Ginagamit Daw Nindo an Yaon sa Saindo?
1 Tinawan ni Jesu-Cristo an saiyang mga disipulo nin giya sa mga bagay na manongod sa tunay na pagsamba. Manongod sa pakipag-olay ni Jesus sa duwa niang disipulo, isinurat ni Lucas na si Jesus “nagpaliwanag sa sainda kan mga bagay manongod sa saiya sa bilog na Kasuratan.” (Luc. 24: 27, 32, 45) Sierto nanggad na naginhawahan asin napakosog na gayo an mga disipulo paagi kan saiyang pagtotokdo. Alagad, sa tamang panahon, babayaan sinda ni Jesus. Paano ninda masasabotan an nasurat na tataramon nin Dios kun mayo sia? Maaaraman daw ninda kun paano iaplikar ini sa saindang buhay?
2 Dai binayaan ni Jesus an saiyang mga disipulo na nasa alanganon na kamugtakan, na pinabayaan sa saindang bakong sangkap na paghusgar. Dai nahaloy narealisar ninda na durante kan saiyang pakiiba sa sainda sa daga, nagtao si Jesus nin abundang impormasyon na magagamit nin epektibo para magin giya ninda sa dakol na manlaenlaen na bagay. Nasabotan ninda kun ano an gigibohon mantang saindang “ginigirumdom an mga bagay na sinabi nia.” (Luc. 24: 8; Juan 14:26) Sa tamang panahon, an kadakol na sinabi ni Jesus isinurat sa Tataramon nin Dios para sa kapakinabangan niato.
3 Kan magpoon na magpunsionar an Kristianong kongregasyon, an mga nangengenot nagtabang sa mga tugang na girumdomon an mga itinokdo ni Jesus kan enot. Sa saiyang ikaduwang surat, isinurat ni Pedro: “Pinupukaw ko an saindong malinaw na pag-isip paagi sa pagirumdom, tanganing magirumdoman nindo an mga kasabihan na itinaram kaidto kan banal na mga propeta asin an kapagbootan kan Kagurangnan asin Paraligtas paagi sa saindong mga apostol.” (2 Ped. 3: 1, 2) Kaya, sa kadaklan na kamugtakan, minsan kun an orog kaimportanteng mga bagay an kinokonsiderar, an kaipuhan sana gamiton an dati nang itinao. —Gibo 15: 12-21.
4 An siring na mga instruksion dai nagigin imbalido, o lihis na sa panahon. Sa paglihis nin mga taon, progresibong nagtao si Jehova sa saiyang banwaan nin mas malinaw na pagsabot kan saiyang kabotan. (Tal. 4:18) An mga pagbabago sa pagkasabot marahay na ipinaliwanag asin dokumentado nin malinaw kan organisasyon. Sa gabos na ini, nagdanay na parareho an pundamental na mga prinsipyo. Kaya ngani, bilang halimbawa, an Sermon sa Bukid ni Jesus praktikal man ngonyan siring kan panahon na ipahayag nia ini mga 2,000 na taon na an nakaagi. Dai kinakaipuhan an bagong mga kapahayagan nin katotoohan mantang itinao na an kinakaipuhan niato.
PAGTATAO KAN PRESENTENG ESPIRITUWAL NA PANGANGAIPO
5 Poon kan mga taon nin 1870, an modernong Kristianong kongregasyon progresibong nag-abante sa pagkakaigwa nin orog na malinaw na pagkasabot sa Tataramon ni Jehova. Sa paglihis nin mga taon, an dakol na manlaenlaen na hapot luminataw na nangangaipo nin maliwanag na mga simbag. “An maimbod asin madonong na oripon” nagtao nin siring na “kakanon sa igong panahon.” (Mat. 24:45) Saro-saro, siniyasat nin marhay an mga hapot sa liwanag kan katotoohan sa Biblia, asin itinao an espisipikong giya sa banwaan ni Jehova. Gabos na impormasyon na ini itinao sa sato paagi kan mga publikasyon kan teokratikong organisasyon, partikularmente an magasin na Watchtower.
