Siertohon na Dumalaw Liwat
1 “Sa nakaaging duwang taon, nabasa ko [an librong Creation] nin apat na beses asin padagos akong naghahanga sa maigot na pag-adal, kadonongan, asin pagtao nin dokumentadong ebidensia na ginibo sa pagprodusir kaini. An lambang tawo sa kinaban maninigong igwa kan librong ini. Kun mangyayari ini, an gabos na pagkritika asin pagkaribaraw sa satong pinaghalean patin ateistikong mga paniniwala tolos na mawawara.” Iyan an isinurat nin sarong abogado, na irineport sa Awake! kan Abril 22, 1992, pahina 32.
2 Sa siring kagayon na komento, bako daw maninigong booton niato gabos na ikapasakamot an librong Creation sa pinakadakol na interesado? Dangan kaipuhan na siertohon niato na dumalaw liwat tanganing pukawon an nagpapadagos na interes sa babasahon na ini.
3 Mayo sato an nag-adal nin detalyado sa kadakol na teoriya kan mga ebolusyonista. Alagad, dai niato kaipuhan na manodan an gabos na teoriya kan mga ebolusyonista tanganing ikapaheling sa sadiosan an pusong mga tawo an makosog na ebidensia na an tokdo kan ebolusyon saro pang paagi na ginagamit ni Satanas na halean nin kredito an Kaglalang nin tawo. Dai magduwaduwa na dumalaw liwat huli sa takot na tibaad dai nindo masimbag an teknikal na mga hapot nin nagkapira. An publikasyon mismo nagtatao nin abundang patotoo sa lambang deklarasyon kaiyan.
4 Dugang pa, kadakol kan impormasyon sa kapitulo 16 sagkod 20 mapadapit sa itinotokdo kan Biblia manongod sa pinaghalean kan katawohan, katuyohan nin Dios para sa dagang ini asin sa tawo, asin mga pagpili na napaaatubang sa katawohan ngonyan. Kaya kadakol na makukuang magayon na impormasyon para sa mga pagdalaw liwat.
5 Kun nag-aalangan kamo sa pagdalaw liwat, taano ta dai mag-iba nin saro na mas eksperyensiado o mas nakaaaram sa tokdo nin ebolusyon? Puwede iyan na sarong mas hoben na tugang na lalaki o babae na nag-eeskuwela na mas pamilyar sa presenteng mga teoriya nin ebolusyon. O tibaad may saro sa saindong kongregasyon na dating nagtutubod sa ebolusyon pero nakanood na sa katotoohan kan Biblia asin ngonyan makatatabang na patunayan na falso an mga tokdo nin ebolusyon.
6 Dai mag-alangan na darahon an atension sa kapitulo 19 kan librong Creation asin gamiton an paglaom kan Biblia para sa ngapit bilang basihan sa saindong pagdalaw liwat. An kapitulong iyan igwang dakol na punto na magagamit sa pagdagka sa sarong tawo na makanood sa mga panuga kan Biblia para sa ngapit. Magagamit nindo an kabtang poon sa pahina 236 sa subtemang “The Earth Transformed,” kasunod an “An End to Poverty” asin “No More Sickness, No More Death” sa pahina 238-9.
7 An magayon na publikasyon na ini nakatabang sa dakol na tawo na manompongan an dalan pasiring sa buhay. Puwede ta pang matabangan an iba paagi sa pagdagka sainda na basahon an sinasabi kan librong Creation dapit sa buhay asin kun paano ini naglataw digdi.