Lubos na Pagkinabang sa Teokratikong Paadalan sa Pagmiministro
1 An Teokratikong Paadalan sa Pagmiministro sinasanay kita sa “abilidad sa pagtotokdo” tanganing makatokdo kita sa epektibong paagi kan mga katotoohan sa Biblia. (2 Tim. 4:2) Nag-aako kita nin pagmansay sa manlaenlaen na topiko sa Biblia kada semana. Paano daw kita lubos na makikinabang sa pagtotokdo na itinatao kan paadalan na ini?
2 Tawan nin atension an pambukas na mga komento kan paraataman sa paadalan mantang itinatampok nia an mga punto na puwede nindong manodan durante kan pagtiripon. Isipon an mga hapot na tibaad palatawon nia asin kun paano nindo puwedeng simbagon an mga iyan sa saindong ministeryo.
3 An pahayag na nagtotokdo bako sanang repaso kan materyal. Nakasentro iyan sa praktikal na halaga kan impormasyon sa saindo personalmente. Makakatabang saindo an patienot na pag-andam na makakonsentrar nin marhay sa pangenot na mga punto asin makikabtang sa berbal na pagrepaso na kasunod.
4 An pagsubaybay sa semanal na pagbasa sa Biblia makakapararom kan saindong pagpahalaga sa Tataramon nin Dios. Puwedeng maghayag an dagdag na pagsiyasat nin dakol na interesanteng detalye na makadadagdag sa saindong pakasabot sa katotoohan. An mga tampok sa Biblia labi pa sa pag-otro sana kan rekord sa Biblia. Pakarepaso nin halipot sa kabilogan, itatampok kan espiker an lataw na mga punto asin ipaheheling kun paano iyan konektado sa satong buhay asin pagsamba. Magin atentibo tanganing makanood kun paano iaaplikar an pagtotokdo sa Biblia.—Sal. 119:105.
5 Kun inasignaran kamo nin pahayag nin estudyante, mangnoha an punto nin sadol na paooswagon nindo. Basahon an mga suhestion sa School Guidebook sa kuwalidad na iyan sa pagtaram, asin pagmaigotan na iaplikar iyan. Kun nagpipili nin materyal, idoon an mga punto na puwedeng gamiton sa langtad.—sg p. 96-9.
6 Kun kamo tugang na babae na inasignaran na magtao kan Pahayag Num. 3 o Pahayag Num. 4, iatubang an materyal sa sarong realistikong kamugtakan. An kagharong puwedeng umoyon o dai sa gabos na sinasabi nindo; ipaheling kun paano nindo tatabangan an indibiduwal na mangatanosan sa mga prinsipyo kan Biblia. (sg p. 153-8) Tinatabangan kaini an mga nagdadangog na atubangon an kaparehong mga pagkontra na nanonompongan sa paglilingkod sa langtad. Andamon asin patienot na ensayohon nin marhay an pahayag. Dai maninigong kaipuhanon na mag-ensayo kun nagpoon na an pagtiripon.
7 Dinadagka an mga estudyante na magtatao nin pahayag na tumukaw sa harani sa atubangan kan hall. Nakaeekonomiya ini sa panahon asin nagpapangyari sa paraataman sa paadalan na ikatao an saiyang mga komento sa mas personal na paagi. An gabos makikinabang sa maboot, espisipikong mga suhestion na itinatao nia basado sa School Guidebook. Puwedeng dai nia sunodon an pagkasunodsunod na itinao sa Speech Counsel slip; mapili sia nin sarong punto nin sadol basado sa presenteng pangangaipo nindo tanganing magibo an pinakamarahay na pag-oswag.
8 Ini gabos marahay na dahelan para sa sato na mag-andam para sa asin umatender sa Teokratikong Paadalan sa Pagmiministro kada semana. An pagtotokdo na satong inaako makakatabang sa sato na magin madonong asin eksperto sa satong ministeryo.—Tal. 1:5.