Patienot na Pagplano Para sa Setyembre
1 Sa pag-antisipar sa pagpopoon nin bagong taon nin paglilingkod sa Setyembre, marahay na horophoropon niato gabos kun ano an nagibo niato sa nakaaging taon asin kun ano an boot niatong magibo sa maabot na taon. Arog kan sabi ni apostol Pablo: “Sagkod sa inabot na kan satong pag-oswag, magpadagos kitang maglakaw na husay sa iyo man sanang paagi.”—Fil. 3:16.
2 An dakol na hobenes na nag-eeskuwela ginibong pasohan na magpatotoo sa mas dakol nindang kaklase asin pagmaigotan na makapoon nin pag-adal sa Biblia. Kamo na mga magurang asin may mga aking nag-eeskuwela tibaad magin marahay na bulan para sa saindo an Setyembre para sa pag-auxiliary payunir. Girumdomon na an Setyembre ngonyan na taon may limang Sabado asin limang Domingo, kaya dakol an makapag-o-auxiliary payunir sa bulan na ini.
3 Bobooton nin dakol na mapangganang nag-auxiliary payunir sa nakaaging mga bulan na horophoropon na mag-aplay bilang regular payunir poon Setyembre 1 kun itinotogot kan saindang mga kamugtakan. Marahayon nanggad ining paagi na ponan an bagong taon nin paglilingkod!
4 Para sa mga nag-eeskuwela, mag-iiskedyul daw kamo nin oras para sa teokratikong pag-adal saka sa saindong mga leksion? Iyan makatatabang saindo na makuwalipikar sa karera sa bilog na panahon na paglilingkod asin makapagdanay sa dalan pasiring sa buhay. (Isa. 30:21) Puwedeng mawara an mahalagang oras sa pagheling nin telebisyon. Taano ta dai gamiton an oras na iyan para sa teokratikong mga aktibidad?—1 Tim. 4:15.
5 Dai pagpaagihon an oras na garo mga panganoron sa langit, kundi iplano an saindong oras asin magbugtak nin mga pasohan na gamiton an saindong oras sa paagi na magtatao nin onra ki Jehova.—Ecl. 11:4.