Humiro Kauyon kan Mamumuton na Pamibi ni Jesus

1, 2. Ipaliwanag an ginibo ni Jesus para sa saiyang maimbod na mga apostol pagkatapos nindang iselebrar an Paskuwa kan 33 C.E.

MATANGANG banggi kaidto kan Nisan 14 kan taon 33 C.E. Katatapos pa sanang iselebrar ni Jesus asin kan saiyang dayupot na kairiba an Paskuwa, na nagpapagirumdom sa sainda kun paano ilinigtas nin Diyos an saindang mga apuon sa pagkauripon sa Ehipto. Pero an saiyang maimbod na mga disipulo magkakamit nin daing katapusan na kaligtasan na nangungurog nanggad diyan. Pag-abot nin aga, an saindang daing kasalan na Lider gagadanon kan saiyang mga kaiwal. Pero an may kaungisan na gibong ini paggigikanan nin bendisyon. An pinabulos na dugo ni Jesus matao kan basehan sa pagligtas kan katawuhan sa kasalan asin kagadanan.—Heb. 9:12-14.

² Tanganing masigurado na dai ta malilingawan an mamumuton na probisyon na ini, pinunan ni Jesus an sarong bagong taunan na selebrasyon na nagsalida sa Paskuwa. Ginibo niya ini paagi sa pagbaraak sa sarong tinapay na daing lebadura, asin kan ipinasa niya ini sa 11 maimbod na apostol niya, siya nagsabi: ‘Ini iyo an hawak ko [“nangangahulugan kan sakong hawak,” NW] na itinatao para saindo. Gibuha nindo ini sa paggirumdom sa sako.’ Arog man kaiyan an ginibo niya sa sarong kopa nin pulang arak, na sinasabihan sinda: ‘Ining kopa iyo an bagong tipan [“nangangahulugan kan bagong tipan,” NW] sa sakong dugo na papabuluson para saindo.’—Luc. 22:19, 20.

3. (a) Anong dakulang pagbabago an nangyari pagkagadan ni Jesus? (b) Anong mga hapot an maninigo tang pag-isipan mapadapit sa pamibi ni Jesus na nasa Juan kapitulo 17?

³ Madali nang matapos kaidto an daan na tipan na Ley sa pag-ultanan nin Diyos asin kan Israel sa laman. Sasalidahan iyan kan bagong tipan sa pag-ultanan ni Jehova asin kan linahidan na mga parasunod ni Jesus. Iniisip na marhay ni Jesus an kapakanan kan bagong espirituwal na nasyon na ini. Grabe an pagkabaranga kan Israel sa laman pag-abot sa relihiyon asin sosyedad, na nagtao nin dakulang katuyawan sa banal na ngaran nin Diyos. (Juan 7:45-49; Gui. 23:6-9) Pero, mawot ni Jesus na an saiyang mga parasunod magdanay na lubos na nagkakasararo, sa siring sinda iribang makakapaglingkod na may pagkauruyon tanganing magtao nin kamurawayan sa ngaran nin Diyos. Kaya, ano an ginibo ni Jesus? Nakiulay siya sa saiyang Ama paagi sa pinakamagayon nanggad na pamibi na puwedeng mabasa nin siisay man. (Juan 17:1-26; hilingon an ritrato sa kapinunan kan artikulo.) Puwede tang siyasaton iyan asin maghapot, “Sinimbag daw nin Diyos an pamibi ni Jesus?” Maninigo man na siyasaton ta an satong sadiri asin maghapot, “Naghihiro daw ako kauyon kaiyan?”

AN MGA BAGAY NA PINAKAMAHALAGA KI JESUS

4, 5. (a) Ano an manunudan ta sa kapinunan kan pamibi ni Jesus? (b) Paano sinimbag ni Jehova an personal na kahagadan ni Jesus dapit sa saiyang ngapit?