6 Sa pagrepaso kan mga napublikar sa nakaaging mga taon, maliwanag na an mga publikasyon nin Sosyedad nagtao na nin paggiya sa haros ano man na tema kan Biblia na maisip. An mga katokdoan sa doktrina naanalisar na nin marhay. An mga prinsipyo manongod sa Kristianong paggawe malinaw na ipinaliwanag. Asin an mga kahagadan sa paghaman kan dakulang gibohon nin paghuhulit maingat na itinao. Bilang resulta, sarong kayamanan nin impormasyon sa Biblia an natipon para sa kapakinabangan kan gabos. Halimbawa, an mga tomo nin Watchtower asin Awake! mga tambobong nin instruksion. Kun igwa kita nin mga tomo kan Watchtower asin Awake! poon kan 1960 sagkod 1988, garo man sana kita igwa nin 58-tomong ensiklopedya na pano nin mahalagang Makakasuratan na kaaraman siring man nin mga impormasyon sa dai mabilang na langtad. An artikulong “Mga Hapot Hale sa mga Parabasa” nagsiyasat sa ginatos na kahapotan. Mayo na kita haros na masambit na tema na dai nakobrehan sa ano man na paagi sa saro sa mga publikasyon. Kun siring, kun kaipuhan niato an giya sa ano man na paagi, simpleng bagay sanang girumdomon kun ano an iinapod sa satong atension kan nakaagi.
7 Minsan siring, an paghanap nin espisipikong impormasyon na kaipuhan niato tolos tibaad sarong dakulang gibohon kun nananarig sana kita sa satong sadiring memorya. Makaoogma, an organisasyon nagtao kan Watch Tower Publications Index 1930-1985 na magagamit niato tanganing hanapon an espisipikong mga detalye sa nagkapirang minuto sana. An Index nagtotokdo sa labing 200 na publikasyon na luminuwas sa laog nin 56 na taon. Nanodan na daw nindong gamiton an Index sa paghanap nin impormasyon na kaipuhan nindo? Ginagamit daw nindo an yaon na sa saindo? Siring man, sa panapanahon igwa nin mga Index sa manlaenlaen na tataramon, asin may ibang publikasyon na igwa nin sadiring index.
MAGIN PARAGIBO—BAKONG MALINGAWON NA PARADANGOG
8 An organisasyon, paagi kan mga publikasyon kaini, minatabang sa sato na maaraman an kabotan ni Jehova. Kaipuhan kita na magin paragibo asin iaplikar an satong nanodan imbes na magin malingawon na paradangog. (Sant. 1:25) An ano man na iinapod sa satong atension dai niato maninigong ibilang na instruksion na puwedeng pagpalimanlimanan asin lingawan pagkatapos nin madalian na pagkonsiderar. Imbes, kaipuhan kitang maghinanyog na may kaisipan na girumdomon ini kun igwa nin pangangaipo kaini sa ngapit. Tanganing magibo iyan, “kinakaipuhan na kita magtao nin orog kisa dating atension sa mga bagay na satong nadangog.” —Heb. 2:1.
9 Paano kita ‘magtatao nin orog kisa dating atension’? An Marso 15, 1989, na Watchtower, sa pahina 14, nagpapaliwanag na: (1) Kaipuhan niatong apresyaron an organisasyon ni Jehova asin ipaheling ini paagi sa pakipagtabangan asin regular na pag-atender sa pagtiripon. (2) Kaipuhan kitang magin mahigos sa personal na pag-adal kan Tataramon nin Dios asin kan mga publikasyon na itinao kan klaseng oripon. (3) Mahalaga na maghorophorop kita sa mga bagay na satong nanodan tanganing ikaaplikar ini sa satong buhay asin magamit sa pagtabang sa iba.
10 An mga publikasyon nagtatao nin padagos na instruksion kun paano makaya an mga angat na nakaaatubang niato sa pagbuhay kan satong pamilya, pagdanay na malinig sa moral, asin sa pagtratar sa iba. Ano an saindong reaksion sa instruksion na iyan? Minamansay daw nindo iyan na may apresasyon, na maingat na tinatandaan an mga bagay na minaaplikar sa saindo nin personal? O minamansay nindo iyan na sarong bagay na may madalian, minaaging pakinabang? An apresasyon maninigong magpahiro sa sato na sagomon an impormasyon asin horophoropon ini sa katuyohan na girumdomon ini ngapit asin gamiton ini nin orog. —Isa. 48:17.
