Hapot
● Tama daw na iwaras sa mga tugang an pribadong materyales manongod sa mga bagay na arog baga nin mga serbisyo medikal o pagkonseho?
May koneksion sa Kristianong gawe, si apostol Pablo nagsurat na an ‘kongregasyon harigi asin tukod kan katotoohan.’ (1 Tim. 3:15) Kaya, an kongregasyon dai dapat na magin paagihan sa pagwaras nin pribadong materyales, baga man paagi sa espesyal na mga pagtiripon sa Kingdom Hall o sa porma nin inimprentang mga pampleta asin pulyeto.
An Watchtower asin Awake! nagtao nin marahay na impormasyon asin hatol dapit sa medikal na mga problema asin sa pagsuportar sa pagboot nin Dios sa dugo. Iyan nagkaigwa man nin timbang na mga artikulo manongod sa labi-labing kamondoan asin iba pang emosyonal na mga problema. An mga artikulong ini ilinuwas sa pagtao nin impormasyon. Pero iyan dai nagrerekomendar nin mga klase nin pag-eksamen, pagbolong, doktor, parakonseho, o klinika, ta personal na pagdedesisyon an kaipuhan na gibohon sa siring na mga bagay.—The Watchtower, Hunyo 15, 1982, p. 22-9.
Huling kadakol kan mga Saksi ni Jehova, may mga tugang na naghingoang paoswagon an saindang negosyo asin ilakop an saindang opinyon paagi sa paggibo nin mga artikulo, pampleta, asin tape para sa mga nasa organisasyon. Tibaad an mga ini manongod sa mga temang pinagkakainteresan, pero taano iyan ta iwinawaras? Tanganing magkaigwa nin mga parokyano. Dawa kun an iba dai iwinawaras sa pagnenegosyo, tibaad iyan may pribadong mga opinyon na ibinugtak sa ‘teokratikong pagtaram’ na may mga sitasyon pa sa Biblia. An mga opinyon na ini tibaad bakong oyon sa Biblia asin sa Makakasuratan na hatol na itinao nin kamagurangan kundi tibaad basado sa pilosopiya o enot na mga katokdoan kan kinaban.—Col. 2:8; 1 Tim. 6:20.
May ibinungang mga problema asin karibarawan huli ta an mga tugang inosenteng ipinasa sa iba an siring na pribadong materyales. Kita gabos, nangorogna an kamagurangan, maninigong magmawot na likayan an pakakontribuwir sa siring na mga problema. Ni maninigo man niatong paoswagon an negosyo o mga ideya nin saro paagi sa pagwaras nin siring na materyales sa mga tugang.—Helingon an “Mga Hapot,” Agosto, 1977 An Satong Paglilingkod sa Kahadean.