Sarong Kasangkapan na Makakatabang sa mga Hoben na Girumdomon an Saindang Kaglalang

“GIRUMDOMA nindo an saindong Kaglalang mantang hoben pa kamo,” an isinurat kan madonong na si Salomon mga 3,000 na taon na an nakaagi. (Ecl. 12:1, Marahay na Bareta Biblia) An Kristianong mga hoben ngonyan igwa na nin saro pang kasangkapan na makakatabang sa sainda na gibohon iyan. An librong Questions Young People Ask—Answers That Work, Volume 2, ilinuwas sa “Ginigiyahan kan Espiritu nin Dios” na mga Pandistritong Kombension kan Mga Saksi ni Jehova, na ginibo sa bilog na kinaban poon Mayo 2008 sagkod Enero 2009.

Yaon sa likod kan tutob kan libro an sarong surat para sa mga hoben hale sa Namamahalang Grupo. Sa sarong kabtang, iyan nagsasabi: “Odok niamong pamibi na an impormasyon sa publikasyon na ini logod na makatabang sa saindo na paglabanan an mga panggigipit asin sugot na napapaatubang sa mga hoben ngonyan asin na ikapaheling kaiyan sa saindo kun paano gumibo nin mga desisyon na kaoyon kan kabotan nin Dios.”

Tama sanang mawoton nin mga magurang na padakulaon an saindang mga aki “sa disiplina asin pagtatanos nin isip gikan ki Jehova.” (Efe. 6:4) Minsan siring, kun nagtitinedyer na, dakol na hoben an nawawaran nin kompiansa sa sadiri asin nagmamawot nanggad nin paggiya. Kun kamo magurang nin sarong tinedyer, paano nindo matatabangan an saindong aki na makinabang nin lubos sa publikasyon na ini? An minasunod nagkapirang suhestion.

▪ Kumua nin sadiri nindong kopya kan librong ini asin magin lubos na pamilyar dian. An kalabot digdi orog pa sa pagbasa sana kaiyan. Pagmaigotan man na maintindihan kun paano iprinesentar kan libro an mga ideya. Imbes na basta sana sabihon sa mga hoben kun ano an tama asin kun ano an sala, katuyohan kan libro na sanayon an saindang “mga kakayahan sa pagrisa.” (Heb. 5:14) Tinatawan man sinda kaiyan nin praktikal na mga suhestion kun paano maninindogan sa kun ano an tama. Halimbawa, an Kapitulo 15 (“How Can I Resist Peer Pressure?”) dai sana basta nagsasabi sa mga hoben na sayumahan an panggigipit nin kairiba. Sinasambit man kaiyan an basado sa Bibliang mga pamamaagi asin realistikong mga reaksion na makakatabang sa sainda na manodan kun paano “sumimbag sa lambang saro.”—Col. 4:6.

▪ Gamiton an mga kabtang kan libro na nagdadagka na ipahayag an saboot. Minsan ngani an mga kabtang na ini dinisenyo para sa mga hoben, taano ta dai suratan an sadiri nindong kopya kun puede man sana?a Halimbawa, kun ineestudyaran an duwang hapot sa pahina 16, na hinahagad an saboot nin saro dapit sa pakikipag-date, probaran nindo na girumdomon an saindong namatean kan kamo man tinedyer pa. Sa espasyong itinagama, gugustohon gayod nindo na isurat an isisimbag kutana nindo kaidto sa mga hapot na iyan. Dangan puede nindong hapoton an saindong sadiri: ‘Paano nagbago an sakuyang saboot sa bagay ini sa pag-agi nin mga taon? Anong kabatidan an sakong nakua poon kan sakong pagkatinedyer, asin paano ko iyan epektibong ikakapasabot sa aki ko?’

