Ialok an Pinakamarahay na mga Magasin sa Kinaban
1 An nakasurat na katuyohan kan An Torrengbantayan “omawon si Jehova Dios bilang Soberanong Kagurangnan kan uniberso.” An Awake! “para sa kaliwanagan kan bilog na pamilya. . . . An magasin na ini orog na nagpaparigon sa pagsarig sa panuga kan Kaglalang na sarong matoninong asin tiwasay na bagong kinaban.”
2 Itatampok niato an mga magasin na ini sa satong ministeryo durante kan Abril asin Mayo. Tanganing magin epektibo, kaipuhan na basahon niato an kada luwas, na rinirisa an mga punto na puwede niatong gamiton kun iinaalok an mga iyan. Pagmaigotan na umisip nin sarong bagay na masasabi nindo na makatataros sa puso kan mga tawo asin makapahihiro sainda na orog pang makanood.
3 Pagtampok kan Abril 1 Luwas: An kadaklan na tawo nagmamawot para sa sarong mas marahay na kinaban, saro na mayo kan dakol na problema na naghahabon sainda ngonyan kan saindang kagayagayahan.
Pakapamidbid niato, puwede tang sabihon:
◼ “Boot kong ipaheling saindo an sarong komento na sinabi sa artikulong ini na ‘Sarong Mas Marahay na Kinaban—Pangatorogan daw Sana?’ Iyan nagsasabi: ‘An kinaban na ini, an satong kinaban, bako nanggad na pinakamarahay na lugar. . . . An listahan nin presenteng mga kasakitan garo baga mayo nin katapusan.’ Pero togotan nindo akong ipaheling saindo an sinasabi kan Salmo 37:11 manongod sa ngapit.” Kun marahay an reaksion kan kagharong, buksan sa artikulong “Sarong Mas Marahay na Kinaban—Harani Na!,” pahina 4, asin magsabing: “Nagkapirang teksto sa Kasuratan an sinisitar, kaiba na an saro na binasa pa sana niato sa Salmo 37:11. Naniniwala ako na maoogma kamo sa pagbasa kan mga artikulong ini. Naoogma akong iwalat iyan saindo.” Kun angay, sambiton an suskripsion tanganing regular sindang magresibi nin siring na mga artikulo.
4 Pagtampok kan Abril 15 Luwas: An artikulo sa pahina 4 naghahapot: “Saen Kamo Makanonompong nin Masasarigan na Paggiya?”
Pakapamidbid kan saindong sadiri, puwede nindong sabihon:
◼ “Igwa nin kadakoldakol na problema sa kinaban ngonyan, siring baga kan [magsambit nin sarong bagay na ikinahahadit sa komunidad o nin sarong tampok na bareta]. Pinahohorophorop kita kaiyan kun makanonompong pa kita nin solusyon sa mga problemang ini. Makaoogma, inaasegurar sato kan 2 Timoteo 3:16, 17 na an Biblia giya pasiring sa sarong tiwasay na dalan nin buhay. Paagi sa pagsuskriber sa An Torrengbantayan makareresibi kamo nin regular kan giyang ini.”
5 Kun boot nindong itampok an Awake!, puwede nindong gamiton an Mayo 8 luwas asin an artikulong “Real Hope for the Children?” An kadaklan na magurang napahihiro an boot kan mga pangangaipo nin kaakian asin boot na maaraman kun ano an puwedeng gibohon tanganing matabangan sinda.
6 Kun entusiastiko kita manongod sa satong mga magasin, an pinakamarahay sa kinaban, magigin kitang galagang ipasakamot iyan sa iba tanganing sinda makaomaw man ki Jehova bilang an Soberanong Kagurangnan kan uniberso.—Sal. 83:18.