Hanapon an mga May Tamang Tendensia
1 An sarong katuyohan kan satong paghuhulit iyo na hanapon idtong mga “may tamang tendensia sa buhay na daing katapusan.” (Gibo 13:48) An pagwaras kan Torrengbantayan asin Awake! ekselenteng paagi na maotob ini. Itatampok niato an mga magasin ngonyan na Abril. Linalaoman na, kun may manompongan na interes, makapopoon kita nin bagong mga pag-adal sa Biblia sa librong Kaaraman na Minagiya Pasiring sa Buhay na Daing Katapusan. Uya an nagkapirang suhestion na puedeng magin epektibo sa saindo:
2 Ginagamit an Abril 1 “Torrengbantayan,” na nakasentro sa pahayag-publiko kan nakaaging taon na pandistritong kombension na, “Omawon an Hade sa Panahon na Daing Sagkod!,” puede nindong sabihon ini:
◼ “An dakol na tawo na nakakaolay niamo nagtutubod sa Dios. An iba nasasakitan na magtubod sa saiya. Ano sa paghona nindo? [Pasimbagon.] Napalilibotan kita nin tunay na mga ebidensia na nagpapatunay na siertong igwa nin Dios. [Basahon an Salmo 104:24.] Kun nakaheheling kita nin kamera o komputer, aram niato na siertong ginibo iyan nin sarong intelihenteng kagdisenyo. Makatanosan daw na sabihon na an orog kakomplikadong mga bagay, siring baga sa daga asin kitang mga tawo nagkanorongod na sanang naglataw?” Gumamit nin sarong parapo sa artikulo tangani na ipaheling an marahay na dahelan sa pagtubod sa Dios. Kun ipinaheheling an interes, ialok an mga magasin.
3 An Abril 15 “Torrengbantayan” nagtatampok kan artikulong “Kun Taano an Tunay na Pagsamba ta Nag-aako kan Bendisyon nin Dios.” Bago iyan iatubang, puede kamong maghapot:
◼ “Sa ginatos na relihion na nag-eeksister sa kinaban, sa paghona daw nindo an gabos na iyan ooyonan nin Dios? [Pakomentohon.] Ihinula ni Jesus na sa ibong kan mga paghihingako nin dakol na relihiosong tawo, an mga dai naggigibo kan kabotan nin Dios isisikwal. [Basahon an Mateo 7:21-23.] Importante na ipamidbid niato an tunay na relihion na itinokdo ni Jesus.“ Buksan sa temang “Anong Bunga an Kaipuhan na Paluwason kan Tunay na Relihion?,” poon sa pahina 16, asin pag-olayan an sarong halimbawa tanganing iilustrar an punto.
4 Kun tinatampok an pangenot na topiko sa Abril 22 na “Awake!” na, “When Wars Will Be No More,” puede nindong konsideraron na sabihon:
◼ “Sa siglong ini nagkaigwa na nin ginatos na guerra, kabale an duwang guerra mundial. Pero haros an gabos na namomoon sa kinaban nagsasabi na gusto ninda nin katoninongan. Kun gusto kan gabos nin katoninongan, taano ta dai ninda iyan nakakamtan? [Pasimbagon.] Ano sa paghona nindo an kaipuhan tangani na makaheling kita nin tunay na katoninongan digdi sa daga?” Pakasimbag kan kagharong, buksan sa pahina 8 asin 9 patin basahon an mga teksto na arog baga kan Salmo 46:8, 9. Gamiton an mga retrato asin teksto na kinotar tangani na ipaheling kun paano an Kahadean nin Dios magdadara nin katoninongan sa bilog na kinaban na magdadanay sagkod lamang. Dangan ialok an magasin asin iareglo na bumalik.
5 Siertohon na tawan an gabos na nanonompongan nindo nin oportunidad na makinabang gikan sa pagbasa kan An Torrengbantayan asin Awake!, na nagdadara nin “maogmang bareta dapit sa orog karahay.”—Isa. 52:7.