⁴ Nakipag-ulay si Jesus sa saiyang mga disipulo sagkod matanga, na naghihiras sa sainda nin mahalagang marhay na kaaraman hali sa Diyos. Dangan nagtangad siya sa langit asin namibi: ‘Ama, an oras nagdatong na; pamurawaya an saimong Aki, tanganing pamurawayon ka kan Aki, siring kan pagtao mo saiya nin kapangyarihan sa gabos na laman, tanganing magtao siya nin buhay na dai nin katapusan sa gabos na itinao mo saiya. Ako nagpamuraway saimo sa daga huli sa paghaman ko kan gibo na itinao mo sako. Asin ngunyan, Ama, pamurawaya ako huli sa saimo man sana kaidtong kamurawayan na kinamtan ko sa kaibahan mo kan dai pa an kinaban.’—Juan 17:1-5.

⁵ Mangnuhon kun ano an mga bagay na pinakamahalaga ki Jesus sa kapinunan kan saiyang pamibi. An pinakapanginot sa saiya iyo na pamurawayon an saiyang langitnon na Ama, asin kauyon ini kan inot na kahagadan ni Jesus sa saiyang modelong pamibi: “Ama, pabanalon an ngaran mo.” (Luc. 11:2, An Banal na Biblia) An sunod na pinakamahalaga ki Jesus iyo an mapadapit sa pangangaipo kan saiyang mga disipulo, tanganing ‘matawan niya sinda nin buhay na dai nin katapusan.’ Pakatapos kaiyan, may hinagad si Jesus para sa sadiri niya, na nagsasabi: ‘Ama, pamurawaya ako huli sa saimo man sana kaidtong kamurawayan na kinamtan ko sa kaibahan mo kan dai pa an kinaban.’ Binendisyunan ni Jehova an saiyang maimbod na Aki nin urog pa sa hinagad kaini paagi sa pagtao ki Jesus nin ‘urog kahalangkaw na ngaran’ kisa sa gabos na anghel.—Heb. 1:4.

‘PAGMIDBID SA IYO SANANG TUNAY NA DIYOS’

6. Tanganing an mga apostol magkamit nin buhay na daing sagkod, ano an kinaipuhan nindang gibuhon, asin paano niyato naaraman na nakamtan ninda iyan?

⁶ Namibi man si Jesus dapit sa kun ano an dapat tang gibuhon bilang mga parakasala tanganing mag-ako kan dai na kutana maninigong regalo na buhay na daing katapusan. (Basahon an Juan 17:3.) Suno sa pagkatradusir kan New World Translation, sinabi niya na dapat kitang padagos na ‘maglaog sa isip nin kaaraman’ dapit sa Diyos asin ki Cristo. An sarong paagi tanganing magibo ini iyo an paggamit kan satong mata asin talinga tanganing makanuod nin urog pa manungod ki Jehova asin sa saiyang Aki. An saro pang mahalagang paagi nin paglaog sa isip nin kaaraman dapit sa Diyos iyo an pag-aplikar kan satong nanunudan manungod sa saiya, na nagtatao sa sato nin kaugmahan. Ginibo na kan mga apostol an nagtataong buhay na prosesong ini, kaya sinabi pa ni Jesus sa pamibi: ‘An mga tataramon na itinao mo sako itinao ko sainda, asin sinda nag-ako kaiyan.’ (Juan 17:8) Pero, tanganing magkamit kan buhay na daing katapusan, kinaipuhan nindang padagos na hurop-hurupon an mga tataramon nin Diyos asin iaplikar iyan sa saindang pang-aroaldaw na buhay. Nagin mapanggana daw an maimbod na mga apostol sa paggibo kaini sagkod sa katapusan kan saindang daganon na buhay? Iyo nanggad. Naaraman niyato ini huling an saindang mga pangaran permanenteng isinurat sa 12 pundasyon na gapo kan Bagong Jerusalem sa langit.—Kap. 21:14.

