An Torrengbantayan—Espirituwal na Kakanon sa Igong Panahon
1 Sa laog haros nin 114 taon, padagos na nagsasadol an Torrengbantayan sa mga parabasa kaiyan na magdanay na alisto sa espirituwal. An publikasyon na ini nagpapadagos na maimbod na instrumento na nagpapaliwanag sa satuyang dalan sa sarong madiklom na kinaban. (Isa. 60:2) An katotoohan kan Tataramon nin Dios nungka na nababago, pero an satong pakasabot dian nagigin mas malinaw mantang ini ginagamit ni Jehova asin an iba pang instrumento tanganing magtao sato nin espirituwal na “kakanon sa igong panahon.”—Mat. 24:45; Tal. 4:18.
2 Gamiton sa Pinakamarahay an mga Magasin: Puwede niatong ikapaheling an satuyang pagpapasalamat para sa espirituwal na kaliwanagan na satong inako paagi sa entusiastikong pagpapakosog sa mga tawo na basahon an Torrengbantayan. Sa parate, an dakol na tawo nag-aalangan na sumuskribir sa enot na pagdalaw sa pagharongharong o kun impormal na nagpapatotoo. Pero dakol an regular na nagkukua nin tigsararong kopya kan mga magasin asin malinaw na naoogma sa pagbasa kaiyan. An mga tawong ini tibaad apresyaron an oportunidad na makaresibi nin suskripsion. An iba tibaad pilion sanang kumua nin mga magasin sa enot, dangan puwede kamong bumalik tanganing mag-alok nin suskripsion kun ipinaheheling an interes.
3 Paano daw nindo maheheling kun igwa nin tunay na interes minsan ngani an kagharong dai nagsuskribir sa enot na pagdalaw? Mantang itinatampok nindo an saro o duwang punto sa magasin, mangnoha an reaksion kan kagharong. Atento daw siang naghihinanyog? Iginagalang daw nia an Biblia asin sinusundan an pagbasa nin mga teksto sa Biblia? Sinisimbag daw nia an saindong mga hapot? Kun iyo, puwede nindong iareglo an pagdalaw liwat sa laog nin semana asin magkamit nin dugang pang pag-orolay sa panahon na iyan. Sa huri tibaad umoyon sia na sumuskribir tanganing regular na makaresibi nin mga magasin.
4 An bagong mga magasin kaipuhan na makua kan mga parahayag oras na iyan maresibi kan kongregasyon. Kun maresibi nindo an bagong luwas, magin pamilyar na marhay dian. Anong mga tema an pinaghahaditan na gayo kan mga tawo sa saindong lugar? Pankinaban na katoninongan asin katiwasayan? An ekonomiya? Marahay na gobyerno? An palibot? Ekselente nanggad, an Torrengbantayan ginigiyahan an mga tawo pasiring sa saro sanang permanenteng solusyon, an Kahadean nin Dios. (Dan. 2:44; Mat. 6:10) Iyan tunay nanggad na mahalagang regalo gikan sa satuyang “Kaharohalangkaweng Paratokdo.”—Isa. 30:20.
5 Nag-aalok an Mayo nin ekselenteng oportunidad na itao an mas dakol na panahon sa paglilingkod sa langtad. Mantang iyan igwa nin limang Sabado asin Domingo, dakol an malaog bilang auxiliary payunir. Magmahigos logod kita gabos asin entusiastikong pakosogon an gabos na manompongan niato sa Mayo na basahon an Torrengbantayan asin Awake! tanganing mag-ako sinda nin espirituwal na kakanon sa igong panahon.