Hapot
◼ Maninigo daw na apodan niato sa telepono an Sosyedad tanganing makakua nin simbag sa mga hapot sa Biblia o para sa personal na sadol?
Kadakol kan minagamit nin telepono tanganing madaling gibohon an mga bagay-bagay, pero sa parate mas pa sa rikas an imbuwelto. Sa kinaban uso an pag-enot sa personal na kaginhawahan; linilikayan nin mga tawo an sadiring paghihingoa.
Kabaliktaran nanggad an maheheling niato sa sadol nin Dios! Dinadagka nia kita na hanapon an kadonongan siring sa natatagong kayamanan, na nangangahulogan kan sato mismong pagigin andam na maghingoa. Nagpapatunay an eksperyensia na an paggibo niato nin siring nagriresulta sa mas nagdadanay na satispaksion.—Tal. 2:1-4.
An siring na paghihingoa angay kun may hapot na lumataw mientras na kita nag-aandam para sa pagtiripon o kun kita napaaatubang sa personal na problema. Imbes na apodan sa telepono an Sosyedad, makikinabang kita paagi sa personal na pagsiyasat sa Biblia asin sa satong mga publikasyon, nangorogna an Watch Tower Publications Index.
Pakatapos niatong ‘hanapon an natatagong kayamanan,’ puwede tang dolokon an saro sa lokal na kamagurangan kun kinakaipuhan pa niato an tabang. Igwa nin eksperyensia an mga magurang sa paghanap nin impormasyon. An saindang timbang na tabang nangorognang angay kun kaipuhan niato nin sadol dapit sa personal na problema o desisyon, huli ta sinda harani sa sato asin sa satong situwasyon.—Ikomparar an Gibo 8:30, 31.
Kun garo baga kaipuhan pa an dugang na impormasyon na direktang hale sa Sosyedad, parateng mas marahay na sumurat. An siring na surat magtatao nin panahon tanganing an simbag magin basado sa bastanteng pagsiyasat, na sa parate imposible kun nag-aapod sa telepono.