Pagregular Payunir—Makapopoon daw Kamo sa Setyembre?
1 An Setyembre iyo an kapinonan kan 1988 taon nin paglilingkod. Iyan man an magigin enot na bulan nin pagregular payunir para sa dakol. Iyo man daw para sa saindo?
2 Dakol an nag-auxiliary payunir kan 1987 taon nin paglilingkod. An paglilingkod na ini puwedeng magin tangga pasiring sa pagigin regular payunir. Kun ini totoo sa saindo, taano ta dai pumoon sa Setyembre? Angay nanggad, an Kasuratan nagsasadol: “Dai kamo maghinugak sa saindong gibohon. Magin malaad sa espiritu. Maglingkod ki Jehova.”—Roma 12:11.
3 Bago kamo magdesisyon na magpalista bilang regular payunir, maninigo nindong kuyogon an hatol ni Jesus na ‘tumukaw asin kuwentahon an gastos.’ (Luc. 14:28) Kaipuhan na konsideraron an mga bagay na arog kan salud, obligasyon sa pamilya, edad asin mga paninimbagan sa kongregasyon. Pero kun naanalisar na nindo an saindong mga kamugtakan asin nadeterminaran na kamo puwedeng magregular payunir, dai kamo mag-alangan.
MANARIG SA KAPANGYARIHAN NI JEHOVA
4 Dai nindo isipon na an minsan anong diperensia o paninimbagan sa pamilya makaoolang saindo sa pagpapayunir. Posible na may midbid kamong mga payunir na naglilingkod sa ibong nin kagurangan, maluyang salud, asin personal/o pampamilyang mga obligasyon. Kita nananarig na mapapasato an “kapangyarihan na lihis sa ordinaryo” kun kita nagsasarig ki Jehova asin bakong sa sadiri niatong kosog.—2 Cor. 4:7.
5 Ginatos an linalaoman na mag-aplay na pumoon sa pagpapayunir sa Setyembre. Ini gabos ebidensia kan paghiro kan kapangyarihan ni Jehova. Paagi sa mapagngayongayong pagpaplano asin lubos na pagsarig ki Jehova, dakol an makagigibo kan kinakaipuhan na mga pagliwat asin makaiiba sa mga regular payunir sa pagpopoon kan 1988 taon nin paglilingkod. Makakabilang daw kamo sa sainda?
6 Kabilang sa mga bendisyon na natatagama sa mga nagigin regular payunir an kagayagayahan na makikabtang sa bilog na panahon na paglilingkod asin makatabang sa mga bagohan sa langtad. Siring man, an mga makapopoon na magpayunir sa Setyembre may esperansang makaatender sa Paadalan sa Paglilingkod Bilang Payunir sa Oktubre, 1988. Totoo nanggad an talinhaga: “An bendisyon ni Jehova—iyan an nakapayayaman”!—Tal. 10:22.