Parigonon an Interes Paagi sa Epektibong mga Pagdalaw Liwat
1 An kada inandam na marhay na pahayag igwa nin nakapupukaw nin interes na introduksion, nakapag-iimpormar na hawak, asin nakapahihirong konklusyon. An introduksion pinupukaw an atension kan mga nagdadangog, pero kun mayo an hawak asin an konklusyon, an pahayag dai magigin kompleto. An kaparehong prinsipyo minaaplikar sa satong ministeryo. Marahay na pukawon an interes kan kagharong sa enot na pagsongko, pero padagos niatong parigonon an interes na iyan paagi sa epektibong mga pagdalaw liwat.
2 Taano ta tinotogotan nin Dios an kasakitan? Dai daw kamo minaoyon na ini an iniisip kan kadakol na tawo ngonyan? Kaya marahay na ihapot ini sa pagtatapos kan enot na pagdalaw tanganing may sisimbagon kamo sa pagdalaw liwat.
3 Puwede nindong sabihon ini:
◼ “Kumusta. Kan ultimong mag-olay kita, nasambitan niato an pagtogot nin Dios sa kasakitan, asin nanuga akong bumalik para sa impormasyon nindo. An dakol na tawo naghohona na kun an Dios tunay na nagmamakolog sa sato, tatapuson nia an kasakitan. Tibaad arog man kaiyan an paghona nindo. [Pasimbagon an kagharong.] Sinisierto sato kan Biblia na an Dios tunay na nagmamakolog. [Basahon an 1 Juan 4:8.] An Dios may marahay na mga rason sa pagtogot na magpadagos an kasakitan sagkod ngonyan. An sarong rason ipinaliliwanag sa 2 Pedro 3:9. [Basahon.] An iba pang mga rason mababasa sa brochure na ini.” Dangan buksan an pahina 12-14 kan brochure na An Dios daw Talagang May Pagmakolog sa Sato? asin pag-olayan an puntong pagkakainteresan.
4 Sa pagtapos nindo kan pag-orolay, magpalataw giraray nin saro pang hapot asin sabihon sa kagharong na maoogma kamong ihiras sa saiya an interesanteng impormasyon sa pagbalik nindo. An dakol na tawo gustong maaraman kun ano an nangyayari sa sarong tawo kun magadan. Taano ta dai iareglo na pag-olayan an topikong iyan sa kombenyenteng oras?
5 Makatatabang sa saindo na perming girumdomon an tolong pundamental na prinsipyong ini. Magin madaling makibagay. An kagharong tibaad dai tuod na magtagama nin espisipikong panahon sa pag-orolay sa Biblia. Magin halipot. Dai maghaloy na marhay o pag-olayan an kadakol na punto sa primero. Sa kadaklan na kamugtakan, magkakaigwa nin mas marahay na pag-ako sa saindong pagdalaw kun ipakipag-olay nindo an diit sanang punto sa halipot na oras. Magin mainit asin makiamigo. Ipaheling sa kagharong na personalmenteng interesado kamo sa saiya bilang indibiduwal.
6 An enot na pasohan niato iyo na darahon an kagharong sa pag-orolay sa Kasuratan. Dangan boot niatong ponan an mabungang pag-adal sa Biblia sa harong sa sarong angay na publikasyon, arog kan librong Mabuhay Sagkod Lamang. An kagayagayahan na iyan mapasasaindo kun mapasensiang parigonon nindo an enot na interes paagi sa epektibong mga pagdalaw liwat.