Mga Pag-alok na Nakapupukaw nin Interes
1 Maninigo na perming ipaheling niato an mainit, personal na interes sa mga tawo na nanonompongan niato sa ministeryo sa langtad. Ipinaheheling niato an satong paggalang sa saindang punto-de-vista kun hinahagad ta an saindang opinyon. An satong mga paghapot nagpapaanimar sa saindang pag-isip asin pinahihiro sinda na magustong orog pang makanood.
2 Sa Hunyo iaalok niato an librong Life—How Did It Get Here? By Evolution or by Creation? Personal na repasohon an babasahon na ini asin pumili nin espisipikong mga punto na itatampok. Kun ipinakikipag-olay an mga punto hale sa librong Creation, buksan iyan asin pakapotan iyan sa kagharong. Sambiton an espisipikong mga tema asin ilustrasyon.
3 Pakapamidbid, puwede nindong sabihon:
◼ “Sa modernong kinaban na ini, rasonable daw na magtubod na igwang Dios na naglalang sa sato asin sa magayon na dagang ini na satong iniistaran? [Pasimbagon.] Kun hiniheling niato an mga ngangalasan sa daga asin sa uniberso, naghahanga kita sa areglo asin disenyo kaini. Dai daw ini nagpapatotoo sa pag-eksister nin Kaglalang? Helinga an pangangatanosan kan Biblia sa bagay na ini. [Basahon an Hebreo 3:4.] An lambang edipisyo igwa nin kagdisenyo asin kaggibo.” [Iluwas an librong Creation asin buksan sa ilustrasyon sa pahina 114.] Dangan buksan sa pahina 122 asin basahon an paliwanag sa ibaba kan retrato nin sarong relo. An ilustrasyon asin an kinotar na teksto sa pahina 127 puwede man na gamiton. An dugang pang punto makukua sa librong Reasoning, pahina 84-8.
4 O puwede man nindong sabihon:
◼ “Ano sa paghona nindo an kaipuhan sa pagkaigwa nin tunay na katoninongan asin kaogmahan? [Pasimbagon.] An Biblia nagsasabi na kaipuhan niatong midbidon an Dios bilang an Kaglalang kan langit asin daga.” Basahon an Kapahayagan 14:7, dangan buksan an librong Creation sa pahina 140 asin 141, parapo 24 asin 25. Kun nagpapaheling nin interes an kagharong, buksan sa kapitulo 19 asin ipaliwanag kun paano an daganon na paraiso magkakatotoo sa dai na mahahaloy.
5 Kun an kagharong nagdududa sa pag-eksister nin Kaglalang, puwede nindong sabihon:
◼ “Dakol na tawo an oyon saindo, nangorogna huli sa gabos na kasakitan sa kinaban. Kun igwang Dios, taano ta totogotan nia an kasakitan? Makaiisip daw kamo nin rasonableng paliwanag?” Depende sa simbag, puwede nindong ipadagos paagi sa paggamit kan kapitulo 16 kan librong Creation. An dugang pang makatatabang na simbag makukua sa librong Reasoning, pahina 339-400. Kun minsan tibaad angay na magwalat nin tract na Why You Can Trust the Bible.
6 An satong pasohan iyo na makapoon nin mga pag-adal sa Biblia. Kanigoan kita kaogma na magkaigwa kan magayon an pagkailustrar na librong ini na nagpapaliwanag kan katotoohan dapit sa paglalang asin nagtatao nin onra sa satong Dakulang Kaglalang! Gamiton logod niato ini nin marahay durante sa bulan nin Hunyo.