayon,” mayo kaidto ni kadikit na karatan sa daga. Kaya kasuarin asin paano nagpoon an karatan?

Dai nahaloy pakalalanga sa satong enot na mga magurang, si Adan asin Eva, an sarong makapangyarihan na espiritung linalang nagdolok sa babae asin kinuestion an pagsabi nin totoo ni Jehova asin an katanosan kan saiyang soberaniya. (Genesis 3:1-5) An linalang na ini, si Satanas na Diablo, kan huri nag-alegar na an mga tawo dai magdadanay na maimbod sa Dios sa irarom nin kasakitan. (Job 2:1-5) Ano an nagin reaksion ni Jehova sa situwasyon na ini? Pinalihis nguna nia an panahon tanganing maheling nin malinaw na dai kaya nin mga tawo na mapangganang giyahan an saindang lakad na independiente sa saiya. (Jeremias 10:23) Kun an mga linalang minagawe nin kontra sa mga ley asin prinsipyo nin Dios, an resulta kasalan, na nagbubunga nin nakararaot na mga kamugtakan. (Eclesiastes 8:9; 1 Juan 3:4) Minsan siring, sa ibong kan masakit na mga kamugtakan na ini aram ni Jehova na may mga tawo na magdadanay an integridad sa saiya.

Poon kan makaturotristeng rebelyon na iyan sa Eden, mga 6,000 na taon na an uminagi. Halawigon daw iyan? Puede kutanang linaglag ni Jehova si Satanas asin an mga suportador nia kaidtong dakol nang siglo an nakaagi. Alagad bako daw na mas marahay na maghalat sagkod na mahale an gabos na maiisip na pagduda manongod sa pagigin tanos kan soberaniya ni Jehova asin sa integridad nin mga tawo sa saiya? Bako daw na totoo man iyan sa hudisyal na mga sistema sa presente na dakol na taon an tibaad kaipuhan tanganing mapatunayan nin sarong korte kun siisay an tama asin kun siisay an sala?

Huli sa importansia kan mga isyu na napapaatubang ki Jehova asin sa katawohan—an unibersal na pagkasoberano asin an integridad nin mga tawo—madonong nanggad para sa Dios na palihison nguna an panahon! Malinaw na naheheling niato ngonyan kun ano an nangyayari kun iniignoro nin mga tawo an mga ley nin Dios asin sinasadiri an sainda mismong mga gibo-gibo. An resulta lakop na karatan. Asin iyan an dahelan kun taano ta kadakol na tawong daing sala an nagdudusa ngonyan.

Pero marahay sana ta sinasabi kan Tataramon nin Dios na an karatan dai magdadanay sagkod lamang. An totoo, sa dai na mahahaloy tataposon ni Jehova an karatan asin an mga may kagibohan kaiyan. “Kun dapit sa mga maraot,” an sabi kan Talinhaga 2:22, “sinda popohoon sa mismong daga; asin kun manongod sa mga madaya, sinda hahaleon dian.” Sa ibong na lado, an mga fiel sa Dios makalalaom sa sarong panahon, na ngonyan harani na, na “an kagadanan mawawara na, dai na sagkod magkakaigwa nin pagmondo ni pagtangis ni kolog.”—Kapahayagan 21:4.

Kaya, kun siring, malinaw na ipinaliliwanag kan Biblia kun taano an mga daing sala ta nagdudusa. Sinisierto man kaiyan sa sato na madali nang matapos an karatan asin pagdusa. Minsan siring, mantang inaagihan niato an mga kasakitan sa buhay sa presente, kaipuhan niato an simbag sa saro pang mahalagang marhay na hapot.

Ano an Katuyohan nin Buhay?

Posible na ngonyan orog kisa kasuarin pa man na panahon sa kasaysayan nin katawohan, an mga tawo naghihingoang aramon kun ano man nanggad an katuyohan nin buhay. An dakol naghahapot sa saindang sadiri, ‘Taano ta nabubuhay ako? Paano ako makanonompong nin kahulogan sa sakong buhay?’ Laen-laen na situwasyon an dahelan kan pagbangon ninda kan mga hapot na ini.

An buhay nin saro tibaad maapektaran na marhay nin sarong personal na trahedya. Halimbawa, sa kapinonan nin 1998 an sarong 12 anyos na aking babae sa Bavaria, Alemania, kinidnap asin ginadan. Pakalihis nin sarong taon, inadmitir kan ina kaini na aroaldaw hinahanap nia an kahulogan nin buhay—na daing nangyari. An nagkapirang hoben napahihirong mag-isip-isip manongod sa kahulogan nin buhay. Naghahanap sinda nin seguridad, satispaksion, asin pakamate nin dayupot na relasyon, tangani sanang madesesperar sa lakop na pagsaginsagin asin karatan. An ibang mga tawo isinesentro an saindang buhay sa karera, alagad nadidiskobre ninda na an poder, prestihio, asin rogaring dai napaninigoan an panlaog na paghimuyawot na manompongan an dahelan kan saindang pag-eksister.

Ano man an nagpapahiro sa saro na maghapot manongod sa katuyohan nin buhay, an hapot na ini maninigo sa seryoso asin nakakokontentong simbag. Sa giraray, dakula an puedeng itaong pakinabang kan Biblia. Ipinamimidbid kaiyan si Jehova bilang Dios na may katuyohan, saro na may marahay na mga dahelan para sa gabos niang ginigibo. Ihapot niato, Matogdok daw kamo nin harong na mayo nin dahelan? Posibleng marhay na dai, huling an pagtogdok nin harong nagkakaipo nin dakulang kapital na kuarta asin puedeng aboton nin dakol na bulan o taon. Matogdok kamo nin harong tanganing maistaran nindo o nin iba. An iyo man sanang lohika puedeng iaplikar ki Jehova. Dai sia nagpagal na lalangon an daga asin an nabubuhay na mga bagay dian na mayo nin dahelan, nin katuyohan. (Ikomparar an Hebreo 3:4.) Ano an katuyohan nia para sa daga?