11 Orog pa an kaipuhan niatong gibohon kisa sa pagbasa sana kan itinao na. Parate na iyan nagigin iregular asin pan-ibabaw. Imbes, kaipuhan niatong pag-adalan ini. An pag-adal nangangahulogan na ipako an saindong isip sa sarong tema nin sistematiko tanganing manodan ini para gamiton sa ngapit, na gibohon an sarong bagay na tema nin pagkonsiderar tanganing isagibo. Nangangahulogan ini na an satong kaisipan manongod sa materyal an aktuwal na minadeterminar kun gurano kararom na matatanom ini sa satong isip asin ikaaaplikar sa satong pan-aroaldaw na buhay. Sa satong pag-adal, maninigo na padagos niatong ihapot: Paano ini minaaplikar sa sako? Paano ko magagamit ini tanganing orog akong mag-oswag sa espirituwal? Anong mga pagbago an kaipuhan kong gibohon? Paano ko magagamit ini tanganing makatabang sa iba? Paano ko ipaliliwanag ini sa iba?
PAGPAOSWAG KAN SATONG MINISTERYO SA LANGTAD
12 An An Satong Ministeryo sa Kahadean regular na nag-aanalisar kan mga pangangaipo asin kamugtakan sa ministeryo sa langtad, na nagtotokdo nin mga paagi tanganing tabangan kita na magkaigwa kan pinakaepektibong resulta. Mantang ini bulanan na ipinupublikar, kamo daw may kiling na mansayon an mga instruksion kaini na balido o angay sana sagkod sa masunod na isyu? An saro sa pundamental na pasohan sa ministeryo kaidto pa perming iyo an pag-abot sa puso nin mga tawo kan mensahe kan Kahadean. An interes nin tawo, mga emosyon, asin kaisipan nagdadanay na pareho sa nag-aging mga taon. An dakol na manlaenlaen na paagi puwedeng gamiton nin epektibo tanganing pukawon an interes. Ipinapaaram sana sa sato kan An Satong Ministeryo sa Kahadean an mapangganang mga ginagamit nin iba. Mantang isinuherir an nagkapirang pagkalaenlaen sa laog nin sarong peryodo nin panahon, an pundamental na mga paagi nagdadanay na pareho. An presenteng mga suhestion tibaad itinao na kan nakaagi, asin tibaad gamiton pa sa ngapit.
13 An saro pang nangongorog na probisyon iyo an librong Reasoning. An pahina 8 nagpapaliwanag na an “paggamit kan librong ini makatatabang saindo tanganing kultibaron an abilidad na makipagrasonan hale sa Kasuratan asin gamiton iyan nin epektibo sa pagtabang sa iba.” Kadakol na parahayag an nagsambit nin kawiliwiling mga eksperyensia na nagpapaheling kun paano ginamit an librong ini tanganing magkaigwa nin nakaoogma nanggad na resulta. An impormasyon kaini praktikal na gamiton sa haros ano man na kamugtakan na satong naaatubang sa ministeryo. Magigin kapakipakinabang nanggad na repasohon an piniling mga kabtang bago makikabtang sa paglilingkod sa langtad sa lambang semana. Kaipuhan kitang magdara permi nin sarong kopya sa satong bag. Irinekomendar na iiba niato ini sa iba pang publikasyon na regular niatong dinadara sa mga pagtiripon. Paagi sa perming pagdaradara kaiyan asin sa pagkabisado kan laog kaini, tunay na kita nagmamaigot na gayo tanganing magin “andam nanggad para sa lambang marahay na gibo.” —2 Tim. 3:17.
14 Nagpapaheling kita nin apresasyon sa gabos na itinao ni Jehova paagi sa paggamit kaini nin marhay sa satong ministeryo. An kinakaipuhan na espirituwal na pagkakan kaiba an giya sa satong ministeryo itinaong abunda sa sato. Kaipuhan kitang “maghorophorop sa mga bagay na ini; ipanongod mo dian an bilog mong buhay.” (1 Tim. 4:15) Makatatabang ini sa sato tanganing girumdomon an kaipuhan niato sa angay na panahon. Kun kaipuhan niato an tabang sa paggirumdom, igwa kita nin mga publikasyon na dinisenyo tanganing pahiroon an satong memorya. Imbes na perming maghalat sa mga bagong bagay, kaipuhan kitang may pagpapahalagang magpasalamat sa kun ano an igwa kita asin gamiton ini nin lubos. Sa paggibo kaini, ipaheheling niato na kita mga maygurang na “huli sa paggamit kan saindang kakayahan nin pagmansay napatood na mamidbid kun ano an tama asin sala.” —Heb. 5:14.