Naghahanap daw Kamo nin Diosnon na Kadonongan?
1 “Padagos na Hanapon an Natatagong mga Kayamanan” an tema nin nakapahihirong pahayag sa ikaduwang aldaw kan “Banal na Hustisya” na mga Kombension. Kita daw naghihingoa na magin mas maigot na mga parahanap nin mga kayamanan nin kadonongan?—Tal. 2:1-6.
2 Kita magigin maluyang mga parahanap nin kayamanan kun bihira niatong basahon an Biblia o kun dai niato nababasa an Torrengbantayan asin Magmata! Nagkokotkot daw kita nin mga kayamanan na kadonongan sa Tataramon nin Dios kun nag-aandam nin mga pahayag, nagsisimbag sa mga hapot sa Biblia, o naghahanap nin solusyon sa mga problema? An panahon sa pagsiyasat kaipuhan tanganing makanompong nin mga kayamanan sa Biblia, alagad kanigoan na kaogmahan an ibinubunga!—Tal. 3:13-18.
3 Ngonyan magagamit niato an bagong publikasyon na Insight on the Scriptures kaiba an Index, Concordance, Reference Bible, asin iba pang publikasyon sa satong librariya. Abunda nanggad na itinatao sato ni Jehova an tabang na kaipuhan niato sa paghanap kan “hararom na mga bagay nin Dios”!—1 Cor. 2:10.
4 Sa Domingong aga kan kombension, nadangog niato an pahayag na “Pagpapadanay sa Espirituwal na Salud sa Sarong May Helang na Kinaban.” Nagigirumdoman daw nindo kun paano niato malilikayan an espirituwal na helang huli sa mga kaluyahan kan laman, kinabanon na mga impluwensia, asin mga pakana kan Diablo? Ipinaliwanag kan espiker na mapagdadanay niato an espirituwal na salud paagi sa noarin man dai pagpabaya sa pag-adal, pag-atender sa mga pagtiripon, asin paglilingkod sa langtad. An pagsikwal sa maraot na pag-iriba asin marigsok na aling-alingan kan kinaban mantang linilikayan man an mga tawo na “dai oyon sa marahay na mga tataramon” makatatabang sato na mapagdanay an makosog na pagtubod.—1 Tim. 6:3, 4; Tito 1:13.
5 Mantang kinukuyog niato an mga puntong nanodan sa “Banal na Hustisya” na Pandistritong Kombension, magin determinado kita na mag-atento sa Kristianong mga pagtiripon asin sa siring magkamit nin dugang na diosnon na kadonongan.—2 Tim. 2:7.