Ipahayag an Maogmang Bareta Paagi sa An Torrengbantayan
1 Tunay na napapalaen an Torrengbantayan huli ta iyan paradara nin maogmang bareta. Sa kabaliktaran, an kadaklan na kinabanon na publikasyon nagtatampok nin mga bareta na maraot asin nakamomondo. Paano niato ikapaheheling sa iba na an Torrengbantayan napapalaen, naglalaman nin mensahe na tunay na nakarerepresko?
2 Puwede niatong apodon an atension sa “An Katuyohan kan An Torrengbantayan” sa pahina 2 kan magasin. Idoon na an katuyohan kaiyan pahalangkawon si Jehova, isurat an mga pangyayari sa kinaban na nag-ootob kan hula sa Biblia, magtao nin nakaaaling na mensahe sa mga nasasakitan, asin pakosogon an pagtubod sa mga probisyon nin Dios para sa satong kaligtasan.
3 An sato daw na mga sinasabi manongod sa An Torrengbantayan nagpapaabot nin siring na mga ideya sa nakakokombensir na paagi? Maninigo na an satong sinasabi bako sanang nakaaapod nin atension na mga tataramon tanganing mapalaad an minaagi sanang interes; kaipuhan na iyan may sustansia, minapukaw sa kompiansa na nagpapangyari nin pagmawot na makanood nin dakol pa.
4 Kaipuhan an Pag-andam: Kaipuhan niatong basahon nin maingat an kada magasin, na inaanalisar an laen-laen na pag-aatubang na nasa isip an satong teritoryo. Nadudugangan an satong pakasabot sa pagbasa sa sitadong mga Kasuratan. Maparararom kaini an satong apresasyon para sa katotoohan asin magpapahiro sato na ihiras iyan sa iba. Kun mayo sa satong puso an katotoohan, magigin kadikiton an satong dahelan na magtaram.
5 An ipinaheling na interes kan sarong tawo nagdedeterminar kun ano an satong iaalok. Kun negatibo o indiperente an simbag, an satong isinabing mga tataramon puwedeng igo na. Kun igwa nin mga tataramon nin tunay na pag-apresyar asin pagmawot na makanood pa nin dakol, angay na mag-alok nin suskripsion. Parateng pinakamarahay na papoonon an bagong suskritor sa anom na bulan na suskripsion; puwede iyan na ipadagos kun igwa nin nagdadanay na interes.
6 Dai niato aram kun gurano kahaloy asin kun gurano pa kahiwas na ipahahayag an maogmang bareta. Pero makasisierto kita na an Torrengbantayan magkakaigwa nin dakulang kabtang sa ano man na magigibo. Sa paggamit kan probisyon na ini, maninigo niatong arogon an mga apostol sa pagigin mahigos na “nagtotokdo asin nagbabalangibog . . . kan maogmang bareta kan tataramon ni Jehova.”—Gibo 15:35.