An Espiritu nin Pasko sa Bilog daw na Taon?
“Kamurawayan sa Dios sa kaitaasan, asin sa daga katoninongan sa mga tawo na igwa nin marahay na boot.”—Lucas 2:14.
MINILYON na tawo an pamilyar sa mga tataramon na ini kan mga anghel nin Dios na nagpapaisi kan pagkamundag ni Jesus sa mga pastor na nagbabantay sa saindang mga aripompon sa banggi. Durante kan panahon na hinihingako kan mga iglesia na namundag si Jesus, dakol na Kristiano sa ngaran an nagsasagibo nin espesyal na paghihingoa na pakarhayon an saindang gawe-gawe. An atension sa panahon na iyan na itinatao sa kagayagayahan, katoninongan, asin marahay na boot—mga kualidad na nasambitan sa ibinabalangibog kan anghel—parateng inaapod na espiritu nin Pasko.
An siring na positibong mga saboot nakakaakit dawa sa mga tawo na mayo nin relihiosong kahulogan para sa sainda an Pasko. Inaapresyar man ninda an pagkamamomoton na garo baga pinapalakop kan selebrasyon. Kun an Pasko nangangahulogan nin bakasyon sa eskuelahan o trabaho, an kapiestahan nagtatao sa mga tawo nin oportunidad na magpahorohayahay, magtagama nin panahon na makaiba an saindang mga pamilya asin katood, o basta mag-ogma sana. Siempre, an dakol na sinserong tawo sa pangenot ibinibilang an Pasko na panahon na tawan nin onra si Jesu-Cristo.
Ano man na kahulogan an itao ninda sa Pasko, tolos na aadmitiron kan kadaklan na an ano man na positibong mga saboot na bunga kan kapiestahan sa parate temporaryo sana. An mga tawo tolos na minabalik sa saindang normal na paagi nin gawe-gawe. An sarong komposisyon na may titulong “An Espiritu nin Pasko,” na ipinublikar kan Royal Bank of Canada, nagsabi: “An kadakol na ‘Kristiano’ sa konsepto sana kualipikado sa deskripsion na iyan sa laog nin pira sanang semana kada taon, na nagpapaheling nin marahay na boot sa saindang mga kapwa sagkod na matapos an Bagong Taon, an panahon na puede na sindang bumalik sa saindang maimot na pag-eksister asin sa saindang pagkaindiperente sa kamugtakan nin ibang tawo.” An “talagang sala” sa espiritu nin Pasko, an pagpadagos kan surat man sanang iyan, iyo na an mga tawo mayo kaiyan “sa bilog na taon.”
Baga man kamo minaoyon sa pag-analisar na iyan o dai, iyan talagang nagbabangon nin mahahalagang hapot. Mahihimo pa daw kan mga tawo na permanenteng magpaheling nin pagkabuka nin palad asin pagsabot sa lambang saro? Igwa daw nin ano man na realistikong paglaom na maootob an ibinalangibog kan mga anghel kan bangging namundag si Jesus? O pangatorogan daw sana an paglaom sa tunay na katoninongan?