7. Ano an buot sabihon kan ‘pakamidbid’ sa Diyos, asin taano ta mahalagang marhay iyan?

⁷ Sigun sa mga iskolar sa lengguwaheng Griego, an Griegong termino na trinadusir kan New World Translation na “paglaog sa isip nin kaaraman” puwede man itradusir na “maninigo na padagos na midbidon.” An duwang kahulugan na ini magkakomplemento asin parehong mahalaga. An nota sa ibaba para sa Juan 17:3 sa Reference Bible nagtatao kan saro pang paagi nin pagtradusir kaiyan—“an pagmidbid ninda sa saimo.” Kaya, an “paglaog sa isip nin kaaraman” nanunungod sa nagpapadagos na proseso na paagi kaiyan an saro nagkakapribilehiyo na ‘mamidbid’ an Diyos. Pero, an pakamidbid sa pinakadakulang Persona sa uniberso urog pa sa pakaaram kan mga kuwalidad asin katuyuhan nin Diyos. Kaiba sa pakamidbid ki Jehova an pagkaigwa nin dayupot na bugkos nin pagkamuot sa saiya asin sa mga kapagtubod. ‘An dai namumuot,’ an paliwanag kan Bibliya, ‘dai nakakamidbid sa Diyos.’ (1 Juan 4:8) Kaya kaiba sa pakamidbid sa Diyos an pagigin makinuyog sa saiya. (Basahon an 1 Juan 2:3-5.) Dakulang pribilehiyo nanggad na magin saro sa mga nakakamidbid ki Jehova! Pero, arog kan nangyari ki Judas Iscariote, an mahalagang marhay na relasyon na ini puwedeng mawara. Magmaigot kita na mapagdanay iyan. Pag-abot nin panahon, kita magigin kuwalipikado na mag-ako kan dai na kutana maninigong regalo na buhay na daing katapusan.—Mat. 24:13

“HULI KAN SAIMONG NGARAN”

8, 9. Ano an pinakapanginot ki Jesus durante kan saiyang ministeryo digdi sa daga, asin anong relihiyosong tradisyon an siguradong dai niya inuyunan?

⁸ Pagkatapos na mabasa an pamibi ni Jesus na yaon sa Juan kapitulo 17, igwa daw nin maduda na hararom an pagkamuot ni Jesus bako lang sa saiyang mga apostol na kaiba niya kaidto kundi pati man sa magigin mga disipulo pa niya pag-abot nin panahon? (Juan 17:20) Kasabay kaiyan, kaipuhan tang masabutan na bako an satong kaligtasan an pinakapanginot ki Jesus. An panginot niyang katuyuhan puon sa kapinunan sagkod sa katapusan kan saiyang ministeryo digdi sa daga iyo na pakangbanalon asin pamurawayon an ngaran kan saiyang Ama. Halimbawa, sa sinagoga sa Nazaret, kan ipaaram niya kun ano an sugo sa saiya, binasa ni Jesus an balumbon ni Isaias: ‘An espiritu nin Kagurangnan nasa sako, huli ta linahidan niya ako na maghulit nin mga marahay na bareta sa mga dukha.’ Daing duda na malinaw na sinawod ni Jesus an pangaran nin Diyos kan basahon niya an sugong ini.—Luc. 4:16-21.a

⁹ Sigun sa Judiong tradisyon, haloy pa bago nagdigdi si Jesus sa daga, sinasabi na sa mga tawo kan mga lider nin relihiyon na dai paggamiton an pangaran nin Diyos. Makakasiyerto kita na marigon na dai inuyunan ni Jesus an siring na tradisyon na bakong suno sa Kasuratan. Sinabi niya sa mga nagkokontra sa saiya: ‘Ako napadigdi sa ngaran kan sakong Ama, asin dai ako nindo inaako; kun iba an pumadigdi sa saiyang sadiring ngaran, siya an aakuon nindo.’ (Juan 5:43) Dangan, mga pirang aldaw bago an saiyang kagadanan, ipinahayag ni Jesus an pinakapanginot sa saiyang buhay kan siya mamibi: ‘Ama, pamurawaya an saimong ngaran.’ (Juan 12:28) Kaya dai kita dapat magngalas na idinuon ni Jesus an dapit sa pagpamuraway kan ngaran kan saiyang Ama sa bilog na pamibi na sinisiyasat ta ngunyan.

10, 11. (a) Ano an kalabot sa pagpamidbid ni Jesus kan pangaran kan saiyang Ama? (b) Anong katuyuhan an maninigong pagmaigutan na magibo kan mga disipulo ni Jesus?