▪ Igalang an pribadong buhay kan saindong aki. An mga kabtang kan libro na nagdadagka na ipahayag an saboot dinisenyo tanganing engganyaron an saindong aki na sumimbag magsalang paagi sa pagsurat o sa saiyang isip sana. An saindong pasohan iyo na masiyasat an laog kan saiyang puso, bakong an laog kan saiyang libro. Sa pahina 3 kan seksion na “A Note to Parents,” an libro nagsusuherir: “Tanganing an hoben na mga aki nindo madagka na isurat sa saindang libro kun ano talaga an nasa boot ninda, ipaheling na ibinibilang nindo na pribadong gamit ninda iyan. Paghaloyhaloy tibaad ipakipag-olay ninda sa saindo an mga isinurat ninda.”

Sarong Pantabang sa Pampamilyang Pag-adal sa Biblia

An Young People Ask, Volume 2, sarong marahayon na pantabang na magagamit sa saindong Pampamilyang Pagsamba. Mantang an libro mayo nin parapo por parapong mga hapot para sa pag-adal, paano nindo iyan magagamit? Taano ta dai ibagay an estilo nin pag-adal na ginagamit an paaging pinakaepektibo sa saindong mga aki?

Halimbawa, puedeng ikaogma nin nagkapirang pamilya an pagkaigwa nin mga sesyon sa pag-ensayo kun pinag-oolayan an “Peer-Pressure Planner” sa pahina 132 asin 133. An enot na hapot dian puedeng makatabang sa saindong aki na aramon kun anong panggigipit an sa paghona nia depisilon atubangon. An katuyohan kan ikaduwang hapot iyo na aramon an situwasyon kun saen posibleng gayo na mangyari an panggigipit. Pagkatapos na estudyaran an mga epekto magsalang nin pagpadaog o nin paglaban sa panggigipit nin kairiba, an saindong aki hinahagadan na magplano nin nagkapirang simbag na magsalang sasalohon, sasagangon, o ibabalik an panggigipit. Tabangan an saindong aki na magin mapamaagi asin na mag-andam nin mga simbag na magigin komportable para sa saiya saka magagamit nia nin may kompiansa asin kombiksion.—Sal. 119:46.

Sarong Kasangkapan Para sa Komunikasyon

An Young People Ask, Volume 2, nagdadagka sa mga hoben na makikomunikar sa saindang mga magurang. Halimbawa, an mga kahon na “How Can I Talk to Dad or Mom About Sex?” (pahina 63-64) asin “Talk to Your Parents!” (pahina 189) nagtatao nin praktikal na mga suhestion kun paano ipapakipag-olay an sensitibong mga tema. Sarong 13 anyos na daragita an nagsurat, “An librong ini nagtao sa sako nin kosog nin boot na ipakipag-olay sa mga magurang ko an mga bagay na nasa sakong isip—dawa an mga bagay na ginibo ko.”

Pinapaoswag man kan librong ini an komunikasyon sa iba pang paagi. Sa katapusan kan kada kapitulo igwa nin kahon na “What Do You Think?” Labi pa sa sarong repaso, puede iyan na gamiton bilang basehan para sa pag-orolay nin pamilya. Harani sa katapusan kan kada kapitulo, yaon man an kahon na “Action Plan!” An kahon na ini nagtatao sa mga hoben nin oportunidad na isurat an espesipikong mga paagi na ikakaaplikar ninda an saindang nanodan sa kapitulong iyan. An huring kabtang kan kada kahon na “Action Plan!” nagsasabi: “An gusto kong ihapot sa sakong (mga) magurang manongod sa temang ini iyo an . . . ” Makakatabang iyan sa mga hoben na mag-asa sa saindang mga magurang para sa mahalagang sadol.

Taroson an Puso!

Bilang magurang, an pasohan nindo iyo na taroson an puso kan saindong aki. An Young People Ask, Volume 2, makakatabang sa saindo na gibohon iyan. Estudyare kun paano nagamit nin sarong ama an librong ini tanganing paoswagon an odok sa pusong komunikasyon sa saiyang aking babae.

“May magagayon na lugar na duman gustong-gusto mi ni Rebekah na maglakawlakaw, magbisikleta, o mamasyar na nakalunad sa auto. Nadiskobre ko na sa arog kaining mga kamugtakan ikinakapahayag nia an saiyang saboot.

