Pagtao nin Banal na Paglilingkod na May Diosnon na Takot
1 Kaidtong 1988 taon nin paglilingkod, an Sosyedad nakaresibi nin dakol na surat na nagpapaheling nin odok sa pusong pagpasalamat sa programa sa pansirkitong asamblea na “An Daing Kaagid na Halaga kan Paglilingkod ki Jehova.” An mga surat na ini nagpahayag nin mga saboot na nakaaagid kan sa salmista na nagsabi: “An sarong aldaw sa saimong mga patyo orog na marahay kisa sarong ribo sa ibang lugar.” (Sal. 84:10) Aram niamo na kamo gabos may kaparehong saboot manongod sa satong dakulang pribilehiyo na maglingkod ki Jehova asin na nakinabang man kamo sa programang ini.
2 Poon sa Pebrero, an bagong programa sa pansirkitong asamblea sa temang “Pagtao nin Banal na Paglilingkod na May Diosnon na Takot.” (Heb. 12:28) Mantang an kinaban may karungawan na pinalilimanlimanan si Jehova asin minimenus an mensahe manongod sa saiyang Kahadean, ikinaoogma niato an satong pribilehiyo na magtao nin banal na paglilingkod na may diosnon na takot. Tunay na an marahay na takot ki Jehova iyo an “kapinonan nin kadonongan”; iyan “malinig,” na nagmomotibar sato na otobon an saiyang kabotan. (Sal. 19:9; 111:10) An programa sa pansirkitong asamblea para sa 1989 taon nin paglilingkod makatatabang sato na orog na masabotan kun ano an takot ki Jehova asin kun paano niato iyan ikapaheheling sa satong paglilingkod sa saiya.
3 Sa pagpapadagos kan programa, manonodan niato kun paano maninigong makaapektar sa sato an diosnon na takot sa satong ministeryo, sa satong pag-atender sa pagtiripon, asin sa satong aroaldaw na buhay. Pag-oolayan an pangangaipo na haleon an ano man na distansia sa pag-oltanan kan satong aram asin kan satong ginigibo. Kaipuhan na aram niato bako sanang kun ano an dapat na gibohon kundi siring man kun paano iaaplikar an mga nanonodan niato tanganing makinabang kita asin makapag-omaw sa satong Dios.
4 An pahayag-publiko na itatao kan mga paraataman sa distrito may titulong “Taano ta Maninigong Matakot sa Tunay na Dios?” Seguradohon na imbitaran an mga inaadalan nindo sa Biblia saka an iba pang interesado. Tunay na kita gabos nagmamawot na iareglo an satong mga gibo tanganing makaatender asin lubos na makinabang sa magayonon na duwang-aldaw na programang ini. Ipaaaram sa saindo kan saindong paraataman sa sirkito an lugar asin petsa na nakaiskedyul para sa saindong kongregasyon.