Pakosogon an Iba na Basahon Asin Pag-adalan an Tataramon nin Dios
1 Sa gabos na librong isinurat, an Biblia an solamenteng nagtatao sa katawohan nin dai nasusudyang paggiya kun paano aatubangon an mga problema sa buhay. (Jer. 10:23) Dugang pa sa bagay na iyan, nagtatao man ini sa sato nin siertong paglaom para sa ngapit. Balaog ini nin Dios sa tawo. Minsan siring na an Biblia an pinakamabenta sa gabos na panahon, an mga surbey nagpapaheling na sadit sanang porsiento kaidtong igwa nin kopya an naggagamit nin panahon tanganing basahon ini. Puwede daw niatong tabangan an orog pang tawo tanganing makinabang sa nasusurat na Tataramon nin Dios?
2 Saen man nabubuhay an mga tawo sa kinaban, napapaatubang sinda sa magkakaagid na mga problema. An Biblia sana an igwa nin tamang mga solusyon. Taano ta yaon kita digdi? Taano ta naggugurang asin nagagadan an mga tawo? Saen kita paduduman? Taano ta nag-oorog an katampalasanan? Taano ta tinotogotan nin Dios an karatan? Ano an solusyon sa implasyon, kakulangan nin istaran asin pagkakan? Maninigo niatong basahon asin pag-adalan an Biblia tanganing makakua nin nakakakombensir na mga simbag sa mga hapot na ini.
KUN PAANO PAKOKOSOGON AN IBA
3 Tanganing mapakosog an mga tawo na basahon asin pag-adalan an Tataramon nin Dios, maninigo niatong idoon na magkaigwa sinda nin kompiansa na an Biblia ipinasabong nin Dios. (2 Tim. 3:16) Puwede niatong magibo ini paagi sa paggamit kan impormasyon sa temang “Bible” sa librong Reasoning. An pahina 60 sagkod 64 (62 sagkod 66 sa Tagalog) nagtatao nin kadakol na mapananarigan na patotoo na ipinasabong an Biblia.
4 Kadakol an nagpoon na basahon an Biblia asin dangan nagpondo. Taano? Tibaad nanluya sinda huli ta dai nasabotan an saindang binasa. Tibaad puwede niatong matabangan an siring na mga tawo paagi sa pagpakosog sainda na basahon an New World Translation. Igwa nin 50 milyones na kopya kaining madaling basahon na modernong lenguaheng traduksion an ipinublikar sa siyam na lenguahe, na minagibo kaini bilang saro kan pangenot na ika-20 siglong mga traduksion nin Biblia na ginagamit ngonyan.
5 Kun makanompong kita nin mga tawong nagpaheling nin interes sa pagbasa nin Biblia, maninigo kitang mag-alok na mag-adal kaini sainda. Puwede niatong gamiton an brochure na Uya! sa pagpopoon nin pag-adal sa Biblia sainda. Mawot niatong magkondukta nin progresibong mga pag-adal sa Biblia. (Mat. 28:19, 20) Nangangahulogan ini na pagmamaigotan niatong aboton an puso kan estudyante tanganing an nanonodan makaimpluwensia sa saiyang paggawe asin simbag sa saiyang mga hapot sa Biblia.
PAG-AALOK KAN BIBLIA ASIN KAN BROCHURE NA UYA!
6 Durante kan Nobyembre, itatampok niato an New World Translation asin an brochure na Uya! sa kontribusyon na ₱60.00. Paagi sa entusiastikong pag-aalok kan duwang publikasyon na ini, puwede niatong mapakosog an orog pang tawo na basahon asin pag-adalan an Tataramon nin Dios. Bilang introduksion sa Topikong Mapag-oolayan, tibaad mawoton nindong gamiton an ikaduwang introduksion sa irarom kan temang “Bible/God” sa pahina 10 kan librong Reasoning. O an enot na introduksion sa irarom kan temang “Family/Children sa pahina 11 (pah. 14 sa Tagalog) an tibaad angay sa saindong teritoryo.
7 Mantang nagdadangadang an katapusan, posibleng makanompong kita nin orog pang tawo na naghahanap nin mga simbag na manonompongan sana sa Biblia. Magin mahigos kita sa pagpakosog sainda na basahon asin pag-adalan an Tataramon nin Dios, na ginagamit an alok sa Nobyembre tanganing matabangan sindang manompongan an mga simbag na kaipuhan ninda.