¹⁰ Si Jesus namibi: ‘Ako nagpahayag kan saimong ngaran sa mga tawo na itinao mo sako hali sa kinaban. Mga sadiri mo sinda, asin itinao mo sinda sako, asin sinda nag-urutob kan saimong tataramon. Ako dai na sa kinaban, asin an mga ini nasa kinaban, asin ako madiyan sa saimo. Amang banal, ingati sinda sa saimong ngaran [“huli kan saimong ngaran,” NW] na itinao mo sako, tanganing sinda magin saro, siring sato.’—Juan 17:6, 11.

¹¹ Kan ipinapamidbid ni Jesus an pangaran kan saiyang Ama sa saiyang mga disipulo, urog pa sa pagsawod kan pangaran na iyan an ginibo niya. Tinabangan man sinda ni Jesus na maaraman kun ano an irinerepresentar kan pangaran nin Diyos, an buot sabihon, an magayon na mga kuwalidad nin Diyos asin an saiyang paagi nin pagtratar sa sato. (Ex. 34:5-7) Dugang pa, hali sa pinamuraway na katungdan ni Jesus sa langit, padagos niyang tinatabangan an saiyang mga disipulo na ipamidbid an ngaran ni Jehova sa bilog na daga. Na may anong katuyuhan? Tanganing mas dakul pang disipulo an matipon bago umabot an katapusan kan maraot na sistemang ini nin mga bagay. Dangan, dakulang ngaran nanggad an gigibuhon ni Jehova para sa saiyang sadiri pag siya naghiro na tanganing iligtas an maimbod na mga saksi niya!—Ezeq. 36:23.

‘TANGANING AN KINABAN MAGTUBOD’

12. Ano an tulong bagay na kaipuhan tanganing magin mapanggana kita sa nagliligtas-buhay na gibuhon niyato?

¹² Kan si Jesus yaon digdi sa daga, pinagmaigutan niyang tabangan an saiyang mga disipulo na mapangganahan an saindang mga kaluyahan. Mahalagang marhay ini tanganing matapos ninda an gibuhon na pinunan ni Jesus. ‘Siring sa pagkasugo mo sako sa kinaban,’ an pamibi ni Jesus, ‘siring man sinugo ko sinda sa kinaban.’ Tanganing sinda magin mapanggana sa nagliligtas-buhay na gibuhon na ini, idinuon ni Jesus an tulong mahalagang marhay na bagay. Inot, ipinamibi niya na lugod an saiyang mga disipulo dai magin kabtang kan maraot na kinaban ni Satanas. Ikaduwa, ipinamibi niya na lugod sinda mapabanal paagi sa pag-aplikar ninda kan katotoohan sa Tataramon nin Diyos. Ikatulo, pauruutrong nakimahirak si Jesus na lugod an saiyang mga disipulo magkasararo sa bugkos nin pagkamuot na arog kan yaon sa saiya asin sa saiyang Ama. Nangangaipo ini nin pagsiyasat sa sadiri. Maninigong haputon kan lambang saro sa sato an saiyang sadiri, ‘Naghihiro daw ako kauyon kan tulong kahagadan ni Jesus?’ Paagi sa pagtao nin atensiyon sa mga bagay na ini, ipinahayag ni Jesus an saiyang kumpiyansa na ‘an kinaban matubod na ika an nagsugo sako.’—Basahon an Juan 17:15-21.

13. Paano sinimbag kan inot na siglo C.E. an pamibi ni Jesus?

¹³ Kun pag-aadalan niyato an libro sa Bibliya na Mga Gibo kan mga Apostol, na kasunod kan apat na Ebanghelyo, mahihiling niyato na sinimbag an pamibi ni Jesus. Isip-isipon an pagkabaranga na posibleng mangyari sa tahaw kan inot na mga Kristiyano, na kompuwesto nin mga Judio asin Hentil, mayaman asin pobre, uripon asin may uripon. Pero, sinda gabos dayupot na marhay na nagkasararo kaya puwede sindang iagid sa manlain-lain na parte kan hawak nin tawo kun sain si Jesus an saindang payo. (Efe. 4:15, 16) Milagroso nanggad an bagay na ini sa tahaw kan nagkakabarangang kinaban ni Satanas! An gabos na kaumawan para sa bagay na ini dapat na itao ki Jehova, an nagpagin posible kaiyan paagi sa paghiro kan saiyang makapangyarihan na banal na espiritu.—1 Cor. 3:5-7.

