Pag-aatubang kan Maogmang Bareta—Sa mga Hobenes
1 An modernong panahon na ini nagin masakiton na panahon para sa kagabsan na hobenes. Pero, kaidtong mga siglo na an nakaagi an sarong tawo na pinasabngan nin Dios nagsurat: “Paano lilinigan nin sarong barobata an saiyang dalan? Paagi sa pag-iingat sono sa saimong tataramon.” (Sal. 119:9) Totoo nanggad, an paggiya na basado sa Tataramon ni Jehova nagtatao nin pakinabang sa rinibong hobenes ngonyan.
2 Ngonyan an mga hobenes pasil na makadolok sa mahalagang burabod nin Makakasuratan na impormasyon na ipinublikar sa porma nin bagong libro, an Questions Young People Ask—Answers That Work. Ano an magigibo nindo tanganing magkaigwa kaiyan an mga hobenes sa saindong teritoryo o an mga hobenes sa eskuwelahan?
MAGPAHELING NIN INTERES SA MGA HOBENES
3 An pagkombensir sa mga hobenes na apresyaron an halaga kan Tataramon ni Jehova puwedeng magin sarong angat. (Helingon an Talinhaga 22:15.) Minsan siring, si apostol Pablo nagsabi: “Sa mga Judio ako nagin siring sa Judio, tanganing ako makadara nin mga Judio.” (1 Cor. 9:20) Siring man, an pagtabang sa mga hobenes na makanompong asin mag-apresyar sa kapakipakinabang na espirituwal na paggiya nagkakaipo na masabotan nindo an mga hobenes asin an saindang mga problema. Kaipuhan na an isipon nindo kun ano an pinagkakainteresan nin mga hobenes asin kun ano an problema ninda sa eskuwelahan o kun saen sinda nag-iistar o nagtatrabaho. Kun nagpapatotoo sa mga hobenes, an pakasabot na ini maninigong marisa sa saindong introduksion, sa saindong mga komento, asin sa saindong mga hapot. An lista nin mga laog sa bagong librong Young People Ask marahayon na pagkukuanan nin mga ideya sa kun ano an ipakikipag-olay. Paagi sa pagigin pamilyar sa mga temang ini, magkakaigwa kamo nin pagmansay sa kun ano an iniisip ngonyan nin dakol na hobenes.
KUN ANO AN MASASABI NINDO
4 Kun kaolay nindo an sarong hoben, magin makiamigo asin tratohon sia na may dignidad. Pakatapos nin pataratara, puwede nindong sabihon: “Nakikikabtang ako sa paglilingkod sa publiko sa pagtabang sa mga hobenes na arog mo na makaya an mga problema na inaatubang ninda sa komunidad na ini. Naeksperyensiahan mo na daw na sadolon kang gibohon an sarong bagay na habo mo man na gibohon? O may tendensia ka daw na kun beses gibohon an mga bagay huli sana sa ginigibo nin iba asin bakong huli sa sadiri mong kagustohan? Iniisip mo daw kun paano mo makakaya an siring na impluwensia nin mga kaedad?” Pakasimbag nia, buksan an libro sa kapitulo 9. Dangan sabihon: “Tabi helingon an sinasabi kan bagong librong ini sa pahina 77. [Basahon an angay na parapo.] Sa paghona mo daw makatatabang sa mga hobenes an pag-adal sa Biblia tanganing maatubang an problemang ini? [Pakomentohon.] Helinga an sinasabi kan Biblia sa Salmo 119:9. [Basahon.] Ipinaheheling kan librong ini kun paano makatatabang an Biblia sa mga hobenes na maatubang an masakit na mga situwasyon, arog kan nalilista sa lista nin mga laog. [Itao saiya an libro.] Saimo na iyan sa kontribusyon na ₱21.00.”
5 Si Jehova ‘habo na an siisay man malaglag.’ (2 Ped. 3:9) Kaiba digdi an mga hobenes. Minsan siring, dakol na hobenes an dai makaliligtas sa Armagedon. An satuya logod na mga paghihingoa na epektibong makapaghulit sa mga hobenes magbunga kan pagkaligtas nin dakol na hobenes, sa ikaoomaw ni Jehova.