Nangangatanosan daw Kamo Gikan sa Kasuratan?
1 An sarong eksperyensiadong soldados na minaduman sa ralaban lubos na armado. An sarong ekspertong artesano na nag-aandam sa pagtrabaho sa sarong proyekto nin pagtotogdok dadarahon an mga gamit na kaipuhan nia tanganing mahaman an trabaho. An sarong lingkod ni Jehova na nakikikabtang sa ministeryo sa langtad bibitbiton an saiyang “minasbad” asin ekspertong gagamiton iyan. (Efe. 6:17) Totoo daw ini sa saindo personalmente? Pinapagtataram daw nindo an Tataramon nin Dios tangani na an banal na espiritu makataros sa puso kan mga nagdadangog saindo?—Tal. 8:1, 6.
2 An paghuhulit bakong perming pasil. An mga nakakaolay niato parateng sibot, na kakadikit an itinataong oportunidad para sa pag-orolay sa Biblia. Mantang an Biblia an pinakangreperensia niato, paano ta iyan orog na magagamit sa paglilingkod?
3 Sa Lambang Oportunidad: Sa kada harong, boot niatong gamiton an Biblia sa pagmotibar sa kagharong. Kaipuhan kitang magin andam sa paggibo kaini ano man an publikasyon na iinaalok. Kun sibot an tawo asin mayo nang oras na mabuksan an Biblia, makakokotar daw kamo nin teksto bago ialok an literatura? Iyan sana puwede nang magpangyari sa tawo na umontok asin maghinanyog.—Heb. 4:12.
4 Halimbawa, kun saindong itinatampok an Disyembre 8, 1993 na Awake! sa “A World Without Disease,” pakatokdoan kan ilustrasyon sa tutob, palatawon an hapot na, “Naniniwala daw kamo na magkakaigwa pa nin katapusan an helang, na an gabos magkakamit nin marahay na salud?” Ano man an simbag, tibaad puwede nindong basahon o isabi dangan itao an kahulogan nin sarong teksto, arog kan Isaias 33:24 o Kapahayagan 21:4. Sa paaging ini pinapagtataram nindo an Tataramon nin Dios.
5 Sa mga Pagdalaw Liwat: Maninigo kitang mag-andam bago dumalaw liwat. Alagad sa parate, malataw an mga tema na dai man niato pinag-andaman. Ini an panahon na puwedeng magin mahalagang instrumento an Reasoning From the Scriptures. An satong pagkotar o pagbasa kan mga teksto sa librong Reasoning matabang sa mga tawo na masabotan na kita mga ministro nin Dios asin bakong mga parapabakal kan Tataramon.—2 Cor. 2:17.
6 Sa pagdalaw liwat na mayong espisipikong tema na pinag-olayan, puwede nindong buksan an librong Reasoning sa sarong angay na tema, arog kan “Jesus Christ,” “Last Days,” o “Resurrection,” asin gamiton an saro sa mga subtema tanganing maponan an pag-orolay. An kagharong puwedeng pabasahon kan nagkapirang teksto sa sainda mismong Biblia. Sa siring na paagi an Biblia magigin buhay para sa sainda, asin an banal na espiritu ni Jehova mabulos kun matanos an kaisipan ninda.
7 Seryosong bagay an satong paninimbagan na ihulit an maogmang bareta asin patanidan an mga maraot. Iyan mensahe ni Jehova, bakong niato. Togotan an saiyang Tataramon, an minasbad kan espiritu, na tumabang sa saindo.