Gamiton an Biblia sa Paglilingkod sa Langtad
1 An ipinasabong na mga tataramon kan Biblia puwedeng magkaigwa nin mapuwersang epekto sa mga tawo. Kaya, kan enot na siglo, si Pablo ‘nakipagrasonan hale sa mga Kasuratan,’ na ipinaliliwanag asin pinatutunayan an saiyang mga punto paagi sa mga reperensia. (Gibo 17:2, 3) Si Apolos, kan nagpapatotoo sa mga Judio, “pinatunayan sa mga Kasuratan na si Jesus iyo an Cristo.”—Gibo 18:24-28.
2 An mga Saksi ni Jehova ngonyan sinusunod an halimbawang ini. Arog kan sinabi sa Marso 1, 1986 na Watchtower, sa pahina 26: “Boot nindang marealisar kan mga tawo na an mensaheng ibinabalangibog ninda bakong hale sa sainda kundi hale sa mismong Tataramon nin Dios. Kaya direkta nindang ginagamit an Biblia, na aktuwal na binabasa iyan sa iba sagkod na posible.” Lubos daw nindong ginagamit an Biblia sa saindong ministeryo?
KUN TAANO TA EPEKTIBO
3 Taano an Biblia ta epektibong gayo? Huli ta iyan “nakamimidbid kan mga kaisipan asin pagmawot kan puso.” (Heb. 4:12) An tunay na mga motibo nin tawo minalataw kun sinda nakadadangog nin Makakasuratan na katotoohan. An mga tawong may sadiosan na puso naaakit dian. Halimbawa, sarong hoben na mag-agom an hinapot kun taano ta marikas na gayo sindang naghimate sa maogmang bareta. An simbag ninda? “Iyan huli sa Biblia.” Namidbid tolos ninda an tingog kan “marahay na pastor” sa Biblia.—Juan 10:14.
4 An marahay na programa sa personal na pag-adal, kabilang an pag-andam para sa gabos na pagtiripon kan kongregasyon, magsasangkap saindo na gamiton an Biblia na may orog na kompiansa. (2 Tim. 3:16, 17) An mga miembro kan pamilya puwedeng magpraktis kan Topikong Mapag-oolayan sa kada saro. Saro pa, an kadaklan na introduksion sa pahina 9-15 kan librong Reasoning may kaibang pagbasa nin teksto. Taano ta dai praktison an iba kaini? Gamiton an praktikal asin nakapupukaw nin interes kan mga tawo sa saindong teritoryo.
GAMITON AN MARAHAY NA PAGHUSGAR
5 May mga panahon na puwede niatong imbitaran an kagharong na kuanon an saiyang sadiring Biblia asin magkaibanan niatong basahon an teksto. Gumamit nin marahay na paghusgar sa siring na kamugtakan. Kun boot nindong magin halipot, puwede kamong magdesisyon na magbasa nin saro sanang teksto sa satong Topikong Mapag-oolayan. O kun an kagharong talagang sibot, puwede sana niatong kotaron an teksto, na sinasabi saiya na iyan hale sa Biblia. Parate ining ginibo ni Jesus asin kan saiyang mga apostol, mantang dai sindang darang personal na kopya. Kita man puwedeng tumuom nin mga teksto na nasa isip na tanganing magamit sa satong ministeryo.
6 Boot niatong ‘gamiton an tataramon kan katotoohan sa tamang paagi.’ (2 Tim. 2:15) An paggibo niato nin siring sa epektibong paagi magpapatotoo na kita mga ministro nin Dios asin na an satong mensahe basado sa saiyang Tataramon.