Magtaong Onra sa Kaglalang kan Gabos na Bagay
1 Durante kan ika-19 siglo, guminibo si Satanas nin tusong pakana tanganing butahon an katawohan—an teoriya nin ebolusyon. (2 Cor. 4:4) An teoriyang ini sarong hayag na pagpainda sa kasaysayan kan Biblia manongod sa paglalang asin sa pagkaholog nin tawo sa kasalan. Gigibohon kaiyan na daing kamanungdanan an pantubos na atang ni Jesus asin an mga katokdoan kan Biblia dapit sa Kahadean asin daing sagkod na buhay. Dugang pa, an teoriya nin ebolusyon pinagin pasil an dalan para sa kadahasan asin guerra, seksuwal na inmoralidad, asin gabos na klase nin katampalasanan. Siisay an magpapatanid sa katawohan manongod sa mga peligro kan nakagagadan na katokdoan na ini?
2 Sa bulan nin Hulyo gigibohon niato an siring, mantang magigin kitang sibot sa pagpahayag kan pagigin kaglalang ni Jehova. Itatampok niato an librong Life—How Did It Get Here? By Evolution or by Creation? sa ministeryo sa harong-harong, sa kalye, durante sa mga pagpahingalo sa satong sekular na trabaho, asin sa eskuwelahan. Minamawot niato na an lambang saro makaaram kun paano an teoriya nin ebolusyon dai nagtataong onra sa Kaglalang kan katawohan.
3 Magtao nin Epektibong Patotoo: Kun nagpapatotoo nin impormal o sa harong-harong, tibaad booton nindong makapoon nin pag-orolay paagi sa pagsambit nin mga bareta manongod sa mga opinyon na pinangangaptan nin nagkapirang tawo dapit sa temang ebolusyon. Minsan ngani tibaad an saro nakabasa na o nakadangog na nin kadakol dapit sa argumento asin debate sa temang ini, daing duwa-duwa na manonompongan niang tunay na interesante an direktang kapahayagan sa Biblia manongod sa bagay. Dangan helingon an nakasurat sa Hebreo 3:4. Basahon an teksto asin komentohan iyan nin halipot.
4 Kun an tawo garo baga relihiyoso, puwede nindong sabihon na an relihiyosong mga tawo parate man na nagtatao nin kredito sa impersonal na “Naturalesa” imbes na sa Dios bilang puwersa nin paglalang sa likod kan gabos na makangangalas na bagay na naheheling niato sa kapalibotan. Pero an Biblia malinaw na ipinamimidbid an kaglalang kan makangangalas na unibersong ini. Puwedeng darahon an atension sa Kapahayagan 4:11. Puwede nindong ikonektar an saro o duwang espisipikong punto sa librong Creation asin, kun angay, dagkahon sia na basahon iyan.
5 Sa Eskuwelahan: Sa pagpopoon kan bagong taon nin pag-eskuwela, kamo gabos na hoben na lingkod ni Jehova bobooton na repasohon an saindong librong Creation asin konsideraron an mga paagi tanganing magkainteres kapwa an mga estudyante asin an saindong mga maestro dian. An iba nanompongan na an pagwalat sana kan publikasyon sa saindang tukawan nakaaapod nin mga pag-orolay. An iba dinolok an mga maestro asin namamahala kan eskuwelahan dapit sa temang paglalang asin nakadistribuwir nin nagkapirang libro sa paaging iyan.
6 Kita gabos naggagayagaya sa paglaom na mabuhay sa sarong kinaban kun saen an lambang saro magtataong onra ki Jehova, arog kan ipinahahayag kan mga tataramon sa Kapahayagan 4:11. Kaya gamiton logod niato an librong Creation tanganing makatao saiya nin onra sa satong ministeryo sa Hulyo!