Mga Brochure—Mahahalagang Kasangkapan Para sa Ministeryo
1 An ekspertong artesano dara-dara an manlaenlaen na kasangkapan, na kada saro dinisenyo para sa sarong espisipikong trabaho. Bilang mga parabalangibog kan Kahadean, igwa kita nin koleksion nin mga brochure tangani na tabangan kita na magin eksperto sa satong gibohon. (Tal. 22:29) Sa sarong pinto puwedeng makanompong kamo nin saro na may depresyon. Sa saro pa an kagharong nagmamawot nin sadiosan na gobyerno, mientras na an saro pa naghohorophorop kun igwa nin ano man na katuyohan sa buhay. Paano niato magagamit an satong mga brochure na matabangan an mga tawong ini?
2 Kun iinaalok an brochure na “An Dios daw Talagang May Pagmakolog sa Sato?,” puwede kamong magsabi nin arog kaini:
◼ “May mga tawo na an tendensia basolon an Dios huli sa kasakitan asin inhustiya sa kinaban. Nangangatanosan sinda na mantang an Dios makakamhan sa gabos, tatapuson nia an kasakitan kun talagang nagmamakolog sia sa sato. Ano an saboot nindo dapit kaiyan? [Pasimbagon.] An Salmo 72:12-14 nagpapaheling na an Dios talagang nagmamakolog sa sato. An kasakitan asin inhustisya bako niang sala. Nanuga sia na dai mahahaloy an mga paragibo nin maraot hahaleon na. An brochure na ini, An Dios daw Talagang May Pagmakolog sa Sato?, nagpapaheling kun ano an gigibohon nia asin kun paano kita makikinabang.” Puwede nindong ipadagos an pag-orolay sa mga komento sa pahina 27, parapo 22.
3 Kun ginagamit nindo an brochure na “Purpose of Life,” puwedeng boot nindong ponan paagi kaini:
◼ “Haros gabos naghohorophorop dapit sa katuyohan nin buhay. Iyan daw mabuhay sana nin 70 o 80 taon dangan dumuman sa lolobngan? O igwa pa daw nin orog sa buhay? Ano sa paghona nindo? [Pasimbagon.] Digdi sa Salmo 37:29, maheheling niato an magayon na katuyohan nin Dios para sa tawo asin sa daga.” Basahon an teksto, dangan buksan sa ilustrasyon na nasa pahina 31, asin ipadagos an saindong pag-orolay.
4 An brochure na “Uya!” puwedeng iintrodusir paagi sa pagpaheling kan bilog na ilustrasyon sa tutob asin paghapot:
◼ “Ano sa paghona nindo an kaipuhan tangani na magibo an daga na arog kaini? [Pakomentohon.] Nanompongan kan mga gobyerno nin tawo na imposible para sainda na papangyarihon an siring na kinaban. Alagad, inaasegurar kita kan Biblia na an Dios ‘gigibohon na bago an gabos na bagay.’ [Buksan sa pahina 30, asin basahon an Kapahayagan 21:3, 4.] An brochure na ini makakatabang saindo na manodan kun ano an kaipuhan nindong gibohon tanganing mabuhay sa bagong kinaban na iyan.” Buksan sa pahina 3, asin idemonstrar kun paano kita nagkokondukta nin pag-adal sa Biblia.
5 Puwede nindong gamiton an pag-atubang na ini na dara an brochure na “Life on Earth”:
◼ “Dakol na tawo an naghohona na sinda maduman sa langit tanganing magkamit nin buhay na daing katapusan, pero ano sa paghona nindo an pamumuhay sagkod lamang digdi sa daga? [Pasimbagon.] Nagsasabi sa sato an Biblia kun paano kita magkakamit nin daing sagkod na buhay.” Basahon an Juan 17:3. Dangan ipaheling sa kagharong an ilustrasyon #49, asin maghapot: “Paano nindo gustong mabuhay sa sarong kinaban na arog kaini?” Ialok an brochure, asin iareglo an pagdalaw liwat.
6 An mga brochure nagtatampok nin napapanahon na mga tema, nagsisimbag sa mga hapot nin mga tawo, asin nagtataong karangahan. Ekspertong ginagamit an mga kasangkapan na ini, matatabangan niato an mga sinsero na “makaabot sa tamang kaaraman kan katotoohan.”—1 Tim. 2:4.