An hula sa Isaias ipinamimidbid si Jehova bilang an “totoong Dios, an Naghaman kan daga asin an Naggibo kaiyan.” Tunay nanggad, sia “an Saro na masarig na nagbugtak [kan daga], na dai iyan linalang na dai nin kapakanan, na naghaman kaiyan tanganing pag-istaran.” (Isaias 45:18) Iyo, poon pa kan lalangon an daga, katuyohan na kaidto ni Jehova na pag-istaran iyan. An sabi kan Salmo 115:16: “Kun manongod sa kalangitan, an kalangitan rogaring ni Jehova, alagad an daga itinao nia sa mga aki nin mga tawo.” Sa siring ipinaheheling kan Biblia na linalang ni Jehova an daga tanganing pag-istaran nin makinuyog na mga tawo, na maataman kaiyan.—Genesis 1:27, 28.

Nagin dahelan daw an pagrebelde ni Adan asin Eva tanganing liwaton ni Jehova an saiyang katuyohan? Dai. Paano kita nakasesegurong gayo? Bueno, horophoropa an puntong ini: An Biblia isinurat rinibong taon pakalihis kan rebelyon sa Eden. Kun tinalikdan nin Dios an saiyang orihinal na katuyohan, taano ta dai iyan sinabi sa Biblia? An malinaw na konklusyon iyo na an saiyang katuyohan para sa daga asin katawohan dai naliwat.

Dugang pa, an katuyohan ni Jehova nungkang nasusudya. Paagi ki Isaias, itinatao nin Dios an garantiyang ini: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan tookon an daga asin papangyarihon iyan na magbunga asin magtubo, asin tawan nin banhi an parasabwag asin nin tinapay an makakan, magigin siring man an sakong tataramon na magluwas sa sakong ngoso. Dai iyan mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.”—Isaias 55:10, 11.

Kun Ano an Linalaoman sa Sato nin Dios

Malinaw, kun siring, puede kitang magkompiar sa kaotoban kan katuyohan nin Dios na an daga pag-istaran sagkod lamang nin makinuyog na mga tawo. Kun boot niatong makabilang sa mga may pribilehiong mabuhay nin permanente sa daga, dapat niatong gibohon an sinabi kan madonong na si Hadeng Salomon: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”—Eclesiastes 12:13; Juan 17:3.

An pamumuhay kaoyon kan katuyohan ni Jehova para sa katawohan nangangahulogan nin pakamidbid sa tunay na Dios asin pagsunod sa saiyang mga kahagadan na yaon sa Banal na Kasuratan. Kun gigibohon niato ini ngonyan, mapapasato an paglaom na buhay na daing katapusan sa sarong paraisong daga, na dian nungka kitang mapondo sa pakanood nin bagong mga bagay manongod sa Dios asin sa saiyang makangangalas na mga linalang. (Lucas 23:43) Kanigoan kanakapupukaw sa boot na paglaom!

An dakol na naghahanap nin katuyohan sa buhay nagkokonsulta sa Biblia asin nakanonompong nin dakulang kaogmahan ngonyan mismo. Halimbawa, an sarong hoben na lalaki na an ngaran Alfred daing manompongan na kahulogan sa buhay. Ikinabalde nia an pagkaimbuelto nin relihion sa guerra, asin nauyam sia sa pagsaginsagin asin karatan sa politika. Dinumanan ni Alfred an mga Indian sa Amerika del Norte sa paglaom na makakua nin kaliwanagan manongod sa katuyohan nin buhay, tangani sanang bumalik sa Europa na desganado. Sa pagkadesesperar, sia nagdroga asin naggamit nin daing kontrol na musika. Minsan siring, an regular asin maingat na pagsiyasat sa Biblia sa huri nakatabang ki Alfred na maaraman an tunay na katuyohan nin buhay asin makanompong nin pagkakontento.

Sarong Masasarigan na Liwanag sa Satong Dalan

Ano, kun siring, an ikakokonklusyon niato manongod sa Biblia? Iyan daw pertinente sa ngonyan? Iyo nanggad, huli ta iyan nagtatao nin giya dapit sa mga isyu sa presente. Ipinaliliwanag kan Biblia na an karatan bakong kagibohan nin Dios asin tinatabangan kita kaiyan na makanompong nin nakakokontentong katuyohan sa buhay. Saro pa, an Biblia dakol na sinasabi dapit sa iba pang mga bagay na interesanteng marhay ngonyan. An mga topiko na arog kan pag-agom, pagpadakula sa mga aki, relasyon sa mga tawo, asin paglaom para sa mga gadan ipinaliliwanag sa Tataramon nin Dios.

Kun dai pa nindo iyan nagibo, tabi siyasaton nin maingat an laog kan Biblia. Oras na madiskobre nindo an tunay na halaga kan mga giya kaiyan para sa buhay, puedeng mamatean nanggad nindo an namatean kan salmista na nagsarig ki Jehova Dios para sa giya asin nag-awit: “An saimong tataramon ilawan sa sakong bitis, asin liwanag sa sakong dalan.”—Salmo 119:105.

[Retrato sa pahina 6]

Aram daw nindo kun taano ta tinotogotan nin Dios na magdusa an mga daing sala?

[Retrato sa pahina 7]

Puede kamong magkaigwa nin makatuyohan na buhay