Pag-aatubang kan Maogmang Bareta—Paagi sa Paggibo nin mga Oportunidad na Makatao nin Impormal na Patotoo
1 Pinagbotan ni Jesus an saiyang mga disipulo na pasirangon an saindang ilaw. (Mat. 5:14-16) Sa bagay na ini, arogan si Jesus, arog kan ipinaheheling kan aprobetsaran nia an oportunidad na kaolayon an sarong Samaritana sa bobon sa Sicar. (Juan 4:5-30) Kumusta man kita? Ginigibo daw niato an siring na mga oportunidad na makapatotoo?
2 Tibaad may mga okasyon haros aroaldaw na kita makapagpapatotoo. Sa anong paagi? Paagi sa impormal na pagpatotoo. Kun kita alistong mamidbid an mga oportunidad dangan gibohon an paghihingoa, dakol pa an maaabot kan katotoohan.
SIISAY AN PUWEDE NIATONG HULITAN?
3 Apuwera sa pormal na pagpatotoo, puwede kitang magpatotoo sa satong mga katrabaho, kaklase, kasosyo sa negosyo, paryentes asin iba pang kamidbid sa impormal na paagi. Kun nagbibiyahe sa bus, tren o eroplano, tibaad makapagbukas kita nin pakikipag-olay sa mga kapwa pasahero. Kun nagbabakasyon puwede niatong ihiras an maogmang bareta sa mga nagtatrabaho sa hotel, mga trabahador sa gasolinahan asin restawran. Puwede niatong kaolayon an iba mantang naghahalat sa opisina nin doktor. Kun nasa harong tibaad puwede kitang magpatotoo sa pagtaraed, ahente, o parabariwas. Dawa kun kita nasa ospital, puwede kitang magpatotoo sa mga doktor, nars, asin iba pang pasyente.
KUN PAANO POPONAN
4 Kun aram niato na posibleng kita maghalat sa laog kan aldaw, puwede niatong darahon an pinakabagong mga magasin bilang basihan sa pakikipag-olay. O puwede niatong gamiton an sarong tract o pulyeto sa pagpopoon kan orolay. An iba nagsasabi nin sarong bagay na nakaaapod nin atension basado sa sarong presenteng pangyayari dangan hinahagad an reaksion kan tawo. Nadiskobre nin iba na an paghapot nin nakapupukaw sa isip manongod sa sarong presenteng pangyayari puwedeng magbunga nin marahay na patotoo. Sa gabos na kaso, kaipuhan an inisyatiba tanganing may mangyari.
PAGPATOTOO SA TRABAHO
5 An mga may sekular na trabaho puwedeng gumibo nin mga oportunidad na magpatotoo sa mga katrabaho. An duwang tugang na babae sa Georgia guminibo nin lista nin mga katrabaho na pinaghohona nindang interesado. Paagi sa pakikipag-olay sa mga ini, nakapasakamot sinda nin labing 65 librong Revelation asin nakapukaw nin dakol na interes.
6 An saro man na tugang nagdesisyon na magpatotoo sa enot na tumaed sa saiya sa oras kan 15-minutos na pahingalo nia sa trabaho. An lalaking nakaolay nia nagsabi na may aram sia sa katotoohan pero habo niang ipagpadagos iyan. Minsan siring, an tugang nagwalat nin babasahon sa lugar na iyan madaling makua kan lalaki. Sa laog nin anom na bulan an lalaking idto asin an saiyang pamilya gabos nabautismohan.
7 Kun kita alisto asin gustong ihiras an satong paglaom, kita, kapareho ni Jesus, dai palilihison an mga oportunidad na magpatotoo bilang ‘mga ilaw sa kinaban.’—Juan 8:12; Fil. 2:15, 16.