Kita Gabos Kaipuhan na Mag-adal
1 Sa atubangan kan saiyang mga disipulo na si Jesus namibi ki Jehova: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Iyo, an gabos na disipulo ni Cristo kaipuhan na kumua nin siring na kaaraman. Magigibo niato ini paagi sa personal asin pampamilyang pag-adal, asin paagi sa pag-atender sa pagtiripon kan kongregasyon. Igwa daw kamo nin praktikal na iskedyul sa regular na personal na pag-adal?
2 An mga bagong interesado nakikinabang na gayo sa pagkaigwa nin personal na pag-adal sa Biblia. Alagad, tanganing magtalubo sa espiritu kaipuhan na sinda magpadagos na kumua nin kaaraman dangan iaplikar an saindang nanonodan. (Heb. 5:13, 14) Ginigibo daw nindo iyan?
3 An hoben na mga lingkod ni Jehova nasa marahay na kamugtakan na kumua nin kaaraman. An saindang isip galagang umako nin impormasyon, asin parate sindang nagmamawot na maaraman an dahelan kan saindang mga inaadalan. Linalang kita ni Jehova na igwa kan kamawotan na ini. Gamiton nin madonong an saindong panahon sa pagkua nin espirituwal na kaaraman, “na tinutubos an panahon” para sa personal na pag-adal.—Col. 4:5.
PERSONAL NA LIBRARIYA
4 Igwa daw kamo nin personal o pampamilyang librariya? Iyan daw igwa nin mga tomo kan Awake! asin The Watchtower, librong Aid, asin kan mga publikasyon na ginagamit niato sa Pag-adal sa Libro kan Kongregasyon asin mga pagtiripon sa Kingdom Hall? Igwa daw kamo kan Watch Tower Publications Index 1930-1985 asin an makukuang daan na mga publikasyon kan Sosyedad?
5 Makakanompong kamo nin mahalagang impormasyon sa daan na mga publikasyon. Nabasa na daw nindo o napag-adalan an pulyetong Jehovah’s Witnesses and the Question of Blood? An daan na mga Yearbook nagtatao kan kasaysayan kan gibohon sa laen-laen na nasyon. An librong “Your Will Be Done on Earth” nagtatao nin marahay na paliwanag kan mga hula asin bisyon sa libro ni Daniel.
6 Kaipuhan an indibiduwal asin pampamilyang pag-adal tanganing magin makosog sa espirituwal asin nasangkapan para sa paglilingkod sa langtad. Kumusta kamo sa bagay na ini? Kamo daw nag-aandam para sa mga pagtiripon kan kongregasyon? Kamo daw nag-aandam para sa ministeryo sa langtad sa paghihingoa na magin epektibo sagkod sa mapupuwede? Binabasa daw nindo an saindong kopya kan Reasoning From the Scriptures? Ginagamit daw nindo iyan sa paglilingkod sa langtad?
7 Gamiton an Index sa paghanap kan simbag sa mga hapot nindo asin kan mga tawong nanonompongan nindo sa ministeryo sa langtad. Madidiskobre nin kamagurangan na an Index mahalagang instrumento sa paghanap nin impormasyon na makatatabang sa mga minadolok sa sainda na naghahagad nin espirituwal na tabang.
8 An Ikaduwang Timoteo 2:15 nagsasadol: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, . . . na ginagamit an tataramon kan katotoohan sa tamang paagi.” Tanganing magibo ini kaipuhan na kita gabos mag-adal asin iaplikar an satong nanonodan.