“An enot na kabtang na pinag-olayan mi sa librong ini iyo an surat hale sa Namamahalang Grupo asin an ‘A Note to Parents.’ Gusto kong maaraman kan sakong aki na siring kan sinambit sa pahina 3, puede siang magsurat sa saiyang libro na dai nag-aalangan. Dai ko hehelingon an isinurat nia.

“Si Rebekah an pinapili ko kan mga kapitulo na gusto niang pag-olayan mi oyon sa pagkasunodsunod na gusto nia. An saro sa enot na mga kapitulo na pinili nia iyo an ‘Should I Play Electronic Games?’ Dai ko lamang hohonaon kaidto na iyan an pipilion nia! Minsan siring, igwa sia nin dahelan. Dakol sa mga katood nia an nagkakawat nin medyo makatatakot na video game. Mayo ako nin ideya sa hayag na kadahasan asin bastos na pananaram na nasa kawat na iyan! Alagad gabos ini naglataw kan samong pag-olayan an “Action Plan!” sa pahina 251. An kahon na iyan nakatabang man ki Rebekah na mag-andam nin simbag enkaso may magprobar na gipiton sia na magkawat kaiyan.

“Ngonyan, dai na nag-aalangan si Rebekah na sabihon sa sako an mga isinurat nia sa saiyang libro. Dagos-dagos an pag-oolay mi durante kan pag-adal mi. Nagsasarosalida kami sa pagbasa, dangan gusto na niang ipakipag-olay an gabos na yaon sa libro, kabale an mga retrato asin kahon. Nagtao ini sa sako nin oportunidad na sabihon sa saiya kun ano an mga kamugtakan kan ako tinedyer pa, dangan sasabihon man nia kun ano an mga kamugtakan ngonyan. Gusto nanggad niang sabihon an gabos!”

Kun kamo sarong magurang, daing duda na napukaw an saindong puso kan iluwas an librong ini. May oportunidad kamo ngonyan na gamiton iyan nin epektibo. Linalaoman kan Namamahalang Grupo na an Questions Young People Ask—Answers That Work, Volume 2, magigin sarong bendisyon sa saindong pamilya. Logod na makatabang iyan sa gabos—nangorogna sa satong namomotan na mga hoben—na ‘padagos na maglakaw segun sa banal na espiritu.’—Gal. 5:16.

[Nota sa Ibaba]

[Kahon sa pahina 30]

Kun Ano an Sinasabi nin Nagkapirang Hoben

“Ini an klase nin libro na tatawan mo nin panahon mantang kapot an sarong lapis, asin babasahon mo na may paghorophorop. Huling iyan dinisenyo na siring sa sarong personal na diary, iyan magagamit sa pribadong paghorophorop na an pasohan iyo na magkaigwa ka kan pinakamarahay na pamumuhay.”—Nicola.

“Grabe an panggigipit sa sako na makipag-date, dawa kan mga tawong may marahay na intension. An enot na seksion kan librong ini nakakombensir sa sako na minsan ano pa an sabihon nin siisay man, dai pa ako andam na makipag-date.”—Katrina.

“An kahon na ‘Are You Thinking of Getting Baptized?’ nakatabang sa sako na orog pang seryosohon an sakong bautismo. Minotibar ako kaiyan na ebalwaron giraray an sakong ugale sa pag-adal asin pamibi.”—Ashley.

“Minsan ngani tinokdoan ako kan sakong Kristianong mga magurang poon kan aki pa ako, natabangan ako kan librong ini na mangatanosan sa sadiri ko manongod sa mga maninigo kong gibohon sa sakong buhay. Natabangan man ako kaiyan na magin mas andam na makipag-olay sa sakong mga magurang.”—Zamira.

[Ritrato sa pahina 31]

Mga magurang, magin lubos na pamilyar sa librong ini

[Ritrato sa pahina 32]

Gibohon nindong pasohan na taroson an puso kan saindong aki