Paglilingkod na May Bilog na Puso
1 Nagtao si David nin marahay na halimbawa sa paglilingkod ki Jehova na may bilog na puso. An saiyang halimbawa nakaapektar sa bilog na nasyon nin Israel. May bilog na puso na sinda man nagtao nin boluntad na mga dolot para sa pagpatindog kan templo ni Jehova. Namibi si David na ini logod an magin saindang tendensia “sagkod sa panahon na daing katapusan.”—1 Cron. 29:9, 18.
2 Taano an paglilingkod ki Jehova na may bilog na puso ta orog na mahalaga ngonyan, siring kan sa suanoy na Israel? Sa simpleng pagtaram, inooyonan ni Jehova idtong mga naglilingkod sa saiya na may bilog na puso. An parahula na si Hanani nagsabi ki Hadeng Asa: “Kun manongod ki Jehova, an saiyang mga mata naglilibot sa bilog na daga tanganing ipaheling an saiyang kosog para duman sa mga an puso bilog para sa saiya.”—2 Cron. 16:9.
SUPORTARAN AN PANKAHADEAN NA GIBOHON
3 Puwede kitang maglingkod na may bilog na puso ngonyan paagi sa pagsuportar sa gibohon na paghuhulit kan Kahadean sa bilog na kinaban. (Mat. 24:14) An pagtatao nin pinansial na suporta mahalaga, alagad an paggamit kan satong kosog, panahon asin mga abilidad sa pagpalakop kan maogmang bareta iyo an igwa nin mas dakulang halaga. (2 Cor. 9:7) Saindo daw na naeeksperyensiahan an kagayagayahan hale sa paglilingkod na may bilog na puso sa dakulang gibohon ni Jehova?
4 Durante kan Agosto pinakokosog kita na magtaram manongod sa gobyerno na magpapangyari kan paraiso, na nag-aalok kan brochure na Government sa mga tawo. Mantang an kadahasan nag-oorog sa bilog na kinaban, an mga tawo paorog nang paorog na nahahadit manongod sa katoninongan asin seguridad patin marahay na gobyerno. Kita may oportunidad na itokdo an mahohoyo sa Kahadean bilang an solamenteng paggigikanan nin tunay na katoninongan asin seguridad.
PUWEDE DAW KAMONG MAGPAYUNIR SA DAI NA MAHAHALOY?
5 Puwede daw nindong dagdagan an saindong panahon sa paglilingkod sa langtad durante kan Agosto, tibaad sa paglilingkod bilang auxiliary payunir? Paagi sa pagdagdag kan saindong gibohon sa langtad tibaad sa dai na mahahaloy kamo magin kuwalipikado sa paglilingkod bilang regular payunir.
6 Ngonyan na matatapos na an taon nin paglilingkod, kadakol an nagmamaigot na dugangan an saindang paglilingkod sa langtad na may pagtanaw na magin mga regular payunir sa pagpoon kan bagong taon nin paglilingkod sa Setyembre. Naisip na daw nindo iyan? Saindo daw na ikaaareglo an saindong iskedyul tanganing magin sarong regular payunir? Andam daw kamong gibohon na simple an saindong estilo nin buhay, kun kinakaipuhan, tanganing magkaigwa nin orog na panahon sa paglilingkod ki Jehova? (Mat. 6:22) Kun talagang mawot nindong gibohon iyan asin kaya nindo an gibohon na payunir, dumolok ki Jehova sa pamibi asin hagadon an saiyang tabang asin paggiya. (Tal. 16:3) Makiolay sa kamagurangan manongod sa saindong mga linalaoman para sa paglilingkod bilang regular payunir. Kun naheheling nindo na an saindong mga kamugtakan minatogot saindo tanganing magin regular payunir, siertohon na itao an saindong aplikasyon tolos-tolos, o kisuerra 30 aldaw bago mawot nindong magpoon. An pagpoon kan bagong taon nin paglilingkod sarong marahay na panahon tanganing magdesisyon kamong magpayunir kun itinotogot kan saindong mga kamugtakan.
7 Hoben man o gurang, logod na an gabos sa sato magpaheling na kita naglilingkod ki Jehova na may bilog na puso. Noarin man dai niato pagtogotan na an satong puso mabanga. (Mar. 12:30) An satong maigot na pagsuportar sa gibohon na paghuhulit kan Kahadean matabang sato na pagdanayon an bilog na puso ki Jehova.