Pag-aatubang kan Maogmang Bareta—Paagi sa Paggamit kan Biblia
1 “An tataramon nin Dios buhay asin mapuwersa.” (Heb. 4:12) Tangani na iyan lubos na magamit an puwersa asin mabuhay, kaipuhan na iyan basahon asin iaplikar. Tanganing magibo ini, an organisasyon ni Jehova, nangorogna poon kan 1954, sinadol kita na gamiton an Biblia sa satong ministeryo sa harong-harong. Tinokdoan kita na tumao nin tolo- sagkod walong-minutong sermon asin darahon an atension kan mga kagharong sa sinasabi kan Biblia sa mahahalagang bagay.
2 Sa nakakaagi pa sanang mga taon, An Satong Ministeryo kan Kahadean regular na igwa kan Topikong Mapag-oolayan, na igwa nin duwa o tolong teksto para sa sarong tema tanganing gamiton sa paglilingkod sa langtad. Halimbawa, ngonyan an Topikong Mapag-oolayan sa temang “An Gobyerno na Magtatao nin Paraiso,” na itinatampok an paglaom sa Kahadean.
3 Tanganing epektibong magamit an Biblia kaipuhan an praktis asin kamawotan na tabangan an mga tawo na makarealisar na iyan man nanggad an Tataramon nin Dios asin iyan buhay saka mapuwersa. Minsan ngani kita dinadagka na gumamit nin haralipot na pag-aatubang sa pagwaras nin magasin, habo niatong magin pabaya sa paggamit kan Biblia sa ibang kabtang kan ministeryo sa langtad. Total, kita mga estudyante kan Biblia, asin ano pa an mas marahay na paagi na patunayan na kita siring kundi an paghingoa na ipaheling sa mga tawo gikan mismo sa Tataramon nin Dios kun ano an itinatagama ni Jehova para sa katawohan asin sa dagang ini?
TABANG HALE SA LIBRONG REASONING
4 Apuwera sa Topikong Mapag-oolayan sa An Satong Ministeryo sa Kahadean, igwa man kita kan librong Reasoning From the Scriptures. Sa pagrepaso nindo sa mga introduksion na nasa pahina 9-15, manonompongan nindo an mga reperensia sa mga teksto sa Biblia na magagamit sa pag-introdusir kan mensahe kan Kahadean. Kadakol niatong paagi na mabukasan an Biblia tanganing ipaheling sa mga tawo an sinasabi kaiyan.
5 Halimbawa, kun may mga kagharong na nahahadit manongod sa mga gurang, tibaad makatabang na arogon an isinusuherir sa librong Reasoning sa pahina 14 sa temang “Old Age/Death.” Angay nanggad an hapot: “Napag-isip-isip na daw nindo kun taano kita ta naggugurang asin nagagadan? Boot kong ipaheling saindo an isinabi nin sarong pinasabngan na parasurat sa Biblia sa Roma 5:12.” Dangan puwede nindong sabihon: “Alagad minsan ngani sinasabi kan Biblia kun taano kita ta naggugurang asin nagagadan, iyan nagtatao man nin makangangalas nanggad na paglaom para sa ngapit, arog kan maheheling sa Kapahayagan 21:3, 4.” Dangan puwedeng itampok an presenteng alok.
6 Sa mga aldaw na ini parateng gayo na an mga tawo nagsasabi, “Dai, sibot ako.” An dakol talagang sibot, asin dapat niatong saboton na tibaad ini totoo sa kaso ninda. Pero, kun tama an kamugtakan, puwede nindong sabihon: “Aram ko iyan, ta masiboton ngonyan an mga panahon. Pero, boot kong walatan kamo nin saro sanang punto,” dangan bukasan an saro sa mga teksto sa presente niatong Topikong Mapag-oolayan. Pakabasaha kaiyan, puwede nindong sabihon sa madali an alok, magwalat nin angay na pulyeto, o sabihon na mabuwelta kamo tanganing darahon an dugang pang impormasyon hale sa Biblia.
7 Marahay kun naheheling nin mga tawo na kita mga estudyante sa Biblia, eksperto sa paggamit kan Tataramon nin Dios sa satong ministeryo! Iyan nakatatabang sainda na mamidbid an banwaan ngonyan na nagsasarig sa Tataramon nin Dios asin ginagamit iyan sa saindang pan-aroaldaw na buhay. An mga paghihingoa niato na gamiton an Biblia magdodoon sa isip nin dakol na an Tataramon nin Dios talagang buhay, mapuwersa, asin may epekto sa saindang buhay.