“Pabayaan na an Gabos Mangyari Para sa Pagpakosog”
1 Sa pagtratar sa satong mga tugang, maninigo na gibohon niato an marahay para sa pagpakosog sa sainda. Ini nangangahulogan nin pagigin interesado sa pagprotehir sa saindang espirituwal na intereses. Kun kita nakikikabtang sa sarong klase nin sekular na trabaho na kalabot an pagpalakop nin sarong produkto o serbisyo, kaipuhan kitang mag-ingat na mayo nin ano man kitang ginigibo na makapasisingkog sa satong mga tugang.—2 Cor. 6:3; Fil. 1:9, 10.
2 May mga uminayon sa manlaenlaen na negosyo, na minamansay an mga kapwa Kristiano bilang potensial na mga parokyano. May nagkapirang organisasyon para sa pagpapabakal na ineenkaminar an saindang mga ahente na mansayon an gabos bilang potensial na parokyano—kabale idtong mga karelihion ninda. May mga tugang na nag-organisar nin darakulang pagtiripon nin mga Saksi sa katuyohan na enkaminaron sinda na umayon sa sarong negosyo. An iba pinalalakop an saindang negosyo paagi sa pagtao nin dai hinahagad na mga bagay, brosyur, impormasyon sa Internet, o tape sa mga kapagtubod. Tama daw para sa sarong Kristiano na gamiton an saiyang teokratikong mga koneksion tangani na aprobetsaran an saiyang espirituwal na mga tugang? Dai!—1 Cor. 10:23, 24, 31-33.
3 Maninigong Mag-ingat an mga Tugang: Ini dai nangangahulogan na dai na puedeng makipagnegosyo an sarong Kristiano sa sarong tugang. Iyan personal na bagay. Minsan siring, may mga nag-iintrodusir nin mga pamamaagi sa negosyo na nag-eenkaminar nin kahanaban, asin dinadagka ninda an mga kapagtubod na magin saindang kasosyo o kapitalista. Dakol sa mga negosyong ini an napipierde, na nagkakagastos an mga partisipante nin dakulang kantidad nin kuarta. Minsan ngani an mga nakiayon sa negosyo tibaad namotibar nin pagmawot na gumanansia tolos-tolos, an organisador dai maninigong maghona na sia dai mababasol kun mapierde an negosyo. Maninigo niang maingat na estudyaran nin patienot kun paano maaapektaran an espirituwal asin pisikal na kapakanan kan saiyang mga tugang sa panahon na dai magin mapanggana an negosyo. An mga may teokratikong paninimbagan maninigo na nangorognang magin mapagmaan dapit sa saindang sekular na mga proyekto huli ta an iba puedeng nag-aasa sa sainda na may paggalang asin dakula an pagtitiwala sa sainda. Sala na abusohon an pagtitiwalang iyan. Puedeng mawara an mga pribilehio nin sagradong paglilingkod kun an sarong tugang mawaran kan paggalang nin iba.
4 An satong pasohan maninigo na “pabayaan na an gabos mangyari para sa pagpakosog.” (1 Cor. 14:26) Dapat niatong likayan na gumibo nin ano man na nag-iintrodusir nin komersial na mga aktibidad sa laog kan kongregasyon o nagpapalakop kaiyan. An siring na mga bagay mayong koneksion sa satong mga dahelan sono sa Kasuratan na magtorotiripon.—Heb. 10:24, 25.