Andamon an mga Estudyante sa Biblia Para sa Ministeryo
1 An satong pasohan sa pagkondukta nin mga pag-adal sa Biblia iyo na gumibo nin bagong mga disipulo na maiba sa sato sa pagtotokdo sa iba. (Mat. 28:19, 20) Kaya an satong katuyohan bako sanang ihiras an kaaraman; boot niatong itadom sa satong mga estudyante an odok sa pusong pagtubod asin andamon sinda na ihiras sa iba an saindang paglaom. (2 Cor. 4:13) Paano niato sinda matatabangan na magin kuwalipikadong magtokdo sa iba?—2 Tim. 2:2.
2 Ibugtak an Ministeryo Bilang Sarong Pasohan: Sa pagpoon mismo, liwanagon na an tunay na pagsamba kalabot an ‘pagpahayag sa publiko para sa kaligtasan.’ (Roma 10:10) An sato mismong ngaran, mga Saksi ni Jehova, nagpaparisa na kaipuhan tang makipag-olay sa iba. Tabangan sindang masabotan na an pagkatokdo sainda bako sanang para sa saindang sadiring kaligtasan. Kun sinda magin mga paratokdo mismo, an mga nagdadangog sa sainda igwa man nin oportunidad para sa kaligtasan.—1 Tim. 4:16.
3 Repasohon an Nanodan: An mga repaso sa panapanahon nakakatabang sa estudyante na tumalubo sa espirituwal mantang an bagong manodan na mga katotoohan nakakatadom sa saiyang isip asin puso. Naeksperyensiahan niato mismo ini kun nagsisimbag sa repasong mga hapot na kaiba sa Pag-adal kan Torrengbantayan kada semana. Mag-andam nin simpleng mga hapot kada semana na sisimbagon kan saindong estudyante sa saiyang sadiring mga tataramon.
4 An saindong repaso puwedeng garo paglilingkod sa langtad. Magpalataw nin hapot na parateng naaatubang kun nagpapatotoo sa iba. Kamo an bilang kagharong, ipademonstrar sa saindong estudyante kun ano an saiyang sasabihon. Komendaran sia sa saiyang marahay na ginibo, asin magtao nin mga suhestion na makakatabang sa saiya na magin orog pa nganing epektibo sa masunod. An pagsasanay na ini totokdoan sia kun paano gagamiton an saiyang nanodan asin patataluboon an saiyang abilidad sa paggamit kan Biblia.
5 Librong Reasoning: Siertohon na an saindong estudyante igwang kopya kan librong Reasoning, asin sanayon sia na gamiton iyan. Ipaheling kun paano iyan nagtatao nin mga suhestion manongod sa pagpoon nin mga pag-orolay, pagsimbag sa mga hapot sa Biblia, o pag-atubang sa mga pagtumang. Gamiton an libro sa pag-adal kada semana sa pagpaheling kan mga paagi na makipag-olay sa iba. An librong ini paririgonon an saiyang pagsarig, na dinudugangan an saiyang paghihingoa na ipahayag an mensahe kan Kahadean.
6 Idoon an Kahalagahan kan mga Pagtiripon: An mga pagtiripon sa kongregasyon, nangorogna an Pagtiripon sa Paglilingkod asin an Teokratikong Paadalan sa Pagmiministro, ginibo sa pag-andam sa sato para sa paglilingkod sa langtad. Idoon an kahalagahan kan mga pagtiripon, asin tabangan siang umatender. An regular na pag-atender makakatao sa saindong estudyante kan pampahiro na magin sarong tunay na disipulo ni Jesus.
7 Dai dapat lingawan an saindong sadiring personal na halimbawa. An saindong pagigin regular sa paghuhulit nagpapaheling kan saindong hararom na apresasyon para sa katotoohan. An siring na gawe nagpapakosog sa saindong estudyante na gumibo nin orog pa sa pagpaheling kan saiyang pagtubod. (Luc. 6:40) An gabos na ini makakatabang sa bagohan na mansayon an ministeryo bilang sarong pribilehiyo asin magin maogma na makikabtang dian.—1 Tim. 1:12.