Pagtabang sa mga Hobenes na Malikayan an Kalamidad
1 Minamawot ni Jehova na kita maggayagaya sa buhay. Sa bagay na iyan, tinogotan nia kita na magkaigwa nin grado nin katalingkasan tanganing gibohon an mga pagmawot kan satong puso. Alagad kairiba kan katalingkasan na iyan, tama sanang papanimbagon kita ni Jehova sa ginigibo niato.—Ecl. 11:9.
2 Mantang kita mga bakong sangkap, paano niato malilikayan an kalamidad? (Ecl. 11:10) Posible daw na minsan an daing eksperyensiang mga hobenes makalikay sa kalamidad? Iyo. Si Jehova mamomoton na nagtao nin sadol asin paggiya tanganing matabangan kapwa an mga hoben asin mga gurang na makaligtas sa nag-oorog na mga kasakitan sa mga huring aldaw na ini.—Sal. 19:7; 119:9; 2 Tim. 3:1.
AN PANINIMBAGAN KAN MGA MAGURANG
3 Kun nagkakaigwa nin kasakitan, an mga hobenes nangangaipo nin responsableng mga magurang na ‘mag-iitaas kan mga kamot na nagtotonton tanganing an pilay dai malapo, kundi maomayan.’ (Heb. 12:12, 13) Tanganing matabangan an saindang mga aki, an mga magurang maninigong sa panapanahon itanos an pag-isip kan saindang aki. Nangangaipo ini nin pakatios asin abilidad.
4 An mga magurang dai makababantay nin lubos sa saindang mga aki tumang sa maraot na mga impluwensia. Alagad paano mapaparigon an kaisipan kan aki? Paagi sa ‘padagos na pagpadakula saiya sa pagtatanos nin isip ni Jehova.’ (Efe. 6:4) Kalabot digdi an pampamilyang pag-adal, espirituwal asin moral na paggiya, angay na disiplina, asin marahay na halimbawa nin magurang.
5 An librong Questions Young People Ask—Answers That Work dinesenyo tanganing matabangan an mga hobenes. Nakatatabang man ini sa mga magurang na mangatanosan sa saindang mga aki manongod sa tamang mga pamantayan. Kun nakatanom an mga pagboot nin Dios sa isip asin puso kan aki, puwede ining magin impluwensia sa pagtanos. An pag-orolay kan pamilya sa bagong publikasyon na ini magpaparigon sa mga hobenes na malikayan an kalamidad.
6 Kan ilinuwas an librong ini sa mga kombension, pinakosog an mga magurang na gamiton ini bilang basehan para sa pag-orolay kan pamilya. Sa konklusyon nin lambang kapitulo igwa nin “Questions for Discussion.” Dai ini dinesenyo para sa parapo por parapong pag-adal. An lambang hapot nagkokobre nin saro o labi pang subtitulo. Tibaad pagmarhayon kan ibang padre de pamilya na konsideraron an mga hapot pakatapos basahon an bilog na kapitulo. An iba tibaad maghapot pakabasaha kan materyal na nasa katimbang na subtitulo.
PAGTABANG SA MGA HOBENES SA SATONG TERITORYO
7 An dakol na hobenes sa satong teritoryo may mga hapot siring kan kinonsiderar sa bagong librong ini. Kaya sa Hunyo itatampok niato an librong Young People Ask sa langtad. Tibaad mawoton nindong sabihon an siring kan minasunod:
8 “Parate niatong hinohona na an pagkabarobata an pinakamaogmang panahon sa satong buhay. Alagad makamomondo nakaheheling kita nin kadakol na mamondong mga hobenes ngonyan. Bako daw? [Pasimbagon.] An nagliliwat na mga pamantayan nagpangyari nin nariribong na kinaban na may kadakol na problema na nakaaapektar sa mga hobenes asin naghahale sainda nin kaogmahan. Saen sinda makakanompong nin mapananarigan na paggiya? [Pakomentohon.] Mangnohon kun ano an irinerekomendar kan Biblia sa Salmo 119:9. [Basahon.] Itinatampok kan Biblia an paninimbagan kan magurang sa pagtotokdo nin tama asin dangan pagtatao kan instruksion na ini sa Talinhaga 1:8. [Basahon.] Kaoyon kaini, an librong Questions Young People Ask—Answers That Work pano nin praktikal na paggiya na basado sa Biblia. Igwa man ini nin dakol na tunay sa buhay na mga eksperyensia na makatatabang sa mga hobenes na mapangganang atubangon an ngapit. [Itokdo an nagkapirang titulo nin kapitulo tanganing makapukaw nin interes.] Puwede kamong magkaigwa kan librong ini sa kontribusyon na ₱21.00 sana.”
9 Sierto nanggad na an bagong librong ini magtotokdo sa dakol pasiring sa pinaghahalean nin daing sagkod na kadonongan—an Biblia. Kanigoan kahalagang gamit para sa paggiya sa mga hobenes sa lubos na buhay ngonyan asin sa seguradong ngapit!—Ecl. 12:1.