Bareta kan mga Parabalangibog kan Kahadean

Paghanap sa mga Tawo sa Saindang Pinagtatrabawohan

SA ANO magkakapareho si apostol Mateo, Pedro, Andres, Santiago, asin Juan? Sinda gabos inapod ni Jesus kan sinda yaon sa pinagtatrabawohan ninda. Si Pedro, Andres, Santiago, asin Juan sibot sa saindang negosyo nin paninira kan agdahon sinda ni Jesus, na nagsasabi: “Sumunod kamo sa sako.” Si Mateo yaon sa opisina nin buwis kan agdahon na magin disipulo ni Jesus.​—Mateo 4:18-21; 9:9.

An paghuhulit sa mga tawo sa pinagtatrabawohan ninda puedeng magin nakakokontento. Rinerekonoser ini, an mga Saksi ni Jehova sa Hapon naggibo kasuarin pa sana nin sigidong paghihingoa na magpartisipar sa kabtang na ini kan ministeryo. Ano an nagin resulta? Sa laog nin pira sanang bulan, rinibong pagdalaw liwat an nagibo, asin mga 250 pag-adal sa Biblia an naponan. Estudyare an minasunod na mga eksperyensia:

Nanuparan nin sarong bilog na panahon na ministro sa Tokyo an sarong manedyer sa restawran na may nakaolay nang Saksi mga 30 taon na an nakaagi kan sia nag-eeskuela pa. Maski daing gayo nasabotan kan manedyer an napag-olayan kaidto, sia talagang nagkainteres sa Biblia. Ngonyan na napukaw liwat an saiyang interes, tolos niang inako an sarong pag-adal sa Biblia na ginagamit an librong Kaaraman na Minagiya Pasiring sa Buhay na Daing Katapusan.a Dugang pa, pinonan nia an sarong personal na programa nin pagbasa sa Biblia kada banggi bago magtorog.

An sarong espesyal payunir na ministro nagdalaw sa sarong opisina. Minsan ngani mayo an manedyer, an hoben na babae na nagsimbag sa telepono kan manedyer naghapot, “Gusto nindong kaolayon ako?” Pagkatapos nin halipot na pag-oolay sa telepono, an babae nagluwas asin nagsabi na sia interesado sa pagbasa kan Biblia. Iinareglo kan espesyal payunir na magbuelta dara an Biblia asin pinonan an sarong pag-adal sa Biblia sa saiya, na ginigibo sa kaharaning parke sa amay na aga bago sia maglaog sa trabaho.

Sa saro pang opisina, naheling kan sarong lalaki an kapwa trabahador na nag-ako nin mga magasin na Torrengbantayan asin Awake! alagad tolos na iinapon iyan pagkahale kan Saksi. Kan mag-uli sa harong an lalaki, iinestorya nia sa agom niang Saksi an nangyari asin nagsabi na kun sia an inalokan kan magasin maski paano mahinanyog sia. An saiyang aking babae, na nadangog nin dai tinutuyo an saiyang mga sinabi, iinestorya iyan sa sarong Saksi na naghuhulit sa komersial na teritoryong iyan. Tolos-tolos na dinalaw kan Saksi an agom na lalaki sa opisina asin naponan an pag-adal sa Biblia sa saiya. An lalaki tolos na nagpoon na mag-atender nin regular sa mga pagtiripon kun Domingo.

An paghuhulit sa mga tawo sa pinagtatrabawohan nagbunga nin iba pang pakinabang. Dakol na parahayag sa Hapon an nagin matibay magdalaw liwat sa mga pamakalan, pabrika, asin opisina. Dugang pa, huli sa mga paaging ini nin paghuhulit, dakol na inaktibo an nakaolay asin naponan an mga pag-adal sa sainda. Pambihira an nagin mga resulta. An sarong kongregasyon sa sentro nin Tokyo nagreport kasuarin pa sana nin 108 pag-adal sa Biblia, labing doble sa kabilangan na irineport kan nakaaging taon.

[Nota sa Ibaba]