Talaga daw na Pinapahalagahan Mo an Balaog nin Dios na Pag-agoman?
“Tawan logod kamo nin balaog ni Jehova, asin makanompong kamo nin pahingaloan balang saro sa harong kan saiyang agom na lalaki.” —RUT 1:9, NW.
HANAPON AN MGA SIMBAG:
Taano ta masasabi niato na pinahalagahan kan mga lingkod nin Dios kaidto an balaog nia na pag-agoman?
Taano ta masasabi niato na mahalaga ki Jehova an pagpili niato nin maaagom?
Anong konseho sa Biblia sa pag-agoman an gusto mong iaplikar sa saimong buhay?
1. Iladawan an reaksion ni Adan kan tawan sia nin agom.
‘INI ngonyan tolang nin sakuyang mga tolang, asin laman nin sakong laman. Ini ngangaranan na babae huli ta sa lalaki sia kinua.’ (Gen. 2:23) Kanigoan an kaogmahan kan enot na tawo, si Adan, na tinawan sia nin agom! Bako nanggad makangangalas na nakataram sia sa patulang paagi! Pagkatapos na patorogon ni Jehova nin nanok si Adan, linalang Nia an magayon na babaeng ini hale sa saro sa mga gusok kan lalaki. Kan huri nginaranan sia ni Adan na Eva. Pinagsaro nin Dios an duwa sa maogmang pag-agoman. Huling ginamit ni Jehova an mismong gusok ni Adan tanganing lalangon si Eva, mas dayupot si Adan asin Eva kisa sa siisay man na mag-agom sa presenteng panahon.
2. Taano ta nagigin dayupot an mga lalaki asin babae?
2 Sa saiyang dai mapapantayan na kadonongan, linalang ni Jehova an mga tawo na may kakayahan na makamate nin romantikong pagkamoot—na magpapadayupot sa mga lalaki asin babae. An The World Book Encyclopedia nagsabi: “An lalaki asin babae na nag-aagom naglalaom na magkaigwa nin seksuwal na relasyon asin na magdadanay an romantikong pagkaakit ninda sa lambang saro.” Totoo man iyan sa banwaan ni Jehova.
NAGPAPASALAMAT SINDA SA BALAOG NA PAG-AGOMAN
3. Paano nagkaigwa nin agom si Isaac?
3 An maimbod na si Abraham dakula an pagpahalaga sa pag-agoman. Kaya, sinugo nia an saiyang pinakamatuang lingkod pa-Mesopotamia tanganing magkua nin agom para ki Isaac. Marahay an nagin resulta kan pamibi kan lingkod na iyan. An may takot sa Dios na si Rebeca an nagin namomotan na agom ni Isaac asin nagkaigwa sia nin kabtang sa areglo ni Jehova sa pagpreserbar kan banhi ni Abraham. (Gen. 22:18; 24:12-14, 67) Dai niato maninigong ikongklusyon base digdi na an saro dapat mangreto—minsan ngani tibaad may marahay na intension—kun dai man iyan hinahagad sa saiya. Dakol na tawo ngonyan an nagsasadiring desisyon sa pagpili nin maaagom. Siempre, bako man an Dios an nagpipili nin maaagom nin saro, alagad gigiyahan nia an mga Kristiano sa bagay na ini asin sa iba pang aspekto nin buhay kun sinda mamimibi para sa tabang asin ginigiyahan kan saiyang espiritu.—Gal. 5:18, 25.
4, 5. Ano an nakakombensir sa saimo na an Sulamita asin an pastor may espesyal na namamatean sa lambang saro?
