Paghanap Nguna sa Kahadean
1 An gabos na rasonableng tawo boot na magkamit nin halawig na buhay sa matoninong na mga kamugtakan. Ini normal na kamawotan, asin iyan makakamtan paagi sa ‘paghanap nguna sa Kahadean.’ (Mat. 6:33) Minsan siring, imbes na hanapon an Kahadean, an mga tawo ngonyan kadakol kan ginigibo na nakaiina sa kaogmahan ninda sa buhay. An mga pagpangana asin pagpalabilabi garo baga iyo an uso ngonyan. Kadakol kan mga peligro sa buhay mismo. An nakaiistorbong kadahasan asin mga kariribokan sibil nakaabot na sa mga parte kan daga na dati midbid sa mas trangkilong buhay.
2 Pero, aram niato na kun ipaoorog nin saro an ‘paghanap sa Kahadean,’ an saiyang buhay maaapektaran para sa ikararahay. Palalawigon ni Jehova an saiyang mga aldaw asin dudugangan nin mga taon an saiyang buhay.—Tal. 3:1, 2.
MAHALAGANG TABANG
3 Sa bulan na ini nin Nobyembre, pagmamaigotan niato na tabangan an mga tawo na hanapon an Kahadean asin pag-aaboton an pasohan na buhay paagi sa pag-alok kan New World Translation of the Holy Scriptures kaiba an librong pantabang sa pag-adal sa Biblia na True Peace and Security sa kontribusyon na ₱70.00. Kanigoan kadakulang pribilehiyo na tabangan an iba sa paaging ini! Boot niato na may andam kitang mga puntong ipakikipag-olay na tibaad makapukaw nin interes tanganing hanapon nguna an Kahadean nin mga may matanos na puso. Ano daw an masasabi niato?
4 Kun garo baga relihiyoso an kagharong, pakapagpamidbid tibaad boot nindong sabihon: “An mga tawong interesado na pakarhayon an saindang pamumuhay tibaad iparisa ini sa pag-ayon sa sarong relihiyon. Pero an dakol na minagibo kaiyan mamondo pa man giraray. Ano an sinabi ni Jesus na liyabe sa kaogmahan? Mangnoha tabi an simbag na itinatao digdi sa Mateo 5:3 asin Kapahayagan 1:3: [Basahon.] An Biblia mismo matabang saindo na kamtan an tunay na kaogmahan. Puwede ko daw na iwalat saindo an pasil-masabotan na traduksion na ini kaiba an librong ini sa kontribusyon na ₱70.00?”
5 Kun an edisyon kan New World Translation na iinaalok nindo igwa kan “Bible Topics for Discussion” sa likod, puwede nindong isuherir na gamiton ini kan kagharong tangani siang magkaigwa nin malinaw na pagmansay sa lambang temang ipinaliliwanag paagi sa pagbasa sa sitadong mga teksto.
AN SATONG PASOHAN
6 An pasohan niato tabangan an mga may sadiosan na puso na makanood manongod ki Jehova asin pahiroon sinda na hanapon nguna an Kahadean. Ini maparigon sa saindang paglaom sa buhay sa irarom nin matanos na mga kamugtakan. An pag-alok kan nasa modernong tataramon na New World Translation asin kan librong True Peace and Security na may klaro, direkta, pero nakadadagkang estilo matabang sato na maabot an satong pasohan. Magin kitang entusiastiko sa pag-otob sa satong ministeryo!