Sinusuportaran daw Nindo an Tataramon nin Dios?

¹ Sa sarong kinaban na sa parate dai nagtutubod sa Biblia, maigot na sinusuportaran kan tunay na mga Kristiano an Tataramon nin Dios. Huling kombensido na “an gabos na Kasuratan ipinasabong nin Dios,” minaoyon kita ki Jesu-Cristo, na nagpatotoo paagi sa pamibi ki Jehova: “An saimong tataramon katotoohan.” (2 Tim. 3:16; Juan 17:17) Paano niato epektibong susuportaran an Tataramon nin Dios?

² Pag-adalan an mga Teksto: Daing duwa-duwa na si Jesus mismo mahigos na nag-adal kan Tataramon nin Dios. Pinangyari sia kaini na magtokdo basado sa Kasuratan sa bilog niang ministeryo. (Luc. 4:16-21; 24:44-46) Paano kita magkakaigwa nin dakol na tuom na teksto? Ginigibo niato iyan paagi sa pagbasa kan Biblia aroaldaw dangan paghorophorop sa sarong bersikulo na nanompongan niato na nangorognang nakakaparigon sa boot o nakakatabang sa ministeryo. Kun nag-aandam para sa mga pagtiripon, maninigo niatong hanapon asin basahon nin direkta sa Biblia an sitadong mga teksto asin puede gayod na mag-andam nin komento manongod dian. Kun nag-aatender sa mga pagtiripon, maninigo niatong subaybayan sa satong Biblia an mga teksto na binabasa kan ispiker. Aandamon kita kan pag-adal kan mga teksto sa Biblia na ‘gamiton an tataramon kan katotoohan sa tamang paagi.’—2 Tim. 2:15.

³ Togotan na an Biblia an Magtaram: Mientras na nakikikabtang sa ministeryo, maninigo niatong togotan na an Biblia an magtaram. Halimbawa, kun itinotogot kan mga kamugtakan, maninigo niatong pagmaigotan na magbasa nin sarong teksto sa kagharong. Kun sia maghapot o magkontra, pinakamarahay na an Biblia an gamiton sa pagsimbag. Kun sibot an kagharong, tibaad ikakadoon pa man giraray niato an sarong punto de vista sa Biblia paagi sa pagsabing, “Bago ako maghale, togotan nindo akong basahon sa saindo an tekstong ini.” Kun posible, magbasa nin direkta sa Biblia, na tinotogotan an naghihinanyog na subaybayan an teksto mantang binabasa nindo iyan.

⁴ Kan ipabasa sa sarong kagharong an mga teksto na nagpapahimutik sa Trinidad, sia nagkagsing, “Pirme akong nagsisimba, alagad dai ko nanggad aram na ini palan an sinasabi kan Biblia!” Sia tolos na nag-ako nin pag-adal sa Biblia. Si Jesus nagsabi na maghihinanyog sa saiyang tingog an saiyang mga karnero. (Juan 10:16, 27) An pinakamarahay na paagi para sa mga sadiosan an puso na mamidbid an katotoohan iyo an pagbasa ninda nin direkta sa Kasuratan. Kun siring, magin kitang mga parasuportar kan Tataramon nin Dios nin katotoohan!