Tabangan an mga Estudyante sa Biblia na Mag-andam Para sa Saindang Pag-adal
1 An mga estudyante sa Biblia na nag-aandam para sa saindang pag-adal kada semana sa parate mas marikas an pag-oswag kisa duman sa mga dai nag-aandam. Kun minsan an estudyante tibaad dai mag-andam huling dai sia tatao. Tibaad kaipuhan na tokdoan sia kun paano mag-aandam. Paano ini magigibo?
2 Sa kapinonan mismo, magtao nin panahon tanganing masierto na nasasabotan kan estudyante na kabale sa pag-aandam an personal na pag-adal. Dakol na tawo an dai natokdoan kun paano mag-adal. An pahina 33-43 sa Theocratic Ministry School Guidebook nagtatao nin nakatatabang na mga suhestion na puwede nindong ihiras sa estudyante kun kinakaipuhan.
3 Ipaheling sa Estudyante an Halaga nin Pag-adal: Ipaheling sa estudyante an saindong libro asin kun paano nindo lininyahan an pangenot na mga termino. Ipaheling saiya kun paano an minarkahan na mga kabtang na ini makakapagirumdom saiya kan mga punto na puwede niang ipahayag sa sadiri niang mga tataramon. Sa siring dai sia masusugotan na magbasa sa libro kun minasimbag. An tamang pagpapatood tatabangan sia sa huri na makatao nin marahay na mga komento sa mga pagtiripon. An saiyang mga komento magpapabanaag nin pag-apresyar sa materyal asin magpaparisa kan rarom kan saiyang pakasabot.
4 Tokdoan Siang Gamiton an Biblia: Kaipuhan na manodan kan estudyante kun paano hahanapon an mga teksto sa materyal na pinag-aadalan. Kun epektibo niang nagigibo ini, orog niang maaapresyar nin lubos na sia talagang estudyante sa Biblia. Minsan ngani tibaad sa primero kaipuhan niang gamiton an listahan nin mga libro nin Biblia sa enotan kan Biblia, maninigong dagkahon an estudyante na tuomon an pagkasurunodsunod kan 66 na libro kan Biblia. Kun binabasa nia an sarong teksto, tabangan siang maheling an kabtang na nagsusuportar sa puntong pinag-oolayan sa parapo asin dai malingling sa mga kabtang na dai man direktang konektado sa pag-adal.
5 Mantang nag-ooswag an estudyante, dagkahon siang basahon an Biblia poon sa kapinonan sagkod sa katapusan. Idoon na an bilog na Biblia iyo an ipinasabong na Tataramon nin Dios asin na an tunay na mga Kristiano dapat na pinatatalubo kaiyan sa espirituwal.—Mat. 4:4; 2 Tim. 3:16, 17.
6 Iintrodusir an Ibang Teokratikong Reperensia: Kun igo na an pag-oswag kan estudyante, puwede na siang pumoon na gumamit nin iba pang teokratikong reperensia. Dagkahon siang hanapon an dugang pang impormasyon sa mga publikasyon kan Sosyedad na mamimidbid nia mantang sia nag-aatender sa mga pagtiripon sa kongregasyon. Tokdoan sia kun paano gagamiton an espesyal na mga kabtang kan New World Translation, arog baga kan “Bible Words Indexed.” Mantang pinaooswag nia an saiyang teokratikong libreriya, ipaheling saiya kun paano gagamiton an Comprehensive Concordance, Reasoning From the Scriptures, an Index, asin an mga tomo nin Insight.
7 Kun totokdoan ta an mga estudyante sa Biblia kun paano mag-aandam para sa saindang pag-adal sa Biblia, sasangkapan niato sinda na padagos na umoswag sa katotoohan dawa tapos na an saindang personal na pag-adal sa Biblia sa harong.