Pag-aatubang kan Maogmang Bareta—Paagi sa Paggamit nin Tract sa Lambang Oportunidad
1 An nagkapirang tinanom nagpapaluwas nin ginatos o rinibo pa nganing banhi. Sa paaging ini sineguro ni Jehova na an mga tinanom perming matubo sa daga.—Gen. 1:29, 30.
2 Siring man, pinapangyayari ni Jehova na magin abunda an banhi kan katotoohan sa Kahadean bako sanang sa ngoso kan saiyang mga lingkod kundi pati sa porma nin mga babasahon. Isip-isipa an ginatos na milyon na libro, pulyeto, magasin, asin brochure na iwinaras sa nag-aging mga taon. Kasuarin pa sana ginibo an bagong set nin mga tract. Ginagamit daw niato ini sa pagpalakop kan maogmang bareta sa lambang oportunidad?
3 Tanganing magamit nin epektibo an mga tract, kaipuhan kitang magin pamilyar dian. Huling iyan sadit sana kombenyente iyan na dara-darahon saen man kita magduman. Pinakamahalaga, an mensahe sa kada tract klaro, diretso sa punto, asin nakaaagyat. Naheheling daw nindo an dakol na oportunidad na gamiton iyan?
4 Pagharongharong: Nadiskobre nin dakol na parahayag na an pag-opresir nin libreng tract sa introduksion minabukas kan dalan para sa orolay. Tibaad gusto nindong probaran ini sa presenteng Topikong Mapag-oolayan, na ginagamit an Life in a Peaceful New World o Why You Can Trust the Bible. Sa panahon kan saindong orolay tibaad maaraman nindo na bago pa sanang magadanan an tawo. Angay nanggad na ihiras saiya an nakararangang mensahe sa tract na What Hope for Dead Loved Ones? O tibaad ipaheling kan pag-oolay na an tawo may salang ideya manongod sa tinutubod nin mga Saksi ni Jehova. An tract na What Do Jehovah’s Witnesses Believe? tibaad iyo sana an kaipuhan. Parate na an kagharong gustong umako nin tract dawa kun sinayumahan an alok na babasahon. Dai niato aram kun ano an puwedeng magin epekto nin sarong tract sa tawong iyan o sa iba sa pamilya na tibaad makabasa kaiyan.—Ecl. 11:6.
5 Impormal na Pagpatotoo: Sa mga gibo niato sa aroaldaw, tibaad nakakaolay niato an dakol na kinabanon. Saen man kita, an mga tract minatabang sato na magin andam na tumao nin patotoo. An pag-alok nin tract parateng nagbubukas kan dalan para sa berbal na pagpatotoo.
6 Sa saindong pinagtatrabawohan, nag-oorolay daw an mga katrabaho nindo manongod sa mga kagipitan asin problema sa buhay? Kun sinda talagang “nag-aaragagha asin nag-aaragrangay” huli sa maraot na mga kamugtakan sa kinaban, an impormasyon sa Life in a Peaceful New World mapahiro sa saindang puso, na binubukasan an dalan para sa dugang pang orolay.—Ezeq. 9:4.
7 Kamo daw na mga hobenes sa eskuwelahan nadadangog an mga maestro o kaklase na pinagdududahan an pagkamasasarigan kan Biblia? An Why You Can Trust the Bible ipinaheheling an sientipiko asin makasaysayan na katamaan kan Biblia na tibaad makapukaw sa saindang interes na makanood pa nin orog.
8 Sinabi ni Jesus na an satong huhulitan iyo an bilog na kinaban. (Mat. 13:38; 24:14) Kaya, saen man may tawo—sa trabaho, sa eskuwelahan, sa waiting room nin doktor o dentista, sa sadan o dawa sa mismong pinto niato kun may minasongko huli sa laen-laen na dahelan—isabwag niato an mga banhi kan katotoohan, na nagsasarig na may mahoholog sa “marahay na daga” asin magbubunga sa ikaoomaw ni Jehova.—Mat. 13:23.