Bagong Programa sa Pansirkitong Asamblea
An sarong pakahulogan nin pagkatakot iyo an “hararom na reberensia asin may pagkangirhat na paggalang, nangorogna sa Dios.” Ilinaladawan kaini an tamang pagkatakot na sinambit sa Kasuratan na “an kapinonan nin kadonongan.” (Sal. 111:10) Sa kabaliktaran, may saro pang klase nin pagkatakot na nagdodominar sa kinaban ni Satanas na nasa palibot niato. Paano niato malilikayan an nakararaot na pagmateng iyan mantang nagpapatalubo nin reberensial na pagkatakot ki Jehova? An bagong programa sa pansirkitong asamblea para sa 2002 na taon nin paglilingkod tinatawan nin atension an hapot na ini. An tema “Matakot Kamo sa Dios Asin Pamurawayon Sia.” (Kap. 14:7) Masasabotan niato an dakol na paagi na kita nakikinabang sa pagkatakot ki Jehova bilang mga indibiduwal asin bilang sarong organisasyon.
Minsan ngani an pagkatakot tibaad nagpaparisa nin kahaditan o kawaran nin kosog nin boot asin pagduwaduwa na atubangon an masakit na mga situwasyon, an Biblia nagsasabi: “Maogma an gabos na natatakot ki Jehova.” (Sal. 128:1) Ipaheheling sa sato kan programa sa asamblea kun paano niato mapangganang aatubangon an mga angat sa tunay na pagsamba. Maheheling niato kun paano tatabangan an mga bagohan na kultibaron an siring na nakararahay na pagkatakot sa Dios, na talagang mamotibar sa sainda na booton na maglingkod sa saiya sa bilog nindang puso, kalag, isip, asin kosog. (Mar. 12:30) An enot na aldaw nagtatapos paagi sa pahayag kan paraataman sa distrito na “Dumayupot nin Orog Pa sa mga Namomotan Nindo.” Ipaliliwanag nia kun paano kita magdadanay na mapagbantay sa paghihingoa kan Diablo na irayo kita ki Jehova, sa satong pamilya, asin sa satong Kristianong mga tugang.
“Matakot ki Jehova, Bakong sa mga Tawo” an tema kan apat na kabtang na simposium sa ikaduwang aldaw. Ipaliliwanag kaiyan kun taano ta asin kun paano kita dapat na makapanggana sa ano man na pagkatakot na nakaoolang sa sato sa lubos na paggibo kan satong ministeryo o pagpapadanay kan satong integridad asin marahay na konsensia sa eskuelahan asin sa pinagtatrabawohan. An pampublikong pahayag na “Matakot sa Dios Asin Otobon an Saiyang mga Pagboot” basado sa sunod-sunod na mga pangyayari na ilinadawan sa Kapahayagan kapitulo 14. Tataposon an pansirkitong asamblea paagi sa positibong instruksion na “Padagos na Maglakaw sa Pagkatakot ki Jehova.”
An Teokratikong Paadalan sa Pagmiministro, modelong Pagtiripon sa Paglilingkod, pahayag sa bautismo, asin sumaryo kan Pag-adal sa Torrengbantayan dugang na mga tampok kan programa na dai nindo gugustohon na malipasan. Imbitaran an mga inaadalan nindo sa Biblia na umatender kaiba nindo. An siisay man na boot na magpabautismo maninigong magsabi sa nangengenot na paraataman sa pinakamadaling panahon na mapupuede. Bobooton niato gabos na ipaheling an satong nakararahay na pagkatakot ki Jehova asin iatribwir an kamurawayan sa saiya paagi sa dai pagpalta sa ano man na kabtang kan marahayon na programang ini!