Mga Hobenes, Epektibong Magpatotoo sa Eskuwelahan
1 An paglilingkod ki Jehova na kamo hoben pa sarong pambihirang bagay. (Ecl. 12:1) Kamong mga hobenes igwa nin espesyal na oportunidad na ihiras an katotoohan sa mga kaklase asin maestro, sarong teritoryo na parateng dai naaabot nin mga adulto. Alisto daw kamong impormal na magpatotoo sa eskuwelahan?
2 Taano ta nasasakitan an iba na magpatotoo sa eskuwelahan? Ini daw huli sa takot sa kun ano an tibaad sabihon kan saindang mga kaklase? (Ikomparar an Marcos 8:38.) Tibaad naeksperyensiahan nindo an siring na takot kan enot kamong magharongharong. Minsan siring, kun pinahahalagahan nindo an pangangaipo kan ibang hobenes para sa katotoohan, hahanapon nindo an mga oportunidad na ihiras sa sainda an mensahe kan Kahadean. (Mat. 9:36-38; Luc. 12:8, 9) Tanganing magibo ini nin epektibo hinahagad an patienot na pag-aandam sa saindong kabtang.
KUN PAANO GIGIBOHON INI
3 Binabasa nin sarong hoben an saiyang librong Bible Stories sa eskuwelahan lambang aldaw durante kan 15 minutos na libreng panahon. Kan an sarong kaklase naghapot manongod sa libro, inimbitaran siang magtukaw tanganing magkaibang konsideraron an estorya. Pakatapos kaiyan galaga siang nagdolok tanganing konsideraron an masunod na estorya. Sinabi nia sa saiyang ina kun ano an saiyang nanonodan. Bilang resulta, an saiyang ina nagpoon nang mag-adal sa Biblia asin mag-atender sa mga pagtiripon kaiba an saiyang aki.
4 Taano ta dai magpaheling nin inisyatiba asin magtaram sa iba manongod sa librong Bible Stories? Bilang halimbawa, puwede nindong sabihon: “An librong ini nagpapaheling kun paanong kaya nin Dios na tawan nin proteksion an saiyang maimbod na mga lingkod. [Bukasan sa estorya 79.] Tinawan ni Jehova nin proteksion si Daniel sa lungib nin leon. Iniisip mo daw na saiyang ililigtas an saiyang banwaan paagi sa pagtapos kan karatan sa ngapit?” Dangan puwede nindong bukasan sa estorya 114 tanganing ipaheling na lalaglagon ni Jehova an karumpotan asin ililigtas an saiyang banwaan.
5 Puwede nindong ibugtak an librong Creation sa saindong tukawan tanganing mamangno ini nin iba. O puwede nindong bukasan sa retrato sa pahina 83 asin hapoton an sarong kaklase o maestro: “Sa paghona mo daw an satong mga apoon arog kaini an hitsura?” Dangan puwede nindong ipakipag-olay an impormasyon sa pahina 89, parapo 19 asin 20. An iba tibaad mapukaw an saindang pag-usyoso kun ipaheling sa sainda an mga titulo kan mga kapitulo na nakalista sa pahina 5. Kun magpaheling sinda nin interes, idemonstrar kun paano puwedeng pag-adalan an libro paagi sa pagbasa nin sarong parapo asin ihapot an hapot sa ibaba kan pahina.
6 Sarong tin-edyer na parahayag sa halangkaw na paadalan an nagbugtak nin pasohan nia na makapoon nin sarong pag-adal sa Biblia. Sarong kaklase nia an igwa nin pirang problema sa saiyang mga magurang asin sinabi sa daragitang Saksi an manongod kaini. Ipinaheling kan hoben na parahayag sa saiya an nababagay na artikulo sa “Ihinahapot nin mga Hobenes . . .” hale sa Magmata! Napahiro an kaklase asin naghapot pa nin orog. Dangan nawarasan sia kan hoben na parahayag nin librong Mabuhay Sagkod Lamang, na ipinaliwanag na makatatabang ini na simbagon an saiyang mga hapot, asin pinonan an pag-adal sa Biblia.
7 Tanganing magin sarong saksi para ki Jehova, maninigo kitang magtaram manongod sa saiya. (Isa. 43:10-12) Sinsero daw kamong nagmaigot na ihiras an katotoohan sa mga kaklase asin maestro sa saindong eskuwelahan? Mag-andam nin interesanteng mga tema na ipakikipag-olay sa sainda. Magmaigot. Patabang sa saindong mga magurang o sa iba. Mamibi ki Jehova na bendisyonan an saindong pagmamaigot, siring na benendisyonan nia idtong sa ibang dakol na hoben na parahayag na epektibong mga saksi para ki Jehova sa eskuwelahan.—Col. 1:9, 10.