4 Habo kan magayon na Sulamita kan suanoy na Israel na piriton sia nin iba na magin saro sa dakol na agom ni Hadeng Salomon. Pinasumpa nia an mga aking babae nin Jerusalem na dai sia pagpukawon sa pagkamoot kun dai man nia iyan namamatean. (Awit ni Sal. 8:4) An Sulamita asin an sarong pastor may espesyal na namamatean sa lambang saro. An Sulamita mapakumbabang nagsabi: ‘Ako an burak sa Saron, asin an lirio sa mga kapantayan.’ Dangan nagsimbag an pastor: ‘Siring man sana kan lirio na yaon sa tahaw kan mga tunok, an sakuyang namomotan sa tahaw kan mga babae’! (Awit ni Sal. 2:1, 2) Tunay na namomotan ninda an kada saro.
5 Huling an Dios an pangenot na namomotan kan Sulamita asin kan pastor, magigin makosog nanggad an pag-agoman ninda. Sa katunayan, nagsabi an Sulamita sa saiyang namomotan na pastor: “Ibugtak mo ako bilang tatak sa saimong puso, bilang tatak sa saimong takyag; huli ta an pagkamoot siring kakosog kan kagadanan, an paghagad nin daing kasalak na debosyon siring karigon kan Sheol. An mga laad kaiyan mga laad nin kalayo, an laad ni Jah [huling hale iyan sa saiya]. An pagkamoot dai masisigbo nin dakol na tubig, ni ikakaanod iyan nin mga salog. Kun itatao nin sarong lalaki an gabos na mahahalagang bagay sa saiyang harong huli sa pagkamoot, siertong duduhagion iyan kan mga tawo.” (Awit ni Sal. 8:6, 7, NW) Bako daw na arog man kaiyan na pamantayan asin kapanugaan an maninigong asahan kan mga lingkod nin Dios sa agom ninda?
PAGPILI NA MAHALAGA SA DIOS
6, 7. Paano niato naaraman na mahalaga sa Dios an satong pagpili nin maaagom?
6 Mahalaga ki Jehova an pagpili mo nin maaagom. Kun dapit sa mga nag-eerok sa Canaan, pinagbotan an mga Israelita: ‘Dai ka makipagbalae sa sainda. Dai mo ipagtao an saimong aking babae sa saindang aking lalaki. Dai mo man ipaagom an saindang aking babae sa saimong aking lalaki. Huli ta papasukisukion an saimong aki sa hudian ko, asin maglilingkod sinda sa mga putik na dios; asin an kaanggotan ni Jehova malaad sa saindo, asin tutunawon ka sa madale sana.’ (Deut. 7:3, 4) Pakalihis nin mga siglo, ipinahayag kan saserdoteng si Esdras: ‘Kamo nagkasala huli ta nagkua kamo nin mga babaeng taga ibang banwaan, na sa siring na palakaw dinagdagan nindo an kasalan kan Israel.’ (Esd. 10:10) Asin sinabi ni apostol Pablo sa mga kapwa Kristiano: ‘An agom na babae nakagapos mantang buhay pa an saiyang agom. Alagad kun an agom na lalaki magadan, [libre] na sia sa pagpakasal sa kiisay man na pagmarahayon nia; dian sana sa Kagurangnan.’—1 Cor. 7:39.
7 Kun an sarong nagdusay na lingkod ni Jehova mag-agom nin bakong kapagtubod, magigin kasumbikalan ini sa Dios. An mga Israelita kan panahon ni Esdras guminawe na bakong maimbod paagi sa pag-agom nin ‘mga babaeng taga ibang banwaan,’ asin sala na probaran na paluyahon an puersa kan malinaw na sinasabi kan Kasuratan. (Esd. 10:10; 2 Cor. 6:14, 15) An Kristianong nag-agom nin bakong kapagtubod bakong arogan asin mayo nin tunay na pagpahalaga sa balaog nin Dios na pag-agoman. Kun gigibohon iyan nin sarong bautisado, sia puedeng mawaran nin mga pribilehio sa banwaan nin Dios. Asin magigin bakong rasonable na mag-asa nin mga bendisyon mantang inaadmitir sa pamibi, ‘Dios na Jehova, tinuyo kong suwayon ka, alagad bendisyonan mo pa man giraray tabi ako.’
ARAM KAN SATONG LANGITNON NA AMA AN PINAKAMARAHAY
8. Ipaliwanag kun taano ta maninigo niatong sunodon an paggiya nin Dios dapit sa pag-agoman.
8 Aram na marhay kan naggibo nin makina kun paano iyan nagpupunsionar. Kun kaipuhan na bilogon iyan, makakatao sia nin kaipuhan na mga detalye manongod dian. Paano kun baliwalaon niato an mga instruksion asin bilogon an mga piesa sa satong sadiring paagi? Posibleng marhay na magigin kapahapahamak an mga resulta—kun mapunsionar pa an makina. Bueno, tanganing magin maogma an pag-agoman, kaipuhan tang sunodon an mga instruksion ni Jehova, an Kagtugdas kaiyan.
9. Taano ta masasabi niato na nasasabotan ni Jehova an pakamate nin kapungawan saka an kaogmahan na posible sa pag-agoman?
9 Aram ni Jehova an gabos na manongod sa katawohan asin pag-agoman. Ginibo nia an tawo na may seksuwal na pangangaipo tanganing sinda magin ‘mabunga asin magdakol.’ (Gen. 1:28) Nasasabotan nin Dios an pakamate nin kapungawan, huling bago lalangon an enot na babae, sinabi nia: “Bakong marahay na magsolo-solo an tawo. Magibo ako nin sarong maninigong kaibahan niya na makakatabang saiya.” (Gen. 2:18, An Marahay na Bareta Biblia) Lubos man na aram ni Jehova an kagayagayahan na posible sa pag-agoman.—Basahon an Talinhaga 5:15-18.
10. Anong mga bagay an maninigong magin giya dapit sa seksuwal na relasyon nin Kristianong mga mag-agom?
10 Huli sa kasalan asin pagkabakong perpekto na ipinasa sa katawohan kan makasalan na si Adan, mayo nin perpektong pag-agoman ngonyan. Minsan siring, sa mga lingkod ni Jehova, an pag-agoman puedeng magresulta sa tunay na kaogmahan kun susunodon an Tataramon nin Dios. Halimbawa, estudyare an malinaw na konseho ni Pablo sa seksuwal na relasyon nin mag-agom. (Basahon an 1 Corinto 7:1-5.) Bakong kahagadan kan Kasuratan na an seksuwal na relasyon nin mag-agom para sana sa katuyohan na mangaki. Mapapanigoan nanggad kan siring na relasyon an emosyonal asin pisikal na pangangaipo. Alagad an bakong normal na mga gibo dai nanggad nakakapaogma sa Dios. Sa mahalagang aspektong ini kan buhay nin Kristianong mga mag-agom, daing duda na gugustohon nindang magin mapagpadangat, na nagpapahiling nin tunay na pagkaminootan. Asin siempre maninigong likayan ninda an ano man na gawe-gawe na ikakaanggot ni Jehova.
11. Paano binendisyonan si Rut sa paggibo kan mga bagay kaoyon kan pamamaagi ni Jehova?
11 An pag-agoman maninigong nakakagayagaya nanggad, bakong nakakamondo ni nakakapungot. An harong nin Kristiano nangorognang maninigo na magin lugar nin kapahingaloan asin katoninongan. Isip-isipa an nangyari mga 3,000 na taon na an nakaagi kan an may edad nang balo na si Noemi asin an nabalo niang mga manugang, si Orpa asin Rut, nagbabaklay hale sa Moab pa-Juda. Sinadol ni Noemi an duwa na bumalik na sa saindang mga kahimanwa. An Moabitang si Rut nagdanay na kaiba ni Noemi saka nagin maimbod sa tunay na Dios, asin sinierto sa saiya na sia ‘papakapanoon nin bayad ni Jehova, na sa irarom kan saiyang mga pakpak sia nagpapandong.’ (Rut 1:9; 2:12) Si Rut, na igwa nin dakulang pagpahalaga sa balaog nin Dios na pag-agoman, nagin agom kan may edad nang si Booz, na tunay na parasamba ni Jehova. Kun buhayon na liwat sa daga sa bagong kinaban nin Dios, sia maoogmang marhay na maaraman na nagin apoon sia ni Jesu-Cristo. (Mat. 1:1, 5, 6; Luc. 3:23, 32) Binendisyonan nanggad sia sa paggibo kan mga bagay kaoyon kan pamamaagi ni Jehova!
MADONONG NA KONSEHO PARA SA MAPANGGANANG PAG-AGOMAN
12. Saen makakakua an saro nin madonong na konseho sa pag-agoman?
12 Sinasabi sa sato kan Kagtugdas nin pag-agoman kun ano an kaipuhan niatong maaraman tanganing magin mapanggana iyan. Mayo nin tawo na makakapantay sa kadonongan nia. Pirmeng tama an Biblia, asin an solamenteng paagi na an siisay man makakatao nin madonong na konseho sa pag-agoman iyo an pagbasar sana kaiyan sa mga pamantayan na nasa Kasuratan. Halimbawa, pinasabngan si apostol Pablo na magsurat: “An lambang saro sa saindo mamoot sa saiyang sadiring agom na babae siring sa saiya man sana; asin an agom na babae matakot [“magkaigwa nin hararom na paggalang,” NW] sa saiyang agom na lalaki.” (Efe. 5:33) An siring na basado sa Biblia na konseho masasabotan nin maygurang na mga Kristiano. An hapot iyo ini, Iaaplikar daw ninda an Tataramon ni Jehova? Iaaplikar ninda iyan kun talagang pinapahalagahan ninda an saiyang balaog na pag-agoman.a
13. Ano an puedeng magin resulta kan dai pagsunod kan konseho sa 1 Pedro 3:7?
13 Dapat na trataron na may pagkamoot nin Kristianong agom na lalaki an saiyang agom. Si apostol Pedro nagsurat: ‘Kamo na mga agom na lalaki, siring man sumaro kamo sa saindong agom sono sa pakasabot, na galangan an babae, siring sa lalagan na mapapasaon, huling sia man kapwa paramana kan biyaya nin buhay; tanganing an saindong mga pamibi dai maolang.’ (1 Ped. 3:7) Puedeng maolang an mga pamibi nin agom na lalaki kun dai nia iinaaplikar an konseho ni Jehova. Posibleng marhay na maapektaran an espirituwal na kamugtakan nin mag-agom, na puedeng magresulta sa grabeng tension, iriwal, asin karingisan.
14. Ano an puedeng magin impluwensia nin mamomoton na agom na babae sa buhay pampamilya?
14 An agom na babae na ginigiyahan kan Tataramon ni Jehova asin kan banal na espiritu kadakol an magigibo tanganing an saiyang harong magin lugar nin katoninongan asin kaogmahan. Natural sana para sa may takot sa Dios na agom na lalaki na kamotan an saiyang agom asin protektaran ini sa pisikal asin espirituwal. Gusto nin babae na kamotan sia kan agom nia, kaya dapat na madali siang kamotan. “An madonong na babae nagpapatindog kan saiyang harong,” an sabi sa Talinhaga 14:1, alagad ‘an mangmang ginagaba iyan kan saiyang mga kamot.’ Nakakatabang na marhay an madonong asin mamomoton na agom na babae sa kapangganahan asin kaogmahan kan saiyang pamilya. Ipinapahiling man nia na talagang pinapahalagahan nia an balaog nin Dios na pag-agoman.
15. Anong konseho an yaon sa Efeso 5:22-25?
15 An mga mag-agom na ibinabasar an saindang pag-agoman sa halimbawa ni Jesus sa pagtratar sa saiyang kongregasyon nagpapahiling nin pagpasalamat para sa balaog nin Dios na pag-agoman. (Basahon an Efeso 5:22-25.) Kanigoan na bendisyon an nakakamtan kan mga mag-agom kun tunay sindang nagkakaminootan asin nungkang tinotogotan na madanyaran an saindang pag-agoman huli sa kapalangkawan, dai paggirong, o iba pang ugale na bakong sa Kristiano!
DAI SINDA PAGSUWAYON NIN SIISAY MAN
16. Taano ta nagdadanay na daing agom an nagkapirang Kristiano?
16 Minsan ngani an kadaklan nagpaplanong mag-agom pag-abot nin panahon, an nagkapirang lingkod ni Jehova nagdadanay na daing agom huling mayo sindang mahiling na maaagom na gusto ninda asin makakapaogma ki Jehova. An iba igwa nin balaog nin Dios na pagigin daing agom, kaya lubos nindang ikinakadusay an saindang sadiri sa paglilingkod ki Jehova na mayo kan mga abala nin pagigin may agom. Siempre, an mga mayong agom dapat na sumunod sa mga pamantayan ni Jehova.—Mat. 19:10-12; 1 Cor. 7:1, 6, 7, 17.
17. (a) Anong mga tataramon ni Jesus mapadapit sa pag-agoman an maninigo niatong isaisip? (b) Kun an siisay man na Kristiano magpoon na mawoton an agom nin iba, ano an maninigo niang gibohon tolos?
17 May agom man o mayo, kaipuhan na isaisip niato gabos an mga tataramon ni Jesus: ‘Dai nindo nabasa na an Kaglalang magpoon sa kapinonan naggibo nin lalaki asin babae asin nagsabi, Dahel kaini babayaan kan lalaki an saiyang ama asin ina, asin maiba sa saiyang agom; asin an duwa magigin sarong laman? Mala ta bako na sindang duwa, kundi sarong laman. Kaya idtong pinagsaro nin Dios, dai nin siisay man na magbulag sainda.’ (Mat. 19:4-6) Kasalan na mawoton an agom nin iba. (Deut. 5:21) Kun an siisay man na Kristiano magpoon na magkaigwa nin siring na salang pagmawot, sia maninigong humiro tolos tanganing haleon an maating pagmawot na iyan, dawa grabeng emosyonal na kolog an resulta huling tinogotan niang tumalubo an makasadiring mga pagmawot. (Mat. 5:27-30) Mahalagang marhay na itanos an siring na kaisipan asin pugolan an makasalan na pagmawot nin madayang puso.—Jer. 17:9.
18. Ano an maninigong magin saboot niato sa balaog nin Dios na pag-agoman?
18 Dawa an dakol na tawo na dikit o mayo nin kaaraman manongod ki Jehova Dios asin sa marahayon niang balaog na pag-agoman minsan paano nagpapahiling nin pagpasalamat para sa pag-agoman. Kita na nagdusay sa “maogmang Dios,” si Jehova, lalo nang dapat na maggayagaya sa gabos na probisyon nia asin magpatunay na talagang pinapahalagahan ta an balaog nin Dios na pag-agoman!—1 Tim. 1:11, NW.
[Nota sa ibaba]
a Para sa detalyadong paliwanag sa pag-agoman, hilingon an kapitulo 10 asin 11 kan librong “Magdanay Kamo sa Pagkamoot nin Dios.”
[Blurb sa pahina 6]
An marahay na pag-agoman nagtataong onra ki Jehova asin puedeng magtao nin dakulang kaogmahan sa bilog na pamilya
[Ritrato sa pahina 5]
Ipinahiling ni Rut an pagpahalaga sa balaog nin Dios na pag-agoman
[Ritrato sa pahina 7]
Ipinapahiling mo daw na talagang pinapahalagahan mo an balaog ni Jehova na pag-agoman?