14. Sa presenteng panahon, paano sinimbag an pamibi ni Jesus?

¹⁴ Makamumundo, an milagrosong pagkasararo na ini dai nagdanay pagkagadan kan mga apostol. Imbes, siring kan ihinula, nagkaigwa nin dakulang apostasya, na nagresulta sa nagkakabarangang mga sekta nin Kakristiyanuhan. (Gui. 20:29, 30) Pero, kan taon 1919, pinatalingkas ni Jesus an saiyang linahidan na mga parasunod sa pagkabihag sa palsong relihiyon asin tiniripon sinda sa “sangkap na bugkos nin pagkasararo.” (Col. 3:14, NW) Ano an epekto kan saindang gibuhon na paghuhulit sa bilog na kinaban? Labing pitong milyon na ‘ibang karnero’ hali sa ‘gabos na nasyon asin tribo asin banwaan patin tataramon’ an tinipon sa sarong nagkakasararong aripumpon kaiba kan mga linahidan nin Diyos. (Juan 10:16; Kap. 7:9) Pambihirang kasimbagan nanggad sa pamibi ni Jesus na ‘an kinaban makaaram na ika [Jehova] an nagsugo sako asin namuot sainda, siring kan pagkamuot mo sako’!—Juan 17:23.

PANTAPOS NA MGA TATARAMON NA NAKAKAPAHIRO SA PUSO

15. Anong espesyal na kahagadan an ipinamibi ni Jesus para sa saiyang linahidan na mga disipulo?

¹⁵ Kan amay na banggi nin Nisan 14, tinawan ni Jesus nin kamurawayan, o onra, an saiyang mga apostol paagi sa pakipagtipan sa sainda na mamahala kaiba niya sa saiyang Kahadian. (Luc. 22:28-30; Juan 17:22) Kaya mapadapit sa gabos na magigin linahidan na mga parasunod niya, si Jesus namibi: ‘Ama, ako nagmamawot na idto man na mga itinao mo sako masa kaibahan ko kun sain ako, tanganing sinda makahiling kan sakong kamurawayan na itinao mo sako, huli ta ika namuot sako bago lalangon an kinaban.’ (Juan 17:24) Imbes na maara, an ibang karnero ni Jesus naggagaya-gaya huli kaini, asin iyan urog pang patunay na nagkakasararo an gabos na tunay na Kristiyano digdi sa daga ngunyan.

16, 17. (a) Sa pagtatapos kan pamibi ni Jesus, ano an sinabi niya na padagos niyang gigibuhon? (b) Ano an maninigo na padagos niyatong gibuhon?

¹⁶ Huli sa impluwensiya kan mga lider ninda sa relihiyon, pinipili kan kadaklan na tawo sa kinaban na baliwalaon an malinaw na ebidensiya na si Jehova igwa nin nagkakasararong banwaan na talagang nakakamidbid sa saiya. Totoo man iyan kan panahon ni Jesus. Kaya tinapos niya an saiyang pamibi paagi sa nakakapahiro sa puso na mga tataramon na ini: ‘O Amang matanos, an kinaban dai nakamidbid saimo, alagad ako nakamidbid saimo; asin an mga ini nagpakamidbid na ika an nagsugo sako. Asin ipinamidbid ko sainda an saimong ngaran, asin ipapamidbid ko iyan, tanganing an pagkamuot na iminuot mo sako mapasainda asin ako sa sainda.’—Juan 17:25, 26.

¹⁷ May makakapagsabi daw na si Jesus dai huminiro kauyon kan saiyang pamibi? Bilang Payo kan kongregasyon, padagos niya kitang tinatabangan na ipamidbid an pangaran kan saiyang Ama asin ihayag an Saiyang katuyuhan. Lugod na kita padagos na magpasakop sa saiyang pagkapayo paagi sa maigot na pagkuyog kan pagbuot niya na maghulit asin gumibo nin mga disipulo. (Mat. 28:19, 20; Gui. 10:42) Lugod na magmaigot man kita na mapagdanay an satong mahalagang marhay na pagkasararo. Sa paggibo kaini, naghihiro kita kauyon kan pamibi ni Jesus, sa ikakamuraway kan ngaran ni Jehova asin sa daing sagkod na kaugmahan ta.