Apurahan na Ipahayag an mga Paghokom ni Jehova
1 Marikas na nagdadangadang an itinalaan na panahon ni Jehova sa paghokom tumang sa Dakulang Babilonya. (Kap. 1:3; 19:2) Alagad enot nguna, kaipuhan itao an pangultimong patanid kan saiyang kalaglagan. Tanganing makaligtas, kaipuhan “lumuwas sa saiya” an mga namomoot sa katanosan asin magkamit nin inoyonan na kamugtakan sa atubangan ni Jehova.—Kap. 18:4.
2 An bagong librong Revelation—Its Grand Climax at Hand! matabang sato na isagibo ining pagpapatanid. Iyan malinaw na naghahayag kan mga padusa nin Dios tumang sa hinokoman na kinaban na ini.
GUMIBO NIN ESPESYAL NA PAGHIHINGOA
3 Manongod sa apurahan na mensahe kaiyan, an gabos na parahayag magmamawot na makikabtang sa pag-alok kan librong Revelation sa harong-harong. Kaipuhan konsideraron nin kamagurangan an pag-areglo nin dagdag na pagtiripon bago maglingkod. Makakatabang daw sa mga parahayag an pagkaigwa nin areglo nin paglilingkod sa hapon o sa banggi?
4 Kadagdagan pa sa pag-alok kan librong Revelation sa harong-harong, gamiton man an ibang oportunidad. An hoben na mga parahayag makakapag-alok sa saindang mga paratokdo. An mga nagtatrabaho makakapakipag-olay sa mga katrabaho sa panahon nin mirienda asin ialok an libro sainda. Itao sa gabos na tawo an oportunidad—mga paryente, mga parahatod nin padara, mga ahente na minadolok sa satong pinto, doktor, dentista, abogado, negosyante—na “makadangog kan mga tataramon kan hulang ini.” (Kap. 1:3) Puwedeng mawoton ninda na makaiba sa dai mabilang na dakulang kadaklan na maliligtas sa katapusan kan banal na paghokom nin Dios sa Armahedon.
5 An Topikong Mapag-oolayan iyo an “Siisay an Satong Sasambahon?” Puwedeng iiba sa satong introduksion an impormasyon hale sa pahina 322 kan librong Reasoning (p. 359 sa Tagalog). Hapoton an kagharong kun narisa na nia an kadakol na laen-laen na porma nin pagsamba, asin ipaheling na an tawo igwa kan pangenot na pangangaipo na sumamba sa orog kahalangkaw kisa saiya. Minsan siring, mantang kadaklan na tawo nagsamba sa falsong mga dios, an Kapahayagan 14:7 nagtatao sato nin napapahon na patanid. Ipinapaheling kaini an pangangaipo na sambahon an satong Kaglalang, an tunay na Dios. Ipinapamidbid kan Kapahayagan an gabos na falsong relihiyon sa ngaran na Dakulang Babilonya asin nagtatao nin apurahan na patanid sa Kapahayagan 18:2a, 4. Minsan ngani tibaad an saro matanos sa moral asin naghihingoang gumibo nin marahay sa iba, paano kun nagsusuportar sia sa falsong relihiyosong organisasyon? Dai inooyonan nin Dios an siring na kurso. Ipaheling an librong Revelation asin darahon an atension sa sarong espisipikong punto na pagkakainteresan. Dangan ialok an libro sa ₱42.00.
6 An saindong presentasyon puwedeng iba-iba depende sa ginigibo nindong teritoryo. Repasohon an materyal sa Reasoning na libro sa irarom nin “Religion,” mga pahina 322-33 (p. 359-70 sa Tagalog), asin sa irarom na “Babylon the Great,” mga pahina 49-53 (p. 51-5 sa Tagalog), para sa mga suhestion. Apurahan nanggad na makikabtang kita sa pagpahayag kaining mensahe nin paghokom asin paglaom.—Kap. 